The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​និង​មីយ៉ាន់ម៉ា​លើក​លែង​ទិដ្ឋាការ

កម្ពុជា​និង​មីយ៉ាន់ម៉ា​លើក​លែង​ទិដ្ឋាការ

កម្ពុជា​និង​មីយ៉ាន់ម៉ា​លើក​លែង​ទិដ្ឋាការ

131219_11
បុគ្គលិកបម្រើការនៅព្រលានយន្តហោះអន្តរជាតិភ្នំពេញពិនិត្យលិខិតឆ្លងដែនរបស់អ្នកដំណើរ ពលរដ្ឋកម្ពុជា និងមីយ៉ាន់ម៉ា នឹងមិនចាំបាច់សុំទិដ្ឋាការសម្រាប់ការធ្វើដំណើររវាងប្រទេសទាំងពីរឡើយចាប់ពីឆ្នាំក្រោយទៅ ភ្នំពេញ ប៉ុស្តិ៍

ភ្នំពេញៈ ប្រទេស​កម្ពុជា និង មីយ៉ាន់ម៉ា​បាន​ចុះ​កិច្ច​ព្រម​ព្រៀង​លើក​លែង​ទិដ្ឋាការ​សម្រាប់​ពលរដ្ឋ​នៃ​ប្រទេស​ទាំង​ពីរ​ដែល​កាន់​លិខិត​ឆ្លងដែន​ធម្មតា។

កិច្ចព្រម​ព្រៀង​លើក​លែង​ទិដ្ឋាការ​នេះ ត្រូវ​បាន​ចុះ​ហត្ថ​លេខា កាល​ពី​ថ្ងៃ​ព្រហស្បតិ៍​សប្តាហ៍​មុន។ នេះ​បើ​តាម​ការ​ឲ្យ​ដឹង​ពី​អ្នក​នាំ​ពាក្យ​​ក្រសួង​ការ​បរទេស​កម្ពុជា។

កិច្ចព្រម​ព្រៀង​លើក​លែង​ទិដ្ឋាការ​រវាង​កម្ពុជា​ និង​មីយ៉ាន់ម៉ា​នេះ នឹង​ចាប់​ផ្តើម​អនុវត្ត​នៅ​ថ្ងៃ​ទី​១២ ខែ​មករា ឆ្នាំ​ក្រោយ​នេះ​ មាន​ន័យ​ថា​ អ្នកកាន់​លិខិតឆ្លង​ដែន​ធម្មតា នឹង​អាច​ចេញ​ចូល​ប្រទេស​ទៅ​វិញ​ទៅ​មក​ដោយ​មិន​បាច់​សុំ​ទិដ្ឋាការ​ទៀត​​ទេ ហើយ​អាច​បន្ត​ស្នាក់​នៅ​រហូត​ដល់​ ១៤​ថ្ងៃ។

លោក កុយ គួង អ្នក​នាំ​ពាក្យ​ក្រសួង​ការ​បរទេស​ប្រាប់​កាសែត​ភ្នំពេញ​ប៉ុស្តិ៍​ កាល​ពី​ម្សិល​មិញ​ថា៖ «កិច្ច​ព្រម​ព្រៀង​លើក​លែង​ទិដ្ឋាការ​នឹង​សម្រួល​ដល់​ពលរដ្ឋ​ប្រទេស​ទាំង​ពីរ ងាយ​ស្រួល​ធ្វើ​ដំណើរ​ទៅ​មក ដោយ​មិន​បាច់​ចំណាយ​ពេល​សុំ​ទិដ្ឋាការ។ ទីពីរ គឺ​ដើម្បី​កំណើន​ទេសចរ​រវាង​ប្រទេស​ទាំង​ពីរ។ ទីបី គឺជា​ការ​ផ្លាស់​ប្តូរ​រវាង​មនុស្ស​និង​មនុស្ស​ឈាន​ទៅការ​រួប​រួម​ជា​សហគមន៍​អាស៊ាន ​២០១៥»។

កិច្ចព្រមព្រៀង​លើក​លែង​ទិដ្ឋាការ​នេះធ្វើ​ឡើង​ក្នុង​បំណង​សម្រួល​ដល់​ការ​​ធ្វើ​ដំណើរ​រវាង​​ប្រជាជន​ក្នុង​ប្រទេស​ទាំង​ពីរ ហើយ​ទន្ទឹម​នឹង​នោះ​ក៏​នឹង​ជួយ​ជំរុញ​វិស័យ​ទេសចរណ៍​ផង​ដែរ​។ សម្រាប់​កម្ពុជា ​មីយ៉ាន់ម៉ា​គឺ​ជា​ប្រទេស​ចុង​ក្រោយ​ក្នុង​ចំណោម​ប្រទេស​ជា​សមាជិក​ អាស៊ាន​ដែល​បាន​ចុះ​ ហត្ថ​លេខា​លើ​កិច្ច​ព្រម​ព្រៀង​លើក​លែង​ទិដ្ឋា​ការ​នេះ​។

ក្រុម​ហ៊ុន​ អាកាស​ចរណ៍ ​មីយ៉ាន់ម៉ា អ៊ែរវេ អន្តរ​ជាតិ​បាន​ចាប់​ផ្តើម​ជើង​ហោះ​ហើរ​មក​កម្ពុជា ​កាល​ពី​ខែធ្នូ ​ឆ្នាំ២០១២​។ ក្រុមហ៊ុន ​មីយ៉ាន់ម៉ា អ៊ែរវេ ​អន្តរ​ជាតិ​បាន​ផ្អាក​ដំណើរ​ការ​ហោះ​ហើរ​របស់​ខ្លួន​មក​កម្ពុជាអស់​រយៈពេល​​ប្រហែល ៣ខែ ដោយសារ​តែ​ការ​ធ្លាក់​ចុះ​តម្រូវ​ការ។

