The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​នឹង​រៀប​ចំ​ពិព័រណ៍​អន្តរជាតិ​លើក​ទី៤​នៅ​ពាក់​កណ្តាល​ខែ​នេះ

កម្ពុជា​នឹង​រៀប​ចំ​ពិព័រណ៍​អន្តរជាតិ​លើក​ទី៤​នៅ​ពាក់​កណ្តាល​ខែ​នេះ

កម្ពុជា​នឹង​រៀប​ចំ​ពិព័រណ៍​អន្តរជាតិ​លើក​ទី៤​នៅ​ពាក់​កណ្តាល​ខែ​នេះ

ភ្នំពេញៈ ​កម្ពុជា​នឹង​រៀប​ចំ​ពិព័រណ៍​វាយនភ័ណ្ឌ សម្លៀក​បំពាក់​អន្តរជាតិ​ និង​ពិព័ណ៍​ឧស្សាហកម្ម​គ្រឿង​ចក្រ​អន្តរជាតិ​លើក​ទី៤ ​រយៈពេល ៤ថ្ងៃ​ ពី​ថ្ងៃទី​១៥​ រហូត​ដល់​ថ្ងៃ​ទី​១៨​ខែ​សីហា​ នៅ​កោះពេជ្រ។

លោក ​ស៊ុន​ ចាន់​ថុល ​រដ្ឋមន្ដ្រី​​ក្រសួង​ពាណិជ្ជកម្ម បាន​ឲ្យ​ដឹង​​នៅ​​ក្នុង​សេចក្ដី​ប្រកាស​ព័ត៌មាន​ថា ការ​តាំង​ពិព័រណ៍នេះ​គឺជា​វេទិកា​ដើម្បី​បង្កើត​ទំនាក់​ទំនង​រវាង​អ្នក​ផ្គត់​ផ្គង់ និង​អ្នក​រកស៊ី​នៅ​ក្នុង​វិស័យ​នេះ​ក្នុងការ​ផ្លាស់​ប្តូរ​យោ​បល់​គ្នា​ និង​ស្វែង​រក​មធ្យោបាយ​ធ្វើ​ពាណិជ្ជ​កម្ម​ជាមួយ​គ្នា។

លោកបាន​លើក​​ឡើងថា៖ «ការ​រៀប​ចំ​ពិព័រណ៍​នេះ​គឺ​មាន​បំណង​ដើម្បី​លើក​កម្ពស់​ការ​អភិវឌ្ឍ​​ឧស្សាហកម្ម ​និង​ការ​វិនិយោគ​បរទេស​នៅ​ប្រទេស​កម្ពុជា ជា​ពិសេស​ដើម្បី​​បង្កើន​​សកម្មភាព​នាំចូល ​នាំចេញ​ ហើយ​ជាមួយ​គ្នា​នេះ​ដែរ​ដើម្បី​​បង្កើត​ឱកាស​សម្រាប់​អ្នក​នៅ​ក្នុង​ឧស្សាហកម្ម​នេះដើម្បី​កែលម្អ​ឧបករណ៍​ចាស់ៗ ស្វែង​រក​កិច្ច​សហប្រតិបត្តិ​ការ​ និង​ការ​ស្វែង​រក​ឱកាស​ធ្វើ​អាជីវកម្ម។ ការ​តាំង​ពិ​ព័រណ៍នេះ​ច្បាស់​​ណាស់​គឺជា​វេទិកា​ដ៏​ល្អ​និង​មាន​ប្រយោជន៍​​សម្រាប់​ពាណិជ្ជករ និង​អាជីវករ​កម្ពុជា»។

យោង​តាម​សេច​ក្ដី​ប្រកាស​ព័ត៌មាន នឹង​មាន​ក្រុម​ហ៊ុន​ចំនួន ២៦០ មក​ពី ២១ ប្រទេស​ និង​​តំបន់​ជាច្រើន​មាន​ដូចជា​ ​ប្រទេស​អូស្ដ្រា​លី ​​កម្ពុជា ចិន ​សាធារណរដ្ឋ​ឆែក ​បារាំង ​អាល្លឺម៉ង់ ​ហុង​កុង ​អ៊ីតាលី ​ជប៉ុន ​កូរ៉េ ​ម៉ាឡេស៊ី ​ប៉ាគីស្ថាន​ សិង្ហបុរី ​អេស៉្បាញ ​ស្វ៊ីស ​តៃវ៉ាន់ ​​ថៃ ​តួកគី ​អង់គ្លេស​ អាមេរិក ​វៀតណាម ​ដែល​មាន​ស្ដង់​សរុប​ចំនួន ៤៣០។

ក្នុង​ពិព័រណ៍នេះ​នឹង​បង្ហាញ​ផលិត​ផល​ផ្សេងៗ​គ្នា​ដូចជា ​វាយនភ័ណ្ឌ និង​សម្លៀក​បំពាក់ ​ឧបករណ៍​កសិកម្ម ​ក្រណាត់​ និង​គ្រឿង​បន្លាស់​ ឧបករ​ណ៍ធ្វើ​ពី​ប្លាស្ទិក និង​កៅ​ស៊ូ ការ​បោះ​ពុម្ព ​និង​ការ​វេច​ខ្ចប់ ការ​កែ​ច្នៃ​អាហារ​ ការ​ងារ​លោហ​ធាតុ ​និង​​រថយន្ត ឧបករណ៍ ​និង​​គ្រឿង​ដែក​ គ្រឿង​​បន្លាស់​រថយន្ត ​និង​គ្រឿង​​បន្លាស់​ ឱសថ​​ និង​ការ​ថែទាំ​​សុខ​ភាព ​និង​សម្ភារ​​សំណង់​។

ការ​តាំង​ពិព័រណ៍​នេះ​ត្រូវ​បាន​រៀប​ចំ​ឡើង​ដោយ​​ក្រុមហ៊ុន Yorkers Trade & Marketing Service Co., Ltd ដែល​រួម​សហ​ការ​ និង​ឧបត្ថម្ភ​ដោយ​នាយក​ដ្ឋាន​ជំរុញ​ពាណិជ្ជ​កម្ម​របស់​ក្រសួង​ពាណិជ្ជ​កម្ម​ សភាពាណិជ្ជ​កម្ម​កម្ពុជា​ (CCC) និង​សមា​គម​រោង​ចក្រ​​កាត់​ដេរ​នៅ​កម្ពុជា (GMAC)។

យោង​តាម​ទិន្នន័យ​បាន​ពី​​ក្រសួង​ពាណិជ្ជ​កម្ម​ ការ​នាំ​ចេញ​​សម្លៀក​បំពាក់ និង​វាយនភ័ណ្ឌ​សរុប​របស់​កម្ពុជា ​មាន​តម្លៃ ២,៧ ពាន់​លាន​ដុល្លារ​អាមេរិក​​នៅ​ឆមាស​ទី​១​ ធៀប​នឹង ​​២,៥ ​ពាន់​លាន​ដុល្លារ​អាមេរិក​​ក្នុង​រយៈ​ពេល​ដូច​គ្នា​​កាល​​ពីឆ្នាំ​មុន​ដែល​កើន​ឡើង​​ ៨​ ភាគ​រយ៕ ​PB

អត្ថបទគួរចាប់អារម្មណ៍