The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ចំណាយ​ជិត ៣០០ លាន​ដុល្លារ​ក្នុង​ការ​នាំ​ចូល​ទូរស័ព្ទ​ស្មាត​ហ្វូន

កម្ពុជា​ចំណាយ​ជិត ៣០០ លាន​ដុល្លារ​ក្នុង​ការ​នាំ​ចូល​ទូរស័ព្ទ​ស្មាត​ហ្វូន

អតិថិជន​កំពុង​សាក Facebook លើ​ស្មាតហ្វូន​បន្ទាប់​ពី​ទិញ​រួច។
អតិថិជន​កំពុង​សាក Facebook លើ​ស្មាតហ្វូន​បន្ទាប់​ពី​ទិញ​រួច។ ម៉ៃ វីរៈ

កម្ពុជា​ចំណាយ​ជិត ៣០០ លាន​ដុល្លារ​ក្នុង​ការ​នាំ​ចូល​ទូរស័ព្ទ​ស្មាត​ហ្វូន

ភ្នំពេញៈ ប្រទេស​កម្ពុជា បាន​ចំណាយ​ទឹក​ប្រាក់​ជិត ៣០០ លាន​ដុល្លារ​ក្នុង​ការ​នាំ​ចូល​ទូរស័ព្ទ​ស្មាតហ្វូន​ជិត ២ លាន​គ្រឿង​កាល​ពី​ឆ្នាំ​ទៅ។ នេះ​បើ​តាម​ទិន្នន័យ​ចុង​ក្រោយ​ពី​ក្រុម​ហ៊ុន​ស្រាវ​ជ្រាវ GfK មាន​មូលដ្ឋាន​នៅ ប្រទេស​សិង្ហបុរី ដែល​បាន​ចេញ​ផ្សាយ​កាល​ពី​ដើម ខែ​មិថុនា កន្លង​ទៅ។

លោក Seraphina Wee ប្រធាន​ផ្នែក​ទំនាក់​ទំនង​សាធារណៈ​របស់ GfK បាន​ថ្លែង​ថា និន្នាការ​តម្រូវ​ការ​ទូរស័ព្ទ​របស់ កម្ពុជា បាន​ធ្លាក់​ចុះ ប៉ុន្តែ​តម្លៃ​បាន​កើន​ឡើង​ដោយ​សារ​តម្លៃ​ទូរស័ព្ទ​ស្មាត​ហ្វូន​កើន​ឡើង។

លោក​បាន​ថ្លែង​ថា៖ «ទូរស័ព្ទ​ស្មាត​ហ្វូន​ត្រូវ​បាន​លក់​ចេញ​ជាង ១,៧ លាន​គ្រឿង​ក្នុង​រយៈ​ពេល ១២ ខែ​មុន។ តម្រូវ​ការ​ទូរស័ព្ទ​ស្មាត​ហ្វូន​បាន​លក់​អស់​ជាង ៩ សែន​គ្រឿង​ក្នុង​រយៈ​ពេល ៦ ខែ​មុន​ហើយ​វា​បាន​ធ្លាក់​ចុះ ១៩ ភាគ​រយ​ធៀប​នឹង​រយៈ​ពេល​ដូច​គ្នា​ពី​ឆ្នាំ​មុន»។

លោក​បន្ថែម​ថា៖ «អតិថិជន​បាន​ចំណាយ​ទឹក​ប្រាក់​សរុប ២៩០ លាន​ដុល្លារ​នៅ​ក្នុង​រយៈ​ពេល ១២ ខែ​មុន»។

លោក ហ៊ ហាប់ អនុ​ប្រធាន​គ្រប់​គ្រង​ក្រុម​ហ៊ុន GGear ជា​ក្រុម​ហ៊ុន​ទទួល​បាន​អាជ្ញាប័ណ្ណ​សម្រាប់​គ្រឿង​អេឡិច​ត្រូនិក LG Electronics បាន​ទទួល​ស្គាល់​ថា ការ​លក់​ទូរស័ព្ទ​ស្មាត​ហ្វូន​បាន​ធ្លាក់​ចុះ​តាំង​ពី​ឆមាស​ទី២ ឆ្នាំ​២០១៣។

លោក​លើក​ឡើង​ថា៖ «កាល​ពី​ឆ្នាំ​មុន ប្រទេស​យើង​មាន​ការ​រៀប​ចំ​ការ​បោះ​ឆ្នោត​ដែល​នាំ​ឲ្យ​មាន​ការ​ជាប់​គាំង​នយោបាយ និង​ធ្វើ​បាតុកម្ម​ដោយ​កម្មករ។ ជាមួយ​គ្នា​នេះ​ដែរ អគ្គ​នាយកដ្ឋាន​ពន្ធ​គយ​ និង​រដ្ឋាករ​ ​កំពុង​ចាប់​ផ្ដើម​បង្កើន​សមត្ថភាព​របស់​ខ្លួន​ដើម្បី​ពង្រឹង​ការ​ប្រមូល​ពន្ធ​គយ ដូច្នេះ​ពួក​គេ​បាន​រឹត​បន្តឹង​លើ​នីតិវិធី​លើ​ផលិត​ផល​ខុស​ច្បាប់ ដូច្នេះ​សម្រាប់​អ្នក​ដែល​ធ្លាប់​នាំ​ចូល​ខុស​ច្បាប់​បាន​កាត់​បន្ថយ​ការ​នាំ​ចូល​ដែល​នោះ​ជា​ចំណុច​សំខាន់​នៃ​ការ​ធ្លាក់​ចុះ»។

ចាប់​តាំង​ពី​ដើម ឆ្នាំ​២០១៤ មក​រដ្ឋាភិបាល​បាន​បន្ថែម​ពន្ធ​ពិសេស​លើ​ការ​នាំ​ចូល​ទូរស័ព្ទ ១០ ភាគរយ​ដូច្នេះ​បូក​ជា​មួយ​ការ​យក​ពន្ធ​លើ​ពន្ធអាករ​តម្លៃ​បន្ថែម (VAT) ១០ ភាគ​រយ​ដែល​មាន​ស្រាប់​គឺ​ចំណាយ​ពន្ធ ២០ ភាគ​រយ​ដែល​ជា​ហេតុ​ធ្វើ​ឲ្យ​មាន​ការ​កាត់​បន្ថយ​ការ​នាំ​ចូល។

លោក​បន្ត​ថា៖ «ការណ៍​នេះ​ធ្វើ​ឲ្យ​យើង​មាន​ការ​ពិបាក​ក្នុង​ការ​ប្រកួត​ប្រជែង​ជា​មួយ​អ្នក​នាំ​ចូល​គេច​ពន្ធ។ លើស​ពី​នេះ​ទៅ​ទៀត កាល​ពី​ចុង ឆ្នាំ​២០១៣ យើង​បាន​មើល​ឃើញ​តម្លៃ​ទូរស័ព្ទ​ស្មាត​ហ្វូន​បាន​កើន​ឡើង ហើយ​ក្រុម​ហ៊ុន​ស្រប​ច្បាប់​មួយ​ចំនួន​ក៏​កាត់​បន្ថយ​ការ​នាំ​ចូល​របស់​ខ្លួន​ផង​ដែរ»។

លោក ហ៊ ហាប់ ថ្លែង​ថា ការ​ប្រកួត​ប្រជែង​មិន​យុត្តិធម៌​ក្នុង​ទីផ្សារ​នេះ​ជា​កត្តា​មួយ​នៅ​ពី​ក្រោយ​បញ្ហា​នេះ​ផង​ដែរ។

លោក​បាន​បន្ត​ថា ចំណែក​ទីផ្សារ​របស់​ទូរស័ព្ទ LG មាន​តែ ៥ ភាគរយ​ប៉ុណ្ណោះ​ដោយ​សារ​វា​មាន​ការ​ពិបាក​បន្តិច​សម្រាប់​ពួក​យើង​ក្នុង​ការ​ប្រកួត​ប្រជែង​ជាមួយ​ផលិត​ផល​បាន​នាំ​ចូល​ដោយ​គេច​ពន្ធ។

លោក Jason Liu ប្រធាន​ក្រុម​ហ៊ុន Huawei Technologies (Cambodia) ជា​ក្រុម​ហ៊ុន​បច្ចេកវិទ្យា​ទូរស័ព្ទ​ចល័ត​ចិន​ឈាន​មុខ​គេ​នៅ ប្រទេស​ចិន និង​ជា​ក្រុម​ហ៊ុន​ទូរស័ព្ទ​ស្មាត​ហ្វូន ទី៣ របស់​ពិភពលោក​មិន​អាច​ទាក់​ទង​បាន​ទេ កាល​ពី​ថ្ងៃ​ពុធ។ ប៉ុន្តែ​លោក​បាន​ឲ្យ​ដឹង​កាល​ពី​លើក​មុន​ថា ក្រុម​ហ៊ុន​លោក​ទើប​ចាប់​ផ្ដើម​លក់​ទូរស័ព្ទ​ស្មាត​ហ្វូន​នៅ​ក្នុង​ទីផ្សារ​កម្ពុជា​កាល​ពី​ឆ្នាំ​មុន។ ក្រុម​ហ៊ុន​នេះ​កំណត់​លក់​ទូរស័ព្ទ​ឲ្យ​បាន​ចំនួន ៥០ ០០០ គ្រឿង​នៅ​ឆ្នាំ​នេះ។

