ភ្នំពេញៈ កម្ពុជា-ចិន បានចុះកិច្ចព្រមព្រៀងជាផ្លូវការនៅក្នុងការនាំចេញស្វាយស្រស់ចំនួន ៥០ ម៉ឺនតោនក្នុង ១ ឆ្នាំ ដែលនេះជាការបើកផ្លូវក្នុងការជំរុញការនាំចេញកសិផលក្នុងស្រុកទៅកាន់ទីផ្សារធំជាងគេនៅអាស៊ីមួយនេះ។
កិច្ចព្រមព្រៀងលើពិធីសារស្តីពី «លក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ពីកម្ពុជាទៅកាន់ប្រទេសចិន» ត្រូវបានចុះហត្ថលេខារវាងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទជាមួយនឹងលោក WANG Wentian ឯកអគ្គរដ្ឋទូតប្រទេសចិនប្រចាំកម្ពុជាកាលពីថ្ងៃអង្គារនៅទីស្តីការក្រសួងកសិកម្ម។
លោក វេង សាខុន បាននិយាយថា ពិតជាឱកាសមួយដ៏សំខាន់ណាស់សម្រាប់ផ្លែស្វាយស្រស់កម្ពុជាដែលភាគីចិនអនុញ្ញាតឲ្យនាំចេញទៅកាន់ប្រទេសខ្លួន ដែលជាទីផ្សារមានប្រជាជនច្រើន និងមានតម្រូវការខ្ពស់ (៨ លានតោនក្នុង ១ ឆ្នាំ)។ លោកបន្តថា ផ្លែស្វាយស្រស់គឺជាសមិទ្ធផលថ្មីមួយទៀតបន្ទាប់ពីផ្លែចេកអំបូងលឿងដែលប្រទេសចិនបានអនុញ្ញាតជាផ្លូវការកាលពីឆ្នាំ ២០១៩។
លោកថ្លែងថា៖ «នេះជាសមិទ្ធផលដ៏មានសារៈប្រយោជន៍សម្រាប់កម្ពុជា ហើយវាក៏បានដើរស្របនឹងគោលនយោបាយរបស់រាជរដ្ឋាភិបាលក្នុងការអភិវឌ្ឍវិស័យឧស្សាហកម្មកម្ពុជាឆ្នាំ ២០១៥-២០២៥ ដែលមានគោលដៅសំខាន់ពាក់ព័ន្ធនឹងវិស័យកសិកម្ម គឺត្រូវជំរុញការនាំចេញទំនិញកែច្នៃកសិកម្មឲ្យបាន ១២ ភាគរយ នៃបរិមាណនាំចេញសរុបនៅឆ្នាំ ២០២៥»។
ជាមួយគ្នានេះលោកក៏បានលើកទឹកចិត្តឲ្យមានការចាប់ដៃគូរវាងវិនិយោគិនក្នុងស្រុក និងវិនិយោគិនមកពីប្រទេសចិន ក្នុងការពង្រីកផ្ទៃដីដាំដុះ និងវិធីសាស្ត្រក្នុងការធ្វើប្រព្រឹត្តិកម្មសម្លាប់សមាសភាពចង្រៃមុននឹងនាំចេញផងដែរ។
លោក WANG Wentian អគ្គរដ្ឋទូតប្រទេសចិនប្រចាំកម្ពុជាបាននិយាយថា ការចុះហត្ថលេខានេះនឹងផ្តល់ឲ្យកម្ពុជាអាចនាំចេញផ្លែស្វាយស្រស់ទៅប្រទេសចិនជាផ្លូវការ ខណៈប្រទេសចិនដឹងថា កម្ពុជាជាប្រទេសដែលមានសក្តានុពលខ្ពស់លើផលិតផលកសិកម្ម។ លោកបន្តថា ជាមួយនឹងកិច្ចសហប្រតិបត្តិការកាន់តែល្អ បច្ចុប្បន្នផលិតផលកសិកម្មកម្ពុជាកាន់តែច្រើនត្រូវបាននាំចេញទៅទីផ្សារចិន ជាពិសេសកំណើនដ៏ច្រើននៃការនាំចេញអង្ករនាដើមឆ្នាំ ២០២០ នេះ។
លោកថ្លែងថា៖ «ខ្ញុំរំពឹងថានៅពេលខាងមុខនឹងមានផលិតផលកម្ពុជាកាន់តែច្រើនមុខទៀតត្រូវបាននាំចេញជាផ្លូវការទៅប្រទេសចិន»។ លោកបន្ថែមថា៖ «ខ្ញុំសង្ឃឹមថា ជាមួយនឹងទំនាក់ទំនងកាន់តែប្រសើរ ការនាំចេញផលិតផលកម្ពុជាទៅប្រទេសចិននឹងមានកំណើនខ្ពស់ថែមទៀតបន្ទាប់ពីជំងឺកូវីដ ១៩ ត្រូវបានបញ្ចប់»។
យោងតាមក្រសួងកសិកម្ម គិតត្រឹមចុងឆ្នាំ ២០១៩ នៅកម្ពុជាមានផ្ទៃដីដាំដុះស្វាយ ១២៥ ៣១៩ ហិកតា ក្នុងនោះផ្ទៃដីប្រមូលផលមាន ៩១ ៣៩៨ ហិកតា។ ជាធម្មតា ដី ១ ហិកតា គេអាចទទួលផលផ្លែស្វាយបានប្រមាណ ៣០ តោនក្នុង ១ ឆ្នាំ (១ ឆ្នាំប្រមូលផល ២ ដង)។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មបាននិយាយថា ទោះបីប្រទេសចិនអនុញ្ញាតឲ្យកម្ពុជានាំចេញផ្លែស្វាយស្រស់ទៅកាន់ប្រទេសខ្លួនជាផ្លូវការហើយក៏ដោយ ក៏ប៉ុន្តែការនាំចេញអាចនឹងមិនកើតឡើងភ្លាមៗទេ ព្រោះដើម្បីអាចនាំចេញបាន លុះត្រាផ្លែស្វាយស្រស់នោះមានគុណភាពព្រមទាំងការវេចខ្ចប់ត្រឹមត្រូវតាមស្តង់ដាដែលភាគីចិនកំណត់។
យោងតាមលោក ងិន ឆាយ នៅកម្ពុជាបច្ចុប្បន្នមានតែរោងចក្ររបស់ Hyundai Mao Legacy Co., Ltd តែ ១ គត់ដែលមានស្តង់ដាលាងសម្អាត និងសម្លាប់សមាសភាពចង្រៃតាមស្តង់ដាសម្រាប់ការនាំចេញ។ បច្ចុប្បន្នរោងចក្រនេះមានសមត្ថភាពសម្លាប់សមាសភាពចង្រៃបានប្រមាណ ១៥ តោនប៉ុណ្ណោះក្នុង ១ ថ្ងៃ។
លោកអះអាងថា៖ «អ្វីៗវាអាស្រ័យទៅលើវិស័យឯកជនថា តើពួកគាត់អាចមានទុនវិនិយោគទៅលើម៉ាស៊ីន Vapor Heat Treatment និង Hot Water Treatment ឬយ៉ាងណា? ដោយការដំឡើង Hot Water Treatment អាចប្រើពេល ២-៣ ខែ ចំណែក Vapor Heat Treatment នឹងត្រូវចំណាយពេល ៥-៦ ខែ»។
យោងតាមអគ្គនាយកដ្ឋានកសិកម្មគិតត្រឹមថ្ងៃទី ៥ ខែមិថុនា ឆ្នាំ ២០២០ មានក្រុមហ៊ុន/ម្ចