The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ទទួល​ផល​ស្រូវ​ជាង ៤ លាន​តោន

កម្ពុជា​ទទួល​ផល​ស្រូវ​ជាង ៤ លាន​តោន

កម្ពុជា​ទទួល​ផល​ស្រូវ​ជាង ៤ លាន​តោន

131220_11
កសិករកំពុងវេចខ្ចប់ស្រូវបន្ទាប់ពីប្រមូលផលរួច តាមទិន្នន័យបឋម កម្ពុជាប្រមូលផលបានជាង ៤លានតោន bloomberg

ភ្នំពេញៈ ទិន្នន័យ​បឋម​ទទួល​បាន​ពី​ក្រសួង កសិកម្ម រុក្ខា​ប្រមាញ់ និង​នេសាទ បាន​បង្ហាញ​ថា កម្ពុជា​បាន​ប្រមូល​ផល​ស្រូវ​បាន​ជាង ៤ លាន​តោន​ត្រឹម​ថ្ងៃ ទី១១ ខែ ធ្នូ ក្នុង​អំឡុង​រដូវ​ប្រមូលផល​ឆ្នាំ​នេះ។

ទិន្នន័យ​នេះ​បាន​បង្ហាញ​ថា ជាមួយ​នឹង​ផ្ទៃ​ដី​ដាំ​ដុះ​ស្រូវ​សរុប ២ ៥៦២ ៧៦៤ ហិកតា ផ្ទៃ​ដី​ប្រហែល​ជា ១ ៤១៦ ៩៤៥ ហិកតា​ត្រូវ​បាន​ប្រមូលផល​ដោយ​ទទួល​បាន​ទិន្នផល​ស្រូវ​ចំនួន ៤ ១៨៤ ៤៧៨ តោន (ស្មើ​នឹង ៥៥,២៥ ភាគរយ​នៃ​ផ្ទៃ​ដី​សរុប) ដែល​បាន​កើន​ឡើង​តិចតួច​គឺ ០,៥ ភាគរយ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន ដែល​ទទួល​បាន​ផល​ចំនួន ៤ ១៦៣ ៤៣៦ តោន។

លោក ខឹម ចិន្តា ប្រធាន​នាយកដ្ឋាន​កិច្ចការ​រដ្ឋបាល​នៃ​ក្រសួង កសិកម្ម បាន​ប្រាប់ ភ្នំពេញ ប៉ុស្ដិ៍ ថា ទិន្នផល​នេះ​គឺជា​ទិន្នផល​បឋម​ដែល​មិន​ទាន់​បាន​បញ្ចប់​ការ​ប្រមូលផល​ទាំង​អស់​នោះ​ទេ។

លោក​បន្ត​ថា៖ «តួលេខ​នេះ​មិន​ឆ្លុះ​បញ្ចាំង​ពី​វិស័យ​នេះ​ទាំង​មូល​ទេ វា​គឺជា​លទ្ធផល​បឋម​ដោយ​សារ​តែ​រដូវ​ប្រមូល​ផល​ទាំង​មូល​មិន​ទាន់​បាន​បញ្ចប់។ ប៉ុន្តែ​ជាមួយ​នឹង​គោល​នយោបាយ​របស់​រដ្ឋាភិបាល យើង​ត្រូវ​តែ​ធ្វើ​ទិន្នន័យ​បឋម​រយៈ​ពេល​ពេញ​មួយ​ឆ្នាំ​ជា​មុន»។

លោក​បាន​លើក​ឡើង​ថា រដូវ​ប្រមូលផល​នេះ​ត្រូវ​បាន​ចាប់ផ្ដើម​ចាប់​តាំង​ពី​ខែ សីហា រហូត​ដល់​ចុង​ខែ កុម្ភៈ ឆ្នាំ​ក្រោយ។ ម៉្យាង​ទៀត យើង​នៅ​តែ​មាន​សេចក្ដី​រីករាយ​ជាមួយ​នឹង​លទ្ធផល​បណ្ដោះ​អាសន្ន​នេះ។ ខ្ញុំ​បាន​អង្កេត​ឃើញ​ថា យើង​នឹង​ទទួល​បាន​លទ្ធផល​យ៉ាង​ល្អ​នៅ​ឆ្នាំ​នេះ​ទោះ​បី​ជា​យើង​មាន​គ្រោះ​ទឹកជំនន់​ដែល​បាន​ប៉ះពាល់​ដល់​តំបន់​មួយ​ចំនួន​ក៏​ដោយ​ប៉ុន្តែ​វា​មិន​ធ្ងន់ធ្ងរ​នោះ​ទេ។ យើង​បាន​ជួប​ជាមួយ​មន្ដ្រី​ខេត្ត និង​កសិករ​ក្រោយ​ពី​ទឹក​ជំនន់​ពួកគេ​បាន​និយាយ​ថា ស្ថានការណ៍ គឺ​ល្អ​ប្រសើរ​ជាង​កាល​ពី​ឆ្នាំ​ទៅ។