លោក​បន្ត​ថា៖ «នៅ​ត្រី​មាស ទី១ សមិទ្ធផល​របស់​យើង​លើស​ពី​ទិសដៅ​កំណត់ ហើយ​ខ្ញុំ​សង្ឃឹម​ថា ក្នុង​អំឡុង​ត្រី​មាស ទី​១ ឆ្នាំ​នេះ សមិទ្ធផល​របស់​យើង​នឹង​លើស​ពី ២០ ០០០ គ្រឿង។ ខ្ញុំ​ពិត​ជា​ជឿ​ជាក់​ថា ជាមួយ​នឹង​និន្នាការ​ពេល​បច្ចុប្បន្ន​នៃ​ការ​លក់​នៅ​ត្រី​មាស ទី១ យើង​អាច​សម្រេច​បាន​តាម​ទិសដៅ​កំណត់»។

លោក ហាប់ បញ្ជាក់​ថា ចំនួន​នៃ​ការ​លក់​នៅ​តែ​ធ្លាក់​ចុះ​នៅ​ដើម ឆ្នាំ​២០១៤ បើ​ធៀប​នឹង ឆ្នាំ​២០១៣ ដែល​ធ្លាក់​ចុះ​ប្រហែល ២០ ភាគ​រយ។

ទិន្នន័យ​ពី​ក្រុម​ហ៊ុន GfK បាន​បង្ហាញ​ថា ក្នុង​តំបន់​អាស៊ី​អាគ្នេយ៍​ដែល​មាន​ទីផ្សារ ៦ ក្នុង​ចំណោម ៧ ជា​ទីផ្សារ​កំពុង​អភិវឌ្ឍន៍​ការ​លក់​ទូរស័ព្ទ​ស្មាត​ហ្វូន​បន្ត​កើន​ឡើង​ក្នុង​ខែ​បន្ត​បន្ទាប់។ ការ​ចាប់​ផ្ដើម​ប្រើ​ប្រាស់​ទូរស័ព្ទ​ស្មាត​ហ្វូន បាន​ទទួល​ជោគជ័យ​គួរ​កត់​សម្គាល់​នៅ​ក្នុង​ទីផ្សារ​ទូរស័ព្ទ ជា​ទូទៅ​រួម​មាន​ទូរស័ព្ទ​ធម្មតា​ដែល​កើន​ឡើង ៥៥ ភាគ​រយ​កាល​ពី ខែ​មីនា ឆ្នាំ​២០១៤ នៅ ប្រទេស​សិង្ហបុរី ម៉ាឡេស៊ី ឥណ្ឌូនេស៊ី ថៃ ហ្វីលីពីន កម្ពុជា និង វៀតណាម។

យោង​តាម​លោក Jason តម្រូវ​ការ​ទូរស័ព្ទ​ធម្មតា​របស់ កម្ពុជា គឺ​នៅ​តែ​ធំ​ប្រហែល​ពី ២ ទៅ ៣ លាន​គ្រឿង​ក្នុង​មួយ​ឆ្នាំ​នៅ​ក្នុង​ទីផ្សារ​នេះ ប៉ុន្តែ​លោក​បាន​បន្ត​ថា នៅ​ក្នុង​រយៈ​ពេល​ប៉ុន្មាន​ឆ្នាំ​ក្រោយ​នេះ​និន្នាការ​នេះ​នឹង​ត្រូវ​បាន​ផ្លាស់​ប្តូរ។

លោក​ថ្លែង​ថា៖ «ខ្ញុំ​ជឿ​ជាក់​ថា នៅ​ក្នុង​រយៈ​ពេល ៥ ឆ្នាំ​ក្រោយ អ្នក​ប្រើ​ប្រាស់​ទូរស័ព្ទ​ធម្មតា​ពី ៨០ ទៅ ៩០ ភាគ​រយ​នឹង​ក្លាយ​ជា​អ្នក​ប្រើ​ប្រាស់​ទូរស័ព្ទ​ស្មាត​ហ្វូន»។

យោង​តាម GfK ទន្ទឹម​នឹង​នេះ​ទូរស័ព្ទ​ស្មាត​ហ្វូន​ទំហំ​ធំៗ​ដែល​មាន​អេក្រង់ ៥,៦ អ៊ិញ បាន​ក្លាយ​ជា​តម្រូវ​ការ​របស់​មនុស្ស​ជាច្រើន។ ទូរស័ព្ទ​ជាង ១,១ លាន​គ្រឿង​មាន​តម្លៃ​សរុប ៥៦៧ លាន​ដុល្លារ​អាមេរិក​ត្រូវ​បាន​លក់​នៅ ប្រទេស​ម៉ាឡេស៊ី និង ប្រទេស​ឥណ្ឌូនេស៊ី គឺជា​ទីផ្សារ​ធំ​ជាង​គេ​សម្រាប់​វិស័យ​នេះ៕

អត្ថបទគួរចាប់អារម្មណ៍