លោក ឡាវ ​ហេង ​ភា្នក់​ងារ​​លក់​របស់​ក្រុម​ហ៊ុន​ មី​យ៉ាន់ម៉ា​ អ៊ែរវេ​អន្តរជាតិ​នៅ​កម្ពុជា និង​ជា​ប្រធាន​ក្រុមហ៊ុន​ VLK ​Royal ​Tourism ​មើល​ឃើញ​កិច្ច​ព្រម​ព្រៀង​លើ​ការ​លើក​លែង​ទិដ្ឋាការ​រវាង​​ ប្រទេស​ទាំង​ពីរ​នេះ​ថា ជា​ឱកាស​ដ៏​ល្អ​សម្រាប់​វិស័យ​ពាណិជ្ជកម្ម និង​ទេសចរណ៍។

លោកនិយាយថា វាជា​ទី​ផ្សារ​​ដែល​ទើប​តែ​ងើប ដោយ​ប្រទេស​មីយ៉ាន់ម៉ា​មាន​សក្តានុពល​មិន​ត្រឹម​តែ​ទាក់​ទាញ ភ្ញៀវទេសចរ​ពីកម្ពុជា​ប៉ុណ្ណោះ​ទេ តែ​ក៏​បាន​ទាក់​ទាញ​ពាណិជ្ជករ​ពី​កម្ពុជា​ដែល​មាន​បំណង​ វិនិ​យោគ​ និង​ពង្រីក​​សាខា​បន្ថែម​​នៅ​ក្នុង​ប្រទេស​នោះ​​ផង​ដែរ ​។

លោក​បន្តថា​៖ «ពាណិជ្ជករ​​ពី​ប្រទេស​កម្ពុជា​ធ្វើ​ដំ​ណើរ​ចុះ​ឡើង​ទៅ​កាន់​ប្រទេស​ មីយ៉ាន់ម៉ា។ ​វា​ជា​រឿង​ល្អ​ព្រោះ​ភ្ញៀវ​អាច​​ធ្វើ​ដំណើរ​​នៅ​ពេល​ណា​ដែល​ពួកគេ​ចង់​ ដោយ​​មិនចាំ​បាច់​ស្នើ​សុំ​ទិដ្ឋាការ​ឡើយ»។

បើ​ទោះ​ជា​យ៉ាងណា លោក​ចង់​ឲ្យ​ប្រទេស​មី​យ៉ាន់​ម៉ា​បង្កើន​ចំនួន ​សណ្ឋា​គារ​ដែល​មាន​តម្លៃ​សម​រម្យ​បន្ថែម​ទៀត ព្រោះ​ថ្លៃ​ស្នាក់​នៅ​ក្នុង​ប្រទេស​មី​យ៉ាន់​ម៉ា​ខ្ពស់​ណាស់។

ចំនួន​ ភ្ញៀវ​ទេសចរ​ពី​ប្រទេស​​មីយ៉ាន់ម៉ា​មក​ប្រទេស​កម្ពុជា​បាន​កើន​ឡើង ប្រហែល ១២​ភាគរយ​​ក្នុង​​រយៈ​ពេល​ ៨​ខែ​​ដំបូង​​នៅ​ឆ្នាំ​នេះ​ធៀប​នឹង​ រយៈ​ពេល​ដូចគ្នា​​កាល​ពី​ឆ្នាំ​មុន​។ ​ប៉ុន្តែ​ចំណែក​ទី​ផ្សារ​​របស់​ខ្លួន​ចំពោះ​កម្ពុជា​មាន​កម្រិត​ទាប​​មាន​តែ ០,១ ភាគ​រយ​ធៀ​ប​នឹង​ប្រទេស​ជា​សមា​ជិក​អាស៊ាន​ផ្សេង​ទៀត។

លោក ​ឡាវ ​ហេង ​បាន​កត់​សម្គាល់​ឃើញថា ភ្ញៀ​វទេសចរ​មី យ៉ាន់ម៉ា​​ចូល​ចិត្ត​ដើរ​ទិញ​ទំនិញ​យី​ហោមា​ន​តម្លៃ​ខ្ពស់។ ​ពួក​គេ​ជ្រើស​យក​ការ​ទស្សនា​នៅ​ប្រទេស​ថៃ​ និង​​សិង្ហ​បុរី​ ខណៈ​ដែល​កម្ពុជា​មិន​មាន​​មជ្ឈមណ្ឌល​លក់​ទំនិញ​ប្រភេទ​ប្រណីត​និង​ម៉ាក។

ដើម្បី​ទាក់​ទាញ​ភ្ញៀវ​ទេសចរ​​មី ​យ៉ាន់​​ម៉ា​មក​កម្ពុជា​ លោក ​ឡាវ ​ហេង ​ស្នើ​ឲ្យ​មាន​​ការ​សាង​សង់​មជ្ឈ​មណ្ឌល​លក់​ទំនិញ​ទំនើប​ៗ​បន្ថែម​ទៀត ហើយ​ដាក់​លក់​ទំនិញ ​និង​ផលិត​ផល​​ប្រណីត​ៗ​ដែល​មាន​​យីហោ។

លោក​ថ្លែង​ថា៖ «ប្រជា​ជន​គាត់​ច្រើន​លាន​​ដែរ។ បើ​​យើង​​ទាក់​ទាញ​បាន​តែ​​មួយ​ចំនួន​ក៏​យើង​អាច​រក​ប្រាក់​​ច្រើន ពី​វិស័យ​​ទេសចរ​ណ៍​បាន​ដែរ​»៕PB

អត្ថបទគួរចាប់អារម្មណ៍