ក្នុងអំឡុងដំណើរទស្សនកិច្ចរបស់អ្នកសារព័ត៌មានអាស៊ានទៅកាន់ខេត្តអានហួយ ប្រទេសចិននៅដើមខែនេះអ្នកយកព័ត៌មានរបស់កាសែតភ្នំពេញ-ប៉ុស្ដិ៍ បានជួបសម្ភាសលោក Vithit Powattanasuk នាយកផ្នែកព័ត៌មាន និងទំនាក់ទំនងសាធារណៈនៅមជ្ឈមណ្ឌលអាស៊ាន-ចិន (ACC) មានមូលដ្ឋាននៅទីក្រុងប៉េកាំង ដើម្បីនិយាយអំពីសារៈសំខាន់របស់ប្រព័ន្ធផ្សព្វផ្សាយ និងរបៀបដែលប្រទេសកម្ពុជាទាញយកអត្ថប្រយោជន៍ពីទំនាក់ទំនងដ៏ជិតស្និទ្ធរវាងអាស៊ាន និងប្រទេសចិន។ សូមអញ្ជើញអានបទសម្ភាសទាំងស្រុងដូចខាងក្រោម ៖
១. តើ ACC ជាអ្វី? តើ ACC មានតួនាទីអ្វីខ្លះ?
ACC ជាអន្តរអង្គការមួយដែលបង្កើតឡើងដោយការព្រមព្រៀងរវាងប្រទេសទាំង ១១ គឺសមាជិកអាស៊ាន និងប្រទេសចិននៅឆ្នាំ ២០០៩។ នៅឆ្នាំ ២០១១ យើងបានចាប់ផ្ដើមប្រតិបត្តិការមជ្ឈមណ្ឌលនេះដែលមានមូលដ្ឋាននៅទីក្រុងប៉េកាំង។ មជ្ឈមណ្ឌលនេះរួមមានមន្ដ្រីមួយចំនួនមកពីប្រទេសចិន និងអាស៊ាន។
នៅពេលបច្ចុប្បន្នមានមន្ដ្រីអាស៊ាន ២ រូបដែលបានចាត់តាំងឲ្យធ្វើការងារនៅក្នុងមជ្ឈមណ្ឌលគឺរូបខ្ញុំដែលជាមន្ដ្រីមកពីក្រសួងការបរទេសរបស់ប្រទេសថៃដែលត្រូវបានចាត់តាំងជានាយកផ្នែកព័ត៌មាន និងទំនាក់ទំនងសាធារណៈ ហើយ ១ រូបទៀតមកពីក្រសួងទេសចរណ៍កម្ពុជា និងមាននាយក ២ នាក់ទៀតផងដែរមកពីភាគីចិនដែលទទួលបន្ទុកខាងពាណិជ្ជកម្ម វិនិយោគ និងកិច្ចការទូទៅ។
អង្គការនេះមានបំណងលើកកម្ពស់កិច្ចសហប្រតិបត្តិការជាក់ស្ដែងរវាងបណ្ដាប្រទេស អាស៊ាន និងប្រទេសចិន។ កិច្ចសហប្រតិបត្តិការជាក់ស្ដែងផ្ដោតលើទិដ្ឋភាព ៦ គឺពាណិជ្ជកម្ម ការវិនិយោគ ការអប់រំ វប្បធម៌ ទេសចរណ៍ និងប្រព័ន្ធផ្សព្វផ្សាយ និងព័ត៌មាន។ យើងសង្ឃឹមថាជាមួយនឹងទិដ្ឋភាពទាំងនេះអាស៊ាន និងចិននឹងមានទំនាក់ទំនងកាន់តែជិតស្និទ្ធ និងកាន់តែស៊ីជម្រៅថែមទៀតក្នុងពេលខាងមុខ។
២. តើអ្វីជាគោលបំណងនៃដំណើរទស្សនកិច្ចរបស់អ្នកសារព័ត៌មានអាស៊ានទៅកាន់ខេត្តអានហួយ? តើ ACC មានតួនាទីអ្វីក្នុងព្រឹត្តិការណ៍នេះ?
