.jpg)
ផលិតផលកម្ពុជាកាន់តែច្រើននឹងមានលទ្ធភាពចូលទីផ្សារកូរ៉េ និងចិន។ ហេង ជីវ័ន
ភ្នំពេញ៖ ប្រទេសកម្ពុជា-កូរ៉េខាងត្បូង បានបញ្ចប់ការចរចានៃកិច្ចព្រមព្រៀងពាណិជ្ជកម្មសេរី (FTA) ទ្វេភាគីជុំទី៣ ដោយរំពឹងថានឹងជួយបង្កើនពាណិជ្ជកម្មនិងវិនិយោគទ្វេភាគីបន្ថែមទៀតនៅពេលកិច្ចព្រមព្រៀងនេះចូលជាធរមាន ខណៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិននឹងចុះហត្ថលេខាថ្ងៃនេះ។
កិច្ចព្រមព្រៀងនេះធ្វើឡើងក្នុងគោលបំណង ដើម្បីធ្វើឱ្យកាន់តែប្រសើរឡើងនៃផលិតផលរបស់ភាគីទាំង ២ ចូលទៅក្នុងទីផ្សារគ្នាទៅវិញទៅមកតាមរយៈការកាត់បន្ថយរបាំងពន្ធគយ និងរបាំងមិនមែនពន្ធគយ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា ការចរចាកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងកូរ៉េខាងត្បូងក្នុងជុំទី៣ ត្រូវបានបញ្ចប់ហើយកាលពីថ្ងៃទី ៨ ខែ តុលា ប្រកបដោយផ្លែផ្កា។
លោកបន្តថា ភាគីទាំង ២ បានបន្តចរចាគ្នាលើការបើកច្រកទីផ្សារ និងលើអត្ថបទកិច្ចព្រមព្រៀងទាំងមូលដែលគ្របដណ្ដប់លើជំពូកស្ដីពីកិច្ចសហប្រតិបត្តិការ សេដ្ឋកិច្ច ពាណិជ្ជកម្មផ្នែកទំនិញ វិធានប្រភពដើមទំនិញ វិធានជាក់លាក់សម្រាប់ផលិតផល បែបបទគយ និងកិច្ចសម្រួលពាណិជ្ជកម្ម និងបញ្ហាច្បាប់ និងស្ថាប័ន។
លោកថ្លែងថា៖ «ការចរចាលើជំពូកនីមួយៗ បានទទួលលទ្ធផលផ្សេងៗគ្នា ក្នុងនោះ ជំពូកស្តីពីកិច្ចសហប្រតិបត្តិការសេដ្ឋកិច្ច និងវិធានជាក់លាក់សម្រាប់ផលិតផលត្រូវបានបញ្ចប់ទាំងស្រុង»។
លោក Park Heung-kyeong ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជាបានថ្លែងសុន្ទរកថាក្នុងទិវាមូលនិធិជាតិកូរ៉េ កាលពីថ្ងៃទី ៦ ខែតុលា ត្រូវបានស្រង់សម្ដីដោយទីភ្នាក់ងារសារព័ត៌មានកម្ពុជាថា កិច្ចព្រមព្រៀងនេះនឹងជួយបង្កើនពាណិជ្ជកម្មទ្វេភាគី និងជំរុញវិនិយោគិនកូរ៉េមកវិនិយោគនៅកម្ពុជាបន្ថែមទៀត។
លោកថ្លែងថា៖ «នៅពេលដែលការចរចារវាងប្រទេសទាំង ២ ត្រូវបានបញ្ចប់ដោយជោគជ័យ យើងរំពឹងថានឹងមានការកើនឡើងទំហំពាណិជ្ជកម្ម និងការវិនិយោគទ្វេភាគី»។
លោកបានថ្លែងបន្តទៀតថា ចាប់តាំងពីការបង្កើតទំនាក់ទំនងការទូតរវាងប្រទេសទាំង ២ នៅក្នុងឆ្នាំ ១៩៩៧ ទំហំពាណិជ្ជកម្មទ្វេភាគីបានកើនឡើង ១៩ ដង កើនពី ៥៤ លានដុល្លារ រហូតដល់ ១ ពាន់លានដុល្លារ កាលពីឆ្នាំមុន។
ក្រុមហ៊ុនកូរ៉េបានឈរនៅលំដាប់ទី២ នៃការបោះទុនវិនិយោគនៅកម្ពុជាដោយមានក្រុមហ៊ុនជាង ២០០ កំពុងប្រតិបត្តិការអាជីវកម្មរបស់ខ្លួនយ៉ាងសកម្មនៅក្នុងវិស័យឧស្សាហកម្មកាត់ដេរ កសិកម្ម និងហិរញ្ញវត្ថុជាដើម។
លោកឯកអគ្គរដ្ឋទូតកូរ៉េរូបនេះបានថ្លែងបន្តទៀតថា៖ «ក្នុងនាមជាដៃគូល្អដែលផ្តល់ប្រយោជន៍ឱ្យគ្នាទៅវិញទៅមកប្រទេសកូរ៉េ នឹងបន្តជំរុញពាណិជ្ជកម្មវិនិយោគបន្ថែមទៀត»។
ពាណិជ្ជកម្មទ្វេភាគីកម្ពុជា និងកូរ៉េខាងត្បូងសម្រេចបានជាង ១ ពាន់លានដុល្លារ កាលពីឆ្នាំ ២០១៩ កើនជាង ៣៦ ភាគរយ បើធៀបនឹង ៧៥៦ លានដុល្លារ កាលពីឆ្នាំ ២០១៨។ នេះបើតាមលោកនាយករដ្ឋមន្ត្រី ហ៊ុន សែន ក្នុងជំនួបជាមួយពលករកម្ពុជានៅកូរ៉េកាលពីខែកុម្ភៈ៕
