The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា​នឹង​ស្នើ​ប្រទេស​អ្នក​មាន​ពន្យារ​ការ​យក​ពន្ធ​




កម្ពុជា​នឹង​ស្នើ​ប្រទេស​អ្នក​មាន​ពន្យារ​ការ​យក​ពន្ធ​

កម្ពុជា​នឹង​ស្នើ​ប្រទេស​អ្នក​មាន​ពន្យារ​ការ​យក​ពន្ធ​

121126_11
អតិថិជនកំពុងអង្គុយរង់ចាំនៅកន្លែងទទួលព័ត៌មាននៅធនាគារអេស៊ីលីដា ធនាគារជាវិស័យសេវាកម្មមួយដ៏សំខាន់សម្រាប់សេដ្ឋកិច្ច ហេង ជីវ័ន

ភ្នំពេញៈ​ប្រទេស​កម្ពុជា​គ្រោង​នឹង​កៀរ​គរ​ប្រទេស​ដែល​មាន​ការ​អភិវឌ្ឍ​តិច​តួច​ (LDC) ទាំង​អស់​ដើម្បី​លើក​ជា​សំណើ​ដល់​ប្រទេស​អ្នក​មាន​ជា​សមាជិក​អង្គ​ការ​ពាណិជ្ជ​កម្ម​ពិភព​លោក ដើម្បី​ពន្យារ​ពេល​បន្ត​ទៀត​ចំពោះ​ការ​យក​ពន្ធ​លើ​វិស័យ​សេវាកម្ម​ដែល​នឹង​មក​ដល់​នៅ​ឆ្នាំ​២០១៣​។

ក្រុម​ប្រទេស LDC ដែល​នឹង​ទទួល​បាន​អត្ថ​ប្រយោជន៍​ជា​ច្រើន​ពី​សន្ធិ​សញ្ញា​ពាណិជ្ជកម្ម​នាំ​ចេញ ដោយ​មាន​កូតា​សេរី​និង​មិន​យក​ពន្ធ​ពី​សមាជិក​ប្រទេស​អ្នក​មាន នឹង​ត្រូវ​បើក​ចំហ​ឧស្សាហកម្ម​សេវា​កម្ម​របស់​ខ្លួន ដល់​ប្រទេស​អ្នក​មាន​ទាំង​អស់ នៅ​២០១៣​។

ទោះ​យ៉ាង​នេះ​ក្តី​រដ្ឋ​មន្ត្រី​ក្រសួង​ពាណិជ្ជកម្ម​ប្រទេស​កម្ពុជា​បាន​អះ​អាង​ថា សមា​ជិក​LDC ស្ទើរ​តែ​ទាំង​អស់​មិន​ទាន់​ត្រៀម​ខ្លួន​នៅ​ឡើយ​ទេ ដូច្នេះ​ប្រទេស​ទាំង​នោះ​ចាំ​បាច់​ត្រូវ​ស្នើ​សុំ​ការ​ពន្យារ​ពេល​បន្ថែម​។

បច្ចុប្បន្ន​ប្រទេស​LDC មាន​ចំនួន​៤៨​ប្រទេស នៅ​ក្នុង​បញ្ជី​របស់​អង្គការ​សហ​ប្រជាជាតិ ក្នុង​នោះ​៣៣​ប្រទេស បាន​ចូល​ជា​សមា​ជិក​របស់​អង្គការ​ពាណិជ្ជ​កម្ម​ពិភព​លោក​ហើយ​។

លោក ចម ប្រសិទ្ធ រដ្ឋមន្ត្រី​ក្រសួង​ពាណិជ្ជកម្ម​កម្ពុជា​បាន​មាន​ប្រសាសន៍​ថា៖ «​ចាប់​ពី​ឆ្នាំ​២០១៣​ទៅ យើង​ដែល​ជា​សមាជិក LDC នឹង​បើក​ចំហ​ឧស្សាហកម្ម​សេវា​កម្ពុជា ដល់​ប្រទេស​អ្នក​មាន ខណៈ​សមាជិក​របស់​យើង​ជា​ច្រើន មិន​ទាន់​បើក​នៅ​ឡើយ​ទេ។ ដូច្នេះ យើង​[កម្ពុជា​]​នឹង​ក្លាយ​ទៅ​ជា​អ្នក​ផ្តួច​ផ្តើម​ប្រមូល​ផ្តុំ​LDC ទាំង​អស់ ដើម្បី​ស្នើ​សុំ WTO ឲ្យ​ពន្យារ​ពេល​បន្ថែម​ទៀត ដល់​យើង​»។

លោក​បាន​ឲ្យ​ដឹង​ទៀត​ថា លោក​បាន​ពិភា​ក្សា​អំពី​បញ្ហា​នេះ ជាមួយ​អគ្គ​នាយក WTO​ក្នុង​អំឡុង​បេសកកម្ម​របស់​លោក នៅ​ក្នុង​ជំនួប​កំពូល​អាស៊ាន​លើក​ទី​២១ នៅ​រាជ​ធានី​ភ្នំពេញ កាល​ពី​ដើម​សប្តាហ៍​មុន​។

លោក​បាន​បន្ថែម​ថា លោក​បាន​ទទួល​ភ្លើង​ខៀវ​ឲ្យ​ចាប់​ផ្តើម​ការ​ងារ​នេះ​ដោយ​ប្រមូល​ផ្តុំ LDC ទាំង​អស់​ដើម្បី​ទទួល​សំឡេង​រួម​មួយ​ទាម​ទារ​ដល់​សមា​ជិក​ប្រទេស​អ្នក​មាន​ឲ្យ​ពន្យារ​ពេល​ដំណើរ​ការ​នេះ។

លោក​Hiroshi SUZUKI ប្រធាន​នាយក​ប្រតិបត្តិ និង​ជា​ប្រធាន​សេដ្ឋវិទូ​ប្រចាំ​វិទ្យា​ស្ថាន​ស្រាវ​ជ្រាវ​ពាណិជ្ជកម្ម​កម្ពុជា​បាន​ឲ្យ​ដឹង​ថា កម្ពុជា​នឹង​មិន​ទទួល​រង​ផល​ប៉ះ​ពាល់​ដោយ​សារ​ការ​កំណត់​នេះ​ឡើយ។

លោក​ថ្លែង​ថា ប្រទេស​នេះ បាន​បើក​ចំហ​វា​រួច​ទៅ​ហើយ ដោយ​ទាក់​ទាញ​ការ​វិនិយោគ​ផ្ទាល់​ពី​បរទេស​ជា​ច្រើន មក​ក្នុង​វិស័យ​សេវាកម្ម ប៉ុន្តែ​LDC មួយ​ចំនួន ដែល​មិន​ទាន់​បាន​បើក​និង​ជួប​បញ្ហា​។ លោក​បាន​បន្ថែម​ថា៖

«​កម្ពុជា មាន​សេដ្ឋ​កិច្ច​បើក​ចំហ។ ប្រទេស​នេះ អនុ​ញ្ញាត​ឲ្យ​មាន​ការ​វិនិយោគ​បរទេស​១០០​ភាគ​រយ មក​ក្នុង​វិស័យ​ស្ទើរ​តែ​ទាំង​អស់ រួម​មាន​ទាំង​វិស័យ​សេវាកម្ម ដូច​ជា​វិស័យ​ធនាគារ លក់​រាយ និង​វិស័យ​ទេសចរណ៍​។​កម្ពុជា បាន​ទទួល​ជោគ​ជ័យ​យ៉ាង​ខ្លាំង​ក្នុង​ការ​ទាក់​ទាញ FDI ឲ្យ​មក​ក្នុង​វិស័យ​សេវាកម្ម​ទាំង​នេះ​»។

លោក Hiroshi SUZUKI បាន​បញ្ជាក់​ទៀត​ថា៖ «ធនាគារ​បរទេស​ជា​ច្រើន បាន​ទទួល​អត្ថ​ប្រយោជន៍​នៅ​កម្ពុជា។ ក្រុម​ហ៊ុន AEON របស់​ជប៉ុន នឹង​បើក​ហាង​ដំបូង​របស់​ខ្លួន​នៅ​រាជ​ធានី​ភ្នំពេញ។

FDIទាំង​អស់​នឹង​ជួយ​ធ្វើ​ឲ្យ​សេដ្ឋកិច្ច​កម្ពុជា​មាន​កំណើន និង​ពង្រឹង​ការ​ប្រកួត​ប្រជែង​របស់​ប្រទេស​កម្ពុជា»។

លោក​បាន​បន្ថែម​ថា៖ «ចិន វៀត​ណាម និង​ប្រទេស​មិន​សូវ​មាន​ការ​អភិវឌ្ឍ​ផ្សេង​ៗ​ទៀត មិន​អនុញ្ញាត​ឲ្យ​មាន FDI នៅ​ក្នុង​វិស័យ​សេវាកម្ម​ឡើយ។ ការ​ធ្វើ​ដូច្នេះ គឺ​ដើម្បី​ការ​ពារ​ក្រុម​ហ៊ុន​ក្នុង​ស្រុក​។ ប្រសិន​បើ​ក្រុម​ហ៊ុន​ក្នុង​ស្រុក​ទន់​ខ្សោយ​ក្នុង​វិស័យ​សេវាកម្ម ពួក​គេ នឹង​បន្ធូរ​បន្ថយ​ឲ្យ​មាន FDI»។

គិត​ត្រឹម​ខែ​សីហា ឆ្នាំ​២០១២ WTO មាន​១៥៧​សមាជិក ហើយ​ប្រទេស​កម្ពុជា បាន​ក្លាយ​ជា​សមាជិក​របស់​អង្គ​ការ​នេះ នៅ​ខែ​តុលា ឆ្នាំ​២០០៤៕ CS

អត្ថបទគួរចាប់អារម្មណ៍