.jpg)
លោក ស៊ាង ថៃ អ្នកនាំពាក្យក្រសួងពាណិជ្ជកម្ម ថ្លែងនាពេលកន្លងមក។ រូបថត សហការី
ភ្នំពេញៈ កម្ពុជា-កូរ៉េខាងត្បូងនឹងចាប់ផ្តើមធ្វើការចរចាលើកិច្ចព្រមព្រៀងពាណិជ្ជកម្មសេរីទ្វេភាគីជុំទី ១ នៅថ្ងៃនេះ (ព្រហស្បតិ៍) ដែលជាការបោះជំហានថ្មីមួយទៀតរបស់កម្ពុជានៅក្នុងការធ្វើពិពិធកម្មផលិតផលនាំចេញរបស់ខ្លួន បន្ទាប់ពីការចរចាពាណិជ្ជកម្មសេរីទ្វេភាគីជាមួយប្រទេសចិនទើបត្រូវបានបញ្ចប់កាលពីពេលថ្មីៗនេះ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃពុធថា ការចរចាលើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េខាងត្បូងជុំទី ១ នឹងចាប់ផ្តើមនៅថ្ងៃព្រហស្បតិ៍នេះ តាមរយៈវីដេអូខន់ ហ្វើរ៉ិន។
លោកថ្លែងថា៖ «យើងចង់ធ្វើកិច្ចព្រមព្រៀងពាណិជ្ជកម្មសេរីជាមួយប្រទេសជាច្រើន ប៉ុន្តែលទ្ធភាពយើងត្រូវជ្រើសរើសប្រទេសណាដែលមានសក្តានុពលអាចផ្តល់ផលចំណេញដល់សេដ្ឋកិច្ចច្រើនឲ្យគ្នាទៅវិញទៅមក ដូច្នេះយើងបានចាប់ផ្តើមចរចាកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េជាមុន»។
ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីកាលពីថ្ងៃអង្គារលោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានអះអាងថា ក្រុមការងារក្រសួងពាណិជ្ជកម្មនឹងព្យាយាមបញ្ចប់ការចរចាជាមួយកូរ៉េខាងត្បូងក្នុងក្របខ័ណ្ឌបច្ចេកទេសនៅចុងឆ្នាំនេះ ហើយអាចឈានដល់ការចុះហត្ថលេខាលើកិច្ចព្រមព្រៀងនៅដើមឆ្នាំក្រោយ។
លោកថ្លែងថា៖ «ចំពោះកូរ៉េយើងបានប្រកាសរួចហើយក្នុងខែកក្កដានេះ។ ក្រុមការងារនឹងចរចាឲ្យចប់ផ្នែកសំខាន់ៗនៅចុងឆ្នាំនេះ។ រដ្ឋាភិបាលទាំង ២ មើលឃើញថា វាផ្តល់ផលប្រយោជន៍ឲ្យគ្នាទៅវិញទៅមក»។
លោកបន្តថា ក្រៅពីកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េ រដ្ឋាភិបាលកម្ពុជាក៏កំពុងសម្លឹងមើលពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីជាមួយប្រទេសឥណ្ឌា អូស្ត្រាលី នូវែលសេឡង់ អាមេរិក កាណាដា ចក្រភពអង់គ្លេស និងជប៉ុនផងដែរ។
លោកបញ្ជាក់ថា៖ «មហិច្ឆតារបស់យើងមិនមែនតែជាមួយចិនប៉ុណ្ណោះទេ បើសិនចក្រភពអង់គ្លេសបែកចេញពីសហភាពអឺរ៉ុបជាផ្លូវការ យើងក៏ពិនិត្យមើលអង់គ្លេសដែរ យើងបាននាំចេញទៅអឺរ៉ុប ២៥ ភាគរយក្នុង ១ ឆ្នាំ ដូច្នេះមិនមែនតូចទេទីផ្សារអង់គ្លេសធំណាស់»។
លោក Shin Jongsoo អគ្គនាយកទីភ្នាក់ងារជំរុញពាណិជ្ជកម្ម និងការវិនិយោគកូរ៉េ (KOTRA) ប្រចាំកម្ពុជាទើបតែងតាំងថ្មីបានឲ្យដឹងនៅក្នុងជំនួបជាមួយលោក ងួន ម៉េងតិច អគ្គនាយកសភាពាណិជ្ជកម្មកម្ពុជាកាលពីថ្ងៃចន្ទថា ស្ថាប័នលោកនឹងជួយជំរុញបន្ថែមទៀតលើការចរចានៃកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ។
លោកបានបន្តថា ដោយមានទំនាក់ទំនងដ៏រឹងមាំរវាងកម្ពុជា និងសាធារណរដ្ឋកូរ៉េលើគ្រប់វិស័យ ពិសេសវិស័យពាណិជ្ជកម្មដែលកើនឡើងជាលំដាប់នោះ ភាគីទាំង ២ នឹងជួយជំរុញទំហំពាណិជ្ជកម្ម និងលើកកម្ពស់ទំនាក់ទំនងធុរកិច្ច និងវិនិយោគជាមួយគ្នាបន្ថែមទៀត។ នេះបើតាមសេចក្តីប្រកាសព័ត៌មានរបស់សភាពាណិជ្ជកម្មកម្ពុជា។
លោកថ្លែងថា៖ «យើងនឹងសហការគ្នាក្នុងការជំរុញឲ្យមានការចុះកិច្ចព្រមព្រៀងពាណិជ្ជកម្មសេរីកម្ពុជា-កូរ៉េឲ្យស្របទៅតាមគោលនយោបាយពាណិជ្ជកម្មប្រទេសទាំង ២»។
លោក ងួន ម៉េងតិច បានឲ្យដឹងថា កិច្ចព្រមព្រៀងពាណិជ្ជកម្មសេរីទ្វេភាគីនេះនឹងជួយសម្រួលការធ្វើពាណិជ្ជកម្មឲ្យកាន់តែទូលំទូលាយ ហើយវាក៏នឹងជួយជ្រោមជ្រែងដល់អ្នកនាំចេញ និងនាំចូលរវាងប្រទេសទាំង ២ ឲ្យកាន់តែប្រសើរថែមទៀតតាមរយៈការផ្តល់ទីផ្សារដៃគូ និងការបន្ថយរបាំងពាណិជ្ជកម្ម។
លោកនិយាយថា៖ «ខ្ញុំសង្ឃឹមថាការចរចាលើកិច្ចព្រមព្រៀងនេះនឹងទទួលបានលទ្ធផលផ្លែផ្កាក្នុងរយៈពេលដ៏ខ្លីខាងមុខ ដើម្បីជំរុញកំណើនសេដ្ឋកិច្ចនៃប្រទេសទាំង ២»។
ពាណិជ្ជកម្មទ្វេភាគីកម្ពុជា និងកូរ៉េខាងត្បូងសម្រេចបានជាង ១ ពាន់លានដុល្លារកាលពីឆ្នាំ ២០១៩ កើនជាង ៣៦ ភាគរយធៀបនឹង ៧៥៦ លានដុល្លារកាលពីឆ្នាំ ២០១៨។ នេះបើតាមការលើកឡើងរបស់លោកនាយករដ្ឋមន្ដ្រី ហ៊ុន សែន ក្នុងជំនួបជាមួយពលករកម្ពុជានៅកូរ៉េកាលពីខែកុម្ភៈ៕LA