ACC ជាអ្នករៀបចំរួមគ្នាជាមួយអាជ្ញាធរខេត្តអានហួយ។ យើងគាំទ្រយ៉ាងពេញទំហឹងដល់គំនិតផ្ដួចផ្ដើមរបស់អាជ្ញាធរខេត្តអានហួយក្នុងការលើកកម្ពស់ទំនាក់ទំនងជាមួយអាស៊ីអាគ្នេយ៍ទៅកាន់ប្រព័ន្ធផ្សព្វផ្សាយ។ នេះគឺជាឆ្នាំទី ៤ ហើយដែលអាជ្ញាធរខេត្តអាហួយបានអញ្ជើញអ្នកសារព័ត៌មានមកពីអាស៊ានដើម្បីធ្វើទស្សនកិច្ចនៅខេត្តនេះ។
ដំណើរទស្សនកិច្ចនេះបង្ហាញភាពជោគជ័យសំខាន់ៗមួយចំនួនថា ទំនាក់ទំនងនេះកាន់តែប្រសើរឡើងហើយមានប្រតិបត្តិការពាណិជ្ជកម្ម និងការវិនិយោគកាន់តែច្រើន។ នោះជាមូលហេតុ ដែលអាជ្ញាធរខេត្តអានហួយនៅតែអញ្ជើញអ្នកសារព័ត៌មាន ដើម្បីផ្សព្វផ្សាយពីទីក្រុងជាច្រើនរបស់ខេត្តនេះជារៀងរាល់ឆ្នាំ។
៣. តើអាស៊ានគួរចម្លងតាមគំរូនេះដើម្បីផ្សព្វផ្សាយពីប្រទេសជាសមាជិកនីមួយៗរបស់ខ្លួនដែរឬទេ?
ពិតប្រាកដណាស់។ នោះគឺជាតម្រូវការដែលយើងត្រូវធ្វើ។ ហេតុអ្វីបានជាចិនព្យាយាមឲ្យប្រព័ន្ធផ្សព្វផ្សាយអាស៊ានយល់ដឹងកាន់តែច្រើនពីប្រទេសចិន? យើងគួរតែឆ្លៀតឱកាសឲ្យប្រព័ន្ធផ្សព្វផ្សាយចិនយល់ដឹងកាន់តែច្រើនពីអាស៊ានវិញផងដែរ។ វាមានសារៈសំខាន់សម្រាប់ភាគីទាំង ២ ដើម្បីរៀនសូត្រពីគ្នាទៅវិញទៅមកហើយវិធីដែលមានប្រសិទ្ធភាព និងឆាប់បំផុតនោះគឺការប្រើប្រាស់ប្រព័ន្ធផ្សព្វផ្សាយធ្វើជាស្ពានដើម្បីចម្លងការយល់ដឹងនេះ។
៤. តើអ្វីជាអត្ថប្រយោជន៍ដែលកម្ពុជានឹងទទួលបាន បើរាជរដ្ឋាភិបាលរៀបចំព្រឹត្តិការណ៍បែបនេះ?
នឹងមានការយល់ដឹងកាន់តែខ្លាំង។ ចិនគឺជាប្រទេសដ៏ធំមួយមានប្រជាជន ១,៤ ពាន់លាននាក់។ ពួកគេយល់ដឹងកាន់តែច្រើនពីកម្ពុជា អត្ថប្រយោជន៍នឹងមានកាន់តែច្រើនដល់កម្ពុជា។ បើពួកគេមិនស្គាល់កម្ពុជាផង តើឲ្យពួកគេមកប្រទេសកម្ពុជាយ៉ាងដូចម្ដេច។ ដូច្នេះរឿងរ៉ាវដំបូងដែលសំខាន់បំផុតនោះគឺថា អ្នកត្រូវតែឲ្យប្រជាជនចិនស្គាល់ពីប្រទេសរបស់អ្នកជាមុនសិន។
ក្នុងនាមជាប្រព័ន្ធផ្សព្វផ្សាយដូចដែលអ្នកឃើញស្រាប់ហើយ រដ្ឋាភិបាលចិនតែងតែអញ្ជើញអ្នកព័ត៌មានកម្ពុជាទៅប្រទេសចិន។ មូលហេតុនេះគឺសាមញ្ញណាស់។ ពួកគេចង់ឲ្យអ្នកប្រាប់ប្រជាជនរបស់អ្នកអំពីប្រទេសចិន ដោយសារតែពួកគេមិនអាចប្រាប់ប្រជាជនកម្ពុជាគ្រប់រូបទាំងអស់អំពីប្រទេសចិនបានទេ។ ពួកគេត្រូវតែអញ្ជើញប្រព័ន្ធផ្សព្វផ្សាយ ហើយឲ្យប្រព័ន្ធផ្សព្វផ្សាយធ្វើការងារនេះដើម្បីធ្វើឲ្យមនុស្សយល់ដឹងថាតើចិនជាប្រទេសល្អស្រស់ស្អាតយ៉ាងណា? ខ្ញុំជឿថារដ្ឋាភិបាលកម្ពុជាត្រូវតែធ្វើតាមរបៀបដូចគ្នានេះ។ អ្នកមិនអាចរង់ចាំនរណាម្នាក់ឲ្យមកផ្សព្វផ្សាយពីអ្នកទេ អ្នកត្រូវតែផ្សព្វផ្សាយដោយខ្លួនឯង។
