.jpg)
ប្រធានាធិបតីកូរ៉េខាងត្បូង Moon Jae-in ទៅទស្សនាប្រាសាទអង្គរវត្ត ក្នុងដំណើរទស្សនកិច្ចរយៈពេលបីថ្ងៃមកកម្ពុជា។ AFP
ភ្នំពេញៈ រដ្ឋាភិបាលកម្ពុជា និងកូរ៉េខាងត្បូង បានឯកភាពគ្នាជំរុញការចុះកិច្ចព្រមព្រៀងពីការផ្តល់ជំនួយផ្លូវច្បាប់ទៅវិញទៅមក និងការចៀសវាងការយកពន្ធត្រួតគ្នាបន្ថែមលើកិច្ចព្រមព្រៀងលើឯកសារចំនួន ៧ ដែលបានសម្រេចក្នុងអំឡុងទស្សនកិច្ចរបស់ប្រធានាធិបតីកូរ៉េនៅកម្ពុជាកាលពីសប្តាហ៍មុន។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកាលពីម្សិលមិញ។
ប្រធានាធិបតីកូរ៉េខាងត្បូង Moon Jae-in បានធ្វើដំណើរទស្សនកិច្ចមកកាន់ប្រទេស កម្ពុជា ចាប់ពីថ្ងៃទី ១៤ ដល់ថ្ងៃទី ១៦ ខែមីនា និងបានជួបលោកនាយករដ្ឋមន្ដ្រី ហ៊ុន សែន ដែលមេដឹកនាំទាំង ២ សម្រេចបានមូលដ្ឋានរួមលើវិស័យផ្សេងៗនៃកិច្ចសហប្រតិបត្តិការ ដែលរួមមានពាណិជ្ជកម្ម និងការវិនិយោគ កសិកម្ម ហិរញ្ញវត្ថុ ហេដ្ឋារចនាសម្ព័ន្ធ ឧស្សាហកម្ម និងកិច្ចសហប្រតិបត្តិការអភិវឌ្ឍន៍។ មេដឹកនាំទាំង ២ បានយល់ព្រមក្នុងការលើកកម្ពស់ពាណិជ្ជកម្មទ្វេភាគីបន្ថែមទៀត តាមរយៈការបង្កើនលទ្ធភាពចូលទីផ្សារសម្រាប់ផលិតផលរបស់កម្ពុជា ជាពិសេសផលិតផលកសិកម្ម។
ថា្នក់ដឹកនាំទាំង ២ បានគូសបញ្ជាក់ពីសារៈសំខាន់នៃការបង្កើតបរិយាកាសវិនិយោគឲ្យកាន់តែមានលក្ខណៈ អំណោយផលថែមទៀតដើម្បីទាក់ទាញវិនិយោគិនពីកូរ៉េឲ្យបានកាន់តែច្រើននៅលើវិស័យជាច្រើនស្របតាមគោលនយោបាយជំរុញពិពិធកម្មសេដ្ឋកិច្ច និងអភិវឌ្ឍឧស្សាហកម្មរបស់កម្ពុជា។
ឯកសារកិច្ចព្រមព្រៀង ៧ រួមមានការរៀបចំក្របខ័ណ្ឌការងារស្ដីពីកម្ចី សម្រាប់ឆ្នាំ ២០១៩-២០២៣ កិច្ចព្រមព្រៀងកម្ចី ២ ផ្សេងទៀត សម្រាប់វិទ្យាសាស្ដ្រសុខាភិបាល និងការអភិវឌ្ឍផ្លូវថ្នល់ជនបទ៕LA
