.jpg)
ទិដ្ឋភាពនៅរោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេន។ រូបថត ហ៊ឹន ពិសី
ភ្នំពេញៈ កម្ពុជាមានបំណងចង់បង្កើនការផលិតស៊ីម៉ងត៍ឲ្យបានកាន់តែច្រើនបន្ថែមទៀត ដើម្បីឆ្លើយតបនឹងកំណើននៃតម្រូវការដែលកំពុងកើនឡើងជាបន្តបន្ទាប់ ព្រមទាំងអាចជួយកាត់បន្ថយការនាំចូលផងដែរ។ នេះបើតាមកិច្ចប្រជុំសមាគមឧស្សាហកម្មស៊ីម៉ងត៍កម្ពុជា (CCMA) កាលពីថ្ងៃចន្ទ។
លោក ពុត ចន្តារិទ្ធ អគ្គលេខាធិការសមាគមឧស្សាហកម្មស៊ីម៉ងត៍កម្ពុជា កាលពីម្សិលមិញបានប្រាប់ថា បច្ចុប្បន្នតម្រូវការប្រើប្រាស់ស៊ីម៉ងត៍នៅកម្ពុជាមានប្រហែល ៩ លានតោន ក្នុង ១ ឆ្នាំ ខណៈរោងចក្រក្នុងស្រុកទាំង ៥ អាចមានសមត្ថភាពផលិតបានប្រហែល ៨ លានតោន ក្នុង ១ ឆ្នាំ។
ទោះបីយ៉ាងណាដោយសាររោងចក្រស៊ីម៉ងត៍របស់ក្រុមហ៊ុន ថៃ ប៊ុនរ៉ុង ទើបបើកដំណើការកាលពីពាក់កណ្តាលខែវិច្ឆិកា ដូច្នេះការផលិតជាក់ស្តែងក្នុងឆ្នាំ ២០១៩ មានប្រមាណតែជាង ៦ តោនប៉ុណ្ណោះ។ លោកបន្ថែមថា សម្រាប់ពេលខាងមុខរោងចក្រទាំងអស់នឹងខិតខំបង្កើនការផលិតដើម្បីចូលរួមកាត់បន្ថយការនាំចូល ក៏ដូចជាបង្កើតការងារសម្រាប់ប្រជាជន។
លោកថ្លែងថា៖ «ក្នុងកិច្ចប្រជុំយើងបានពិភាក្សាគ្នាពីការពង្រីកវិសាលភាពចង្វាក់ផលិតកម្មនៅតាមរោងចក្រនីមួយៗឲ្យបានកាន់តែច្រើន»។
ទោះយ៉ាងណាលោក ចន្តារិទ្ធ បានបញ្ជាក់ថា ដោយសារនៅមានកង្វះខាតក្នុងស្រុកច្រើន ដូច្នេះកម្ពុជាមិនទាន់បានគិតដល់ការនាំចេញស៊ីម៉ងត៍ទៅលក់នៅបរទេសទេ ទោះជាគុណភាពស៊ីម៉ងត៍របស់យើងមានកម្រិតស្តង់ដាអន្តរជាតិហើយក៏ដោយ។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាបាននិយាយថា បើកម្ពុជាអាចបង្កើនការផលិតនោះគឺជាការល្អណាស់ ប៉ុន្តែគេត្រូវគិតពីគុណភាព និងតម្លៃផងដែរ។ លោកបានបន្តថា កន្លងមកផលិតផលស៊ីម៉ងត៍កម្ពុជាមានតម្រូវការច្រើន ដែលធ្វើឲ្យដាច់ស្តុកជារឿយៗ និងធ្វើឲ្យអ្នកប្រើប្រាស់មួយចំនួនពិបាករកទិញ។ គុណភាពស៊ីម៉ងត៍ផលិតក្នុងស្រុក មិនចាញ់គុណភាពស៊ីម៉ងត៍នាំចូលទេ។
លោកនិយាយថា៖ «ខ្ញុំគាំទ្រផលិតឲ្យបានច្រើន តែសូមរក្សាគុណភាពឲ្យបានល្អផងដែរ»។
លោកបន្ថែមថា ខណៈទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់បង្ហាញពីកំណើនទុនវិនិយោគយ៉ាងច្រើនក្នុងឆ្នាំ ២០១៩ នេះ ដូច្នេះនៅឆ្នាំបន្តបន្ទាប់ទៅមុខតម្រូវការស៊ីម៉ងត៍នឹងមានកំណើនខ្ពស់ជាមិនខាន។
គិតរហូតមកដល់ពេលនេះនៅកម្ពុជាមានរោងចក្រផលិតស៊ីម៉ងត៍កំពុងដំណើរការចំនួន ៥ រួមមាន ក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន ក្រុមហ៊ុនកំពត ស៊ីមេន ក្រុមហ៊ុនស៊ីម៉ងត៍ ចក្រីទីង ក្រុមហ៊ុនបាត់ដំបង ខនស៍ ស៊ីមេន និងក្រុមហ៊ុន ស៊ីម៉ងត៍ ថៃ ប៊ុនរ៉ុង ខមភេនី លីមីធីត។ ទុនវិនិយោគសរុបរបស់រោងចក្រទាំង ៥ មានប្រមាណ ៨០០ លានដុល្លារ៕ LA