ACC ស្ម័គ្រចិត្តធ្វើជាដៃគូសម្រាប់យុទ្ធនាការបែបនេះដើម្បីធានាថាមនុស្សស្គាល់កម្ពុជាកាន់តែខ្លាំង។ ភ្ញៀវទេសចរចិនស្គាល់រួចហើយអំពីប្រទេសកម្ពុជា ប៉ុន្តែពួកគេស្គាល់តែប្រាសាទអង្គរវត្តតែមួយប៉ុណ្ណោះ។ ប៉ុន្តែអ្នកមានទីកន្លែងដ៏ស្រស់ស្អាតជាច្រើនទៀត ដើម្បីប្រាប់ទៅពិភពលោកថាកម្ពុជាមិនមែនមានតែប្រាសាទអង្គរវត្តតែមួយនោះទេ។ អ្នកនៅមានទីកន្លែងជាច្រើនទៀតដែលត្រូវទៅទស្សនា។ នោះជាមូលហេតុដែលប្រព័ន្ធផ្សព្វផ្សាយមានសារៈសំខាន់ខ្លាំង។ រដ្ឋាភិបាលកម្ពុជាត្រូវតែធ្វើអ្វីៗដោយសមត្ថភាពផ្ទាល់របស់ខ្លួនក្នុងការអញ្ជើញអ្នកព័ត៌មានចិនឲ្យផ្សព្វផ្សាយពីប្រទេសរបស់អ្នក។ ACC នឹងជាដៃគូរបស់អ្នក និងជួយធានាថាកិច្ចខិតខំប្រឹងប្រែងរបស់អ្នកទទួលបានជោគជ័យ។
៥. ទំនាក់ទំនងពាណិជ្ជកម្ម និងវិនិយោគរវាងអាស៊ាន និងចិនកាន់តែជិតស្និទ្ធ និងមានកាន់តែខ្លាំងឡើង។ តើលោកគិតថាអ្វីនឹងកើតឡើងនៅថ្ងៃអនាគត? តើវានឹងបន្តកើនឡើង ឬធ្លាក់ចុះ?
មកដល់បច្ចុប្បន្ន ACC និងមនុស្សគ្រប់គ្នាបានមើលឃើញកំណើនទំហំពាណិជ្ជកម្ម វិនិយោគ ចំនួនមនុស្សធ្វើដំណើរ និងកិច្ចសហប្រតិបត្តិការខាងវិស័យអប់រំ។ ដូច្នេះយើងមិនបានមើលឃើញឧបសគ្គណាមួយរារាំងនិន្នាការដែលកំពុងកើនឡើងនេះទេ។ និន្នាការនេះនៅតែភ្លឺចិញ្ចែងចិញ្ចាច។ ចិនខ្លួនឯងផ្ទាល់មានគោលនយោបាយបើកចំហ។ ពួកគេចាត់ទុកអាស៊ានថាជាអ្នកជិតខាង និងដៃគូល្អមួយ។
ជាទូទៅប្រទេសអាស៊ានជាច្រើនបានធ្វើការងារយ៉ាងល្អជាមួយចិនក្នុងទិដ្ឋភាពផ្សេងៗ។ សម្រាប់ថៃដែលជាប្រទេសរបស់ខ្ញុំ យើងជាប់ចំណាត់ថ្នាក់លេខមួយនៅពេលយើងនិយាយអំពីចំនួនភ្ញៀវទេសចររវាងចិន និងថៃ។
យើងស្វាគមន៍ភ្ញៀវទេសចរចិនជិត ១០ លាននាក់ក្នុងមួយឆ្នាំដែលជាចំនួនច្រើនជាងគេ។ ម៉ាឡេស៊ីជាប់ចំណាត់ថ្នាក់លេខ ១ ខាងវិនិយោគពីចិន។ សិង្ហបុរីជាប់លេខ ១ ខាងវិនិយោគនៅចិន ខណៈដែលវៀតណាមជាប់លេខ ១ ខាងទំហំពាណិជ្ជកម្មរវាងប្រទេសអាស៊ាន និងចិន។
កម្ពុជាកំពុងដើរយ៉ាងលឿន។ ខ្ញុំជឿថា រដ្ឋាភិបាលចិនយកចិត្តទុកដាក់ខ្ពស់ក្នុងការបង្កើតទំនាក់ទំនងកាន់តែជិតស្និទ្ធជាមួយកម្ពុជា។ ខ្ញុំគិតថាមនុស្សគ្រប់គ្នាដឹងរួចហើយថាបច្ចុប្បន្នរដ្ឋាភិបាលចិនជំរុញយ៉ាងខ្លាំងក្នុងការលើកកម្ពស់តំបន់ឧស្សាហកម្មនៅខេត្តព្រះសីហនុ។ នេះគឺជាសញ្ញាល្អមួយដែលនៅឆ្នាំខាងមុខកម្ពុជាគួរជាប់ចំណាត់ថ្នាក់ទី ១ ខាងទិដ្ឋភាពមួយចំនួននៃទំនាក់ទំនងជាមួយចិន។
៦. តើលោកគិតថាកម្ពុជាអាចទាញយកអត្ថប្រយោជន៍ពីទំនាក់ទំនងជិតស្និទ្ធរវាងចិន និងអាស៊ានបានយ៉ាងដូចម្តេច?
រដ្ឋាភិបាលកម្ពុជាមានអត្ថប្រយោជន៍ច្រើនដើម្បីមានទំនាក់ទំនងកាន់តែជិតស្និទ្ធជាមួយចិន។ ទី ១ អ្នក- អាចដើរតួជាសមាជិកមួយក្នុងចំណោមរដ្ឋសមាជិកអាស៊ាន ដើម្បីធ្វើការងាររួមគ្នាក្នុងនាមជាប្រទេស ១០ ដើម្បីធ្វើការជាមួយចិន។ ការធ្វើដូច្នេះនឹងបង្កើនអំណាចរបស់កម្ពុជាក្នុងនាមជាសមាជិកអាស៊ាន។ សម្រាប់ទំនាក់ទំនងទ្វេភាគី ខ្ញុំគិតថាកម្ពុជាពិតជាស្ថិតនៅចំណុចយុទ្ធសាស្ត្រមួយនៃតំបន់អាស៊ីអាគ្នេយ៍។ គ្រប់ប្រទេសទាំងអស់បានដឹងហើយថាអ្នកមានផ្លូវភ្ជាប់ទៅកាន់សមុទ្រ និងស្ថិតនៅអាស៊ានដីគោក។
មកដល់បច្ចុប្បន្នកម្ពុជាទទួលបានការផ្តោតការយកចិត្តទុកដាក់រួចហើយពីរដ្ឋាភិបាលចិន។ ពួកគេយកចិត្តទុកដាក់ខ្លាំងលើការអភិវឌ្ឍនៅកម្ពុជា ហើយពួកគេជឿថាពួកគេអាចជាដៃគូដ៏ល្អរបស់កម្ពុជា។ ដូច្នេះនោះគឺជាអ្វីដែលរដ្ឋាភិបាលរបស់អ្នកបានស្វាគមន៍រួចហើយ ហើយខ្ញុំបានមើលឃើញថា លោកនាយករដ្ឋមន្ត្រី ហ៊ុន សែន បានធ្វើដំណើរទស្សនកិច្ចផ្លូវរដ្ឋជាច្រើនដងទៅកាន់ប្រទេសចិន ហើយមេដឹកនាំចិនក៏បានធ្វើដំណើរទស្សនកិច្ចមកកាន់កម្ពុជាដែរ។ នោះជាសញ្ញាដ៏ល្អមួយដែលរដ្ឋាភិបាលរបស់អ្នកបានធ្វើការងារដ៏ល្អក្នុងការលើកកម្ពស់ទំនាក់ទំនងល្អ។
ចិនជាអ្នកជិតខាង និងដៃគូដ៏ល្អរបស់អាស៊ីអាគ្នេយ៍មិនមែនសម្រាប់តែកម្ពុជាទេតែសម្រាប់គ្រប់ប្រទេសទាំងអស់។ ចិនអាចបង្កើតឥទ្ធិពលល្អ និងឥទ្ធិពលអវិជ្ជមានផងដែរដល់អាស៊ីអាគ្នេយ៍របស់យើង។ ដូច្នេះខ្ញុំលើកទឹកចិត្តឲ្យកម្ពុជាចូលរួមជាមួយប្រទេសនៅអាស៊ីអាគ្នេយ៍ និងធ្វើដំណើររួមគ្នាដើម្បីបង្កើតអត្ថប្រយោជន៍ទៅវិញទៅមកជាមួយចិន៕ LA