លោក លឹម ប៊ុនហេង ម្ចាស់​ក្រុមហ៊ុន Loran Import-Export ដែល​ជា​ក្រុមហ៊ុន​នាំ​ចេញ​អង្ករ​មួយ​ក្នុង​ចំណោម​ក្រុមហ៊ុន​នាំ​ចេញ​អង្ករ​ឈាន​មុខ​គេ​បាន​យល់​ថា ទឹកជំនន់​មិន​ធ្វើ​ឲ្យ​ប៉ះពាល់​ដល់​លទ្ធផល​ស្រូវ​ឆ្នាំ​នេះ​ទេ។ លោក​បន្ត​ថា៖ «ខ្ញុំ​បាន​ឃើញ​ថា បន្ទាប់​ពី​ទឹក​ជំនន់​កសិករ​របស់​យើង​បាន​ចាប់​ផ្ដើម​បង្ក​បង្កើន​ផល​ភ្លាមៗ។ ដូច្នេះ​ខ្ញុំ​គិត​ថា លទ្ធផល​របស់​យើង​នៅ​ឆ្នាំ​នេះ​នឹង​មិន​ទាប​ជាង​កាល​ពី​ឆ្នាំ​មុន​នោះ​ទេ»។

លោក​បន្ត​ថា រហូត​មក​ដល់​ពេល​នេះ​លោក​បាន​ទិញ​ស្រូវ​ក្រអូប​ប្រហែល ១០ ០០០ តោន​ពី​កសិករ​នៅ​ក្នុង​ខេត្ត ពោធិសាត់ បាត់ដំបង និង​បន្ទាយ​មាន​ជ័យ សម្រាប់​កិន​ដើម្បី​នាំ​ចេញ។

ទិន្នន័យ​នេះ​បាន​បង្ហាញ​ថា ក្នុង​ចំណោម​ខេត្ត-ក្រុង​ទាំង ២៤ ខេត្ត​ដែល​បាន​ប្រមូល​ផល​ស្រូវ​គឺ​ខេត្ត ព្រៃវែង ដែល​ប្រមូល​ផល​បាន ៥៩៧ ៥១៣ តោន លើ​ផ្ទៃ​ដី ៦៧,៣៤ ភាគរយ​នៃ​ផ្ទៃ​ដី​ដាំដុះ​សរុប​ខេត្ត បាត់ដំបង ៣៨៨ ៦១៣ តោន​លើ​ផ្ទៃ​ដី ៤៨,០៤ ភាគរយ ខេត្ត សៀមរាប ៣៥៩ ២៩៥ តោន លើ​ផ្ទៃ​ដី ៧០,៤២ ភាគរយ ខេត្ត តាកែវ ២៩៦ ៩៥៤ តោន លើ​ផ្ទៃ​ដី ៤២,៣២ ភាគរយ ខេត្ត បន្ទាយ​មាន​ជ័យ ២៩៥ ០៤៨ តោន​លើ​ផ្ទៃ​ដី ៤៦,២៨ ភាគរយ ខេត្ត ស្វាយរៀង ២៦១ ៦៤៣ តោន​លើក​ផ្ទៃ​ដី ៥៨,៦២ ភាគរយ ខេត្ត ពោធិសាត់​ប្រមូល​ផល​បាន ២២៦ ៩២៨ តោន​លើ​ផ្ទៃដី ៦១,៩៦ ភាគរយ ខេត្ត ឧត្តរ​មាន​ជ័យ ប្រមូល​ផល​បាន ២៤៨ ៥០៨ តោន​លើ​ផ្ទៃ​ដី ៩៨,៧៩ ភាគរយ។

លោក ខឹម ចិន្តា សង្ឃឹម​ថា លទ្ធផល​ឆ្នាំ​នេះ​នឹង​ខ្ពស់​ជាង​មុន ដោយ​សារ​កសិករ​បាន​ផ្លាស់​ប្តូរ​គ្រាប់​ពូជ​របស់​ពួកគេ​ទៅ​ប្រើ​គ្រាប់​ពូជ​ល្អ​ដែល​ក្រសួង​បាន​កំណត់​សម្រាប់​គ្រាប់​ពូជ ១០ ប្រភេទ​ដើម្បី​ទទួល​បាន​ទិន្នផល​ខ្ពស់។

ទិន្នន័យ​របស់​ក្រសួង កសិកម្ម បាន​បង្ហាញ​ថា កម្ពុជា​ផលិត​បាន​ស្រូវ​ប្រហែល ៩,២៩ លាន​តោន​សម្រាប់​រដូវ​ប្រាំង​និង​រដូវ​វស្សា ដែល​ទទួល​បាន​ផល​លើស​ចំនួន ៤,៧ តោន៕ PB

អត្ថបទគួរចាប់អារម្មណ៍