The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​សម្រេច​បាន​អត្រា​អតិផរណា​ទាប​ក្នុង​ឆ្នាំ ២០១៣

កម្ពុជា​សម្រេច​បាន​អត្រា​អតិផរណា​ទាប​ក្នុង​ឆ្នាំ ២០១៣

កម្ពុជា​សម្រេច​បាន​អត្រា​អតិផរណា​ទាប​ក្នុង​ឆ្នាំ ២០១៣

140121_11a
140121_11a

ភ្នំពេញ: កម្ពុជា​ទទួល​រង​នូវ​អត្រា​អតិផរណា​យ៉ាង​ទាប​ប្រចាំ​ឆ្នាំ​ប្រហែល ៤ ភាគរយ កាល​ពី​ឆ្នាំ ២០១៣។ មន្ដ្រី​និង​សេដ្ឋវិទូ​បាន​និយាយ​ថា អត្រា​នេះ​ឆ្លុះ​បញ្ចាំង​ពី​ស្ថានភាព​ល្អ​ប្រសើរ​នៃ​ម៉ាក្រូ​សេដ្ឋកិច្ច​និង បរិយាកាស​ពាណិជ្ជកម្ម ទោះ​បី​ជា​មាន​បញ្ហា​មួយ​ចំនួន​បាន​កើត​ឡើង​ក្នុង​ឆ្នាំ​នេះ​ក៏​ដោយ។

យោង​តាម​ទិន្នន័យ​ចេញ​ផ្សាយ​ដោយ​ធនាគារ​ជាតិ​នៃ​កម្ពុជា បាន​បង្ហាញ​ថា អត្រា​អតិផរណា​គឺ​ក្នុង​កម្រិត ៤ ភាគរយ​កាល​ពី​ឆ្នាំ ២០១៣ បាន​កើន​ពី ៣ ភាគរយ​កាល​ពី​ឆ្នាំ ២០១២។ អត្រា​នេះ​គឺ​វា​ស្រប​នឹង​ការ​ព្យាករ​ដោយ​គ្រឹះស្ថាន​ហិរញ្ញវត្ថុ​អន្តរជាតិ​មួយ​ចំនួន​ផ្សេង​ទៀត។

លោក ស៊ីម លី មន្ដ្រី​នៅ វិទ្យាស្ថាន​ស្ថិតិ​បាន​ថ្លែង​ថា​អត្រា​អតិផរណា គឺ​អាច​ទទួល​យក​បាន​ស្រប​នឹង​សកម្មភាព​សេដ្ឋកិច្ច​ដែល​បាន​អនុវត្ត​កន្លង​មក ទោះ​បី​ជា​ផលិតផល​បាន​នាំ​ចូល​មួយ​ចំនួន​បាន​កើន​ឡើង​នៅ​ក្នុង​រយៈ​ពេល​ប៉ុន្មាន​ខែ​មុន​នេះ​ក៏​ដោយ បន្ទាប់​ពី​រដ្ឋាភិបាល​កំពុង​រឹត​បន្តឹង​ពន្ធ​គយ។

លោក​បន្ត​ថា៖ «នេះ​គ្រាន់​តែ​ជា​ការ​ព្យាករ​របស់​ធនាគារ​ជាតិ​តែ​ប៉ុណ្ណោះ បើ​យោង​តាម​តួលេខ​របស់​យើង​ប្រចាំ​ខែ​គឺ​វា​ក្នុង​រង្វង់ ៤ ភាគរយ​ធៀប ១២ខែ ដូច្នេះ​អត្រា​ប្រចាំ​ឆ្នាំ​គឺ​អាច​តិច​ជាង ៤ ភាគរយ។ ទោះ​ជា​យ៉ាង​ណា​យើង​មាន​អត្រា​អតិផរណា​ដែល​អាច​គ្រប់​គ្រង​បាន​ដូច្នេះ គឺ​វា ល្អ​សម្រាប់​សេដ្ឋកិច្ច។ ហេតុ​អ្វី​ក៏​យើង​មាន​អត្រា​ទាប? វា​គឺ​ដោយ​សារ​តែ​តម្លៃ​ផលិតផល​មួយ​ចំនួន​កើន​ឡើង​តាម​រដូវកាល។ ដោយ​ឡែក​ប្រេង​សាំង (ដែល​ជា​មូលហេតុ​ដ៏​ធំ​ក្នុង​ការ​ធ្វើ​ឲ្យ​កើន​ឡើង​តម្លៃ​នេះ) តម្លៃ​មាន​ការ​ប្រែប្រួល​បន្តិច​បន្តួច ដូច្នេះ​វា​មិន​មាន​ផល​ប៉ះពាល់​ទេ»។

