ភ្នំពេញ: សភាពាណិជ្ជកម្មកម្ពុជា (CCC) និងសភាពាណិជ្ជកម្មជប៉ុននៅកម្ពុជានឹងបញ្ជូនលិខិតស្នើឲ្យក្រុមហ៊ុនអាកាសចរណ៍ជប៉ុន (All Nippon Airways-ANA) បើកប្រតិបតិ្តការហោះហើរត្រង់មកកម្ពុជានៅមុនពេលកំណត់ដែលគ្រោងធ្វើឡើងក្នុងខែកញ្ញា ឆ្នាំ ២០២០ ដើម្បីជំរុញឲ្យវិនិយោគិនជប៉ុនមកវិនិយោគនៅកម្ពុជាក្នុងអំឡុងនៃវិបត្តិជំងឺកូវីដ ១៩ ជាសកល។
ការទទូចនេះត្រូវបានធ្វើឡើងក្នុងជំនួបកាលពីចុងសប្តាហ៍មុននៅទីក្រុងភ្នំពេញរវាងលោក គិត ម៉េង ប្រធានសភាពាណិជ្ជកម្មកម្ពុជាជាមួយប្រធានសមាគមធុរកិច្ចជប៉ុននៅកម្ពុជា (JBAC) លោក Kanda Yogo ដែលទើបនឹងតែងតាំងថ្មី។
លោក លឹម ហេង អនុប្រធានសភាពាណិជ្ជកម្មប្រាប់ភ្នំពេញប៉ុស្តិ៍កាលពីថ្ងៃអាទិត្យថា ភាគីទាំង ២ គ្រោងនឹងផ្ញើលិខិតផ្លូវការមួយច្បាប់ទៅក្រុមហ៊ុនអាកាសចរណ៍ ANA ក្នុងគោលបំណងស្នើសុំឲ្យក្រុមហ៊ុននេះប្រតិបត្តិការជើងហោះត្រង់មកកម្ពុជានៅមុនពេលកំណត់ ដើម្បីរួមចំណែកក្នុងការទាក់ទាញវិនិយោគិនជប៉ុនមកវិនិយោគនៅកម្ពុជាបន្ថែមទៀត។
លោកថ្លែងថា៖ «យើងនឹងចុះហត្ថលេខាលើញត្តិរួមគ្នាដើម្បីស្នើឲ្យក្រុមហ៊ុនអាកាសចរណ៍ ANA ជប៉ុនបន្តប្រតិបត្តិការជើងហោះហើរត្រង់មកកម្ពុជាឲ្យបានឆាប់ ព្រោះការពន្យារនេះបានធ្វើឲ្យស្ទះដល់ការធ្វើដំណើររបស់អ្នកវិនិយោគជប៉ុនមកវិនិយោគនៅកម្ពុជា ខណៈការហោះហើរឡើងវិញនេះនឹងផ្ដល់ប្រយោជន៍យ៉ាងខ្លាំងដល់វិស័យទេសចរណ៍ វប្បធម៌ និងធុរកិច្ចរវាងកម្ពុជា និងជប៉ុន»។
លោកបន្តថា ក្នុងជំនួបនោះភាគីទាំង ២ ក៏បានពិភាក្សាស្វែងរកវិធានការក្នុងការទាក់ទាញការវិនិយោគបរទេសបន្ថែមទៀតមកកម្ពុជាផងដែរ។
លោក លឹម ហេង បន្តថានាពេលនេះភាគីជប៉ុនសន្យាថានឹងជួយជំរុញឲ្យការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងជប៉ុន និងការអភិវឌ្ឍសេដ្ឋកិច្ចឌីជីថលក្នុងពេលអនាគត។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានស្វាគមន៍ឲ្យមានការហោះហើរឡើងវិញតាមផ្លូវអាកាសមកកម្ពុជាដើម្បីរួមចំណែកស្តារវិស័យទេសចរណ៍កម្ពុជាឲ្យងើបឡើងវិញបន្ទាប់ពីរងផលប៉ះពាល់យ៉ាងខ្លាំង។
លោកស្រីនិយាយថា៖ «យើងគួរឲ្យមានប្រតិបត្តិការហោះហើរឡើងវិញ ដោយមិនគួររង់ចាំការរលាយបាត់ជំងឺកូវីដ១៩អស់ពីផែនដីទើបមានសកម្មភាពហោះហើរទេ ព្រោះវិធានការពាររបស់ប្រទេសនីមួយៗក៏មានបទពិសោធខ្ពស់រួចហើយ»។
យោងតាមរដ្ឋលេខាធិការដ្ឋានអាកាសចរស៊ីវិល វិបត្តិជំងឺកូវីដ១៩ បានធ្វើឲ្យការធ្វើដំណើរតាមជើងហោះមកកម្ពុជាធ្លាក់ចុះ ៩៨ ភាគរយ៕ LA