.jpg)
បង្គោលអគ្គិសនី ក្នុងរាជធានីភ្នំពេញ នាពេលកន្លងមក។ ប្រទេស កម្ពុជា កំពុងចរចាដើម្បីនាំចូលនាវាថាមពលអគ្គិសនីពីតួកគី។ ហេង ជីវ័ន
ភ្នំពេញៈ ប្រទេស កម្ពុជា កំពុងស្ថិតក្នុងការចរចាដើម្បីនាំចូលនាវាថាមពលអគ្គិសនី ២០០ មេហ្គាវ៉ាត់របស់ប្រទេស តួកគី ដើម្បីបំពេញតម្រូវការអគ្គិសនីដែលកំពុងខ្វះខាតរបស់ប្រទេស កម្ពុជា។ នេះបើតាមលោកនាយករដ្ឋមន្ដ្រី ហ៊ុន សែន។
ថ្លែងទៅកាន់កម្មកររោងចក្រកាត់ដេរ នៅខេត្តពោធិ៍សាត់ កាលពីម្សិលមិញ លោកនាយករដ្ឋមន្ដ្រី ហ៊ុន សែន បានឲ្យដឹងថា អគ្គនាយកអគ្គិសនីកម្ពុជា (EDC) នឹងធ្វើដំណើរទៅប្រទេស តួកគី ដើម្បីការចរចានាំចូលនាវាថាមពលអគ្គិសនី កម្លាំង ២០០ មេហ្គាវ៉ាត់របស់ប្រទេស តួកគី មកកម្ពុជាសម្រាប់ផ្គត់ផ្គង់តម្រូវការទីក្រុង។
លោកថ្លែងថា៖ «លោក កែវ រតនៈ នឹងធ្វើដំណើរជាបន្ទាន់ទៅប្រទេស តួកគី ដើម្បីនាំយក [នាវាថាមពល] ២០០ មេហ្គាវ៉ាត់សម្រាប់ការផ្គត់ផ្គង់»។
លោកបន្តថា៖ «ប្រសិនបើឯកភាពគ្នាលើតម្លៃហើយយើងនឹងនាំចូលមកដើម្បីផ្គត់ផ្គង់តម្រូវការទីក្រុងភ្នំពេញ សម្រាប់រយៈពេល ២-៣ ឆ្នាំសិន»។
លោកនាយករដ្ឋមន្ដ្រី ហ៊ុន សែន កាលពីសប្ដាហ៍មុន បានអំពាវនាវឲ្យសាធារណជន និងម្ចាស់ក្រុមហ៊ុន ប្រើប្រាស់ម៉ាស៊ីនភ្លើងផ្ទាល់ខ្លួនរបស់ពួកគេជាបណ្ដោះអាសន្ន ដោយសារតែអគ្គិសនីកម្ពុជា មិនអាចផលិតថាមពលអគ្គិសនីគ្រប់គ្រាន់ ដើម្បីឆ្លើយតបតាមតម្រូវការ។
លោកឲ្យដឹងទៀតថា តម្រូវការអគ្គិសនីត្រូវបានកើនឡើង ដោយសារតែកំណើនវិស័យសំណង់នៅក្នុងប្រទេស កម្ពុជា។
កម្ពុជា គ្រោងនឹងបង្កើនការផ្គត់ផ្គង់ថាមពលអគ្គិសនីដល់ ២ ៨៧០,៦៥ មេហ្គាវ៉ាត់នៅឆ្នាំនេះ កើនឡើងពី ២ ៦៥០,២៦មេហ្គាវ៉ាត់កាលពីឆ្នាំមុន។ នេះបើតាមរបាយការណ៍ប្រចាំឆ្នាំ ២០១៨ របស់អាជ្ញាធរអគ្គិសនីកម្ពុជា (EAC)។
របាយការណ៍បង្ហាញថា កម្ពុជានឹងបន្តនាំចូលថាមពលពីបណ្ដាប្រទេសជិតខាងក្នុងទំហំដូចគ្នានឹងឆ្នាំនេះ និងឆ្នាំមុន ក្នុងទំហំ ៤៤២,៥០ មេហ្គាវ៉ាត់ ក្នុងនោះ ២៧៧ មេហ្គាវ៉ាត់នឹងត្រូវនាំចូលមកពីវៀតណាម ១៣៥,៥០ មេហ្គាវ៉ាត់ មកពីថៃ និង ៣០ មេហ្គាវ៉ាត់មកពីឡាវ។ ជាមួយនឹងផែនការនេះ រដ្ឋាភិបាលរំពឹងថា ការប្រើប្រាស់ថាមពលអគ្គិសនីនឹងកើនឡើងនៅឆ្នាំនេះដល់ ១០ ៨០៧,៧១ ជីហ្គាវ៉ាត់ម៉ោង ពី ៩ ៣០៧,៣៣ ជីហ្គាវ៉ាត់ម៉ោងនៅឆ្នាំ ២០១៨។
ការទិញថាមពលពីប្រទេស តួកគី នេះត្រូវបានលោកនាយករដ្ឋមន្ត្រីអះអាងថា នឹងមិនធ្វើឲ្យប៉ះពាល់ដល់តម្លៃប្រើប្រាស់ក្នុងស្រុកឡើយ។ លោកថ្លែងថា៖ «ទោះបីជាយើងទិញពីតួកគី ថ្លៃតិចមែន តែប្រជាពលរដ្ឋមិនទទួលផលប៉ះពាល់ដល់ថ្លៃភ្លើងទេ សូមបញ្ជាក់ជូនថា តម្លៃសម្រាប់ផលិតកម្ម ឧស្សាហកម្ម កសិកម្ម និងប្រជាពលរដ្ឋ មិនត្រូវទទួលផលប៉ះពាល់ [ដោយសារតម្លៃ] ទេ»។
កាលពីសប្ដាហ៍មុន EDC បានចុះកិច្ចព្រមព្រៀងក្នុងការនាំយកអគ្គិសនី ២០០ មេហ្គាវ៉ាត់បន្ថែមពីប្រទេស ឡាវ ដែលនឹងត្រូវផ្គត់ផ្គង់ចាប់ពីឆ្នាំ ២០២១។
លោក ជីវ ស៊ីវផេង អ្នកគ្រប់គ្រងទូទៅនៃសមាគមសំណង់កម្ពុជា ស្វាគមន៍ការនាំចូលនាវានេះ ហើយបានឯកភាពថាកំណើនក្នុងវិស័យសំណង់បានធ្វើឲ្យមានតម្រូវការប្រើប្រាស់ថាមពលកាន់តែច្រើន។ លោកថ្លែងថា៖ «នោះជាការពិត កំណើនសំណង់នឹងឆ្លុះបញ្ចាំងតម្រូវការអគ្គិសនី»។
លោកបន្តថា៖ «វាជាបញ្ហាប្រឈមសម្រាប់ពួកយើង ប្រសិនបើយើងខ្វះអគ្គិសនី EDC មានភារកិច្ចដើម្បីធ្វើគម្រោងត្រឹមត្រូវដើម្បីឆ្លើយតបនឹងកំណើនតម្រូវការ ដែលការនាំចូលដើម្បីលើកកម្ពស់ការអភិវឌ្ឍប្រទេស»៕ LA