លោក​លើក​ឡើង​ថា៖ «ប៉ុន្តែ ប្រសិន​បើ​យើង​មាន​អត្រា​អតិផរណា​លើស​ពី ៥ ភាគរយ នោះ​ទើប​ជា​បញ្ហា»។

កាល​ពី​ចុង​ខែ តុលា ឆ្នាំ​មុន​រដ្ឋាភិបាល​បាន​កំណត់​ពេល​វេលា​រយៈ​ពេល ៦០ ថ្ងៃ​សម្រាប់​អគ្គ​នាយក គយ​និង​រដ្ឋាករ​ក្នុង​ការ​សម្អាត​អំពើ​ពុករលួយ​នៅ​ក្នុង​ស្ថាប័ន​នេះ។ បញ្ហា​នោះ​ជំរុញ​ឲ្យ​តម្លៃ​ផលិតផល​នាំ​ចូល​មួយ​ចំនួន​កើន​ឡើង។

លោក ស៊ីម លី បាន​ទទួល​ស្គាល់​ពី​ផល​ប៉ះពាល់​តម្លៃ​របស់​ទំនិញ​នាំ​ចូល​មួយ​ចំនួន។ លោក​បញ្ជាក់​ថា៖ «ផលិតផល​មួយ​ចំនួន​បាន​កើន​ឡើង ជា​ពិសេស​ឧស្ម័ន​ចម្អិន​អាហារ​គឺ​មាន​ការ​កើន​ឡើង​ខ្ពស់​ចាប់​តាំង​ពី​ខែ ធ្នូ កាល​ពី​ឆ្នាំ​មុន​មក​ម៉្លេះ»។

លោក Peter Brimble នាយក​រង​ប្រចាំ​ប្រទេស​របស់​ធនាគារ​អភិវឌ្ឍន៍​អាស៊ី​នៅ​កម្ពុជា បាន​ប្រាប់ ភ្នំពេញ ប៉ុស្ដិ៍ កាល​ពី​ចុង​ខែ ធ្នូ ថា បន្ទាប់​ពី​មាន​សារាចរ​ណែនាំ​របស់​រដ្ឋាភិបាល​កាល​ពី​ខែ វិច្ឆិកា ដើម្បី ពង្រឹង​តម្លៃ​ពន្ធ​ស្រប​ច្បាប់​លើ​ទំនិញ​នាំ​ចូល​ដែល​បណ្ដាល​ឲ្យ​សម្ពាធ​អតិផរណា​បាន​ធ្វើ​ឲ្យ​មាន​ការ​ប្រែ​ប្រួល​នៃ​អត្រា​អតិផរណា​កាល​ពី​ខែ ធ្នូ ឆ្នាំ ២០១៣ កើន​ឡើង​ពី ២,៥ ភាគរយ​ដល់ ៣,៥ ភាគរយ​ជា​មធ្យម និង​ពី ៣,៥ ភាគរយ​ដល់ ៤,៥ ភាគរយ​ក្នុង​ឆ្នាំ ២០១៤។

ធនាគារ​ជាតិ​កម្ពុជា (NBC) បាន​និយាយ​នៅ​ក្នុង​របាយ​ការណ៍​ប្រចាំ​ឆ្នាំ ២០១៣ របស់​ខ្លួន​ថា កំណើន​សេដ្ឋកិច្ច​របស់​ប្រទេស​កម្ពុជា​សម្រេច​បាន​កម្រិត ៧ ភាគរយ​កាល​ពី​ឆ្នាំ​មុន ខណៈ​ដែល​ការ​ព្យាករ​របស់​ធនាគារ​អភិវឌ្ឍន៍​អាស៊ី​បាន​មើល​ឃើញ​ថា កំណើន​សេដ្ឋកិច្ច​របស់​កម្ពុជា​ស្ថិត​ក្នុង​កម្រិត​ពី ៧,២ ភាគរយ​កាល​ពី​ឆ្នាំ ២០១៣ ដល់ ៧,៥ ភាគរយ​ក្នុង​ឆ្នាំ ២០១៤ ដោយ​សារ​តែ​ការ​ស្ទុះ​ងើប​ឡើង​វិញ​នៅ​បណ្ដា​ប្រទេស​ក្នុង​សហគមន៍​អឺរ៉ុប និង​អាមេរិក ហើយ​វិស័យ​ដែល​ជំរុញ​ដល់​កំណើន​សេដ្ឋកិច្ច​របស់​កម្ពុជា​មាន​វិស័យ​កសិកម្ម សម្លៀក​បំពាក់ និង​ដំណើរការ​ល្អ​របស់​វិស័យ​ទេសចរណ៍៕ B.P

អត្ថបទគួរចាប់អារម្មណ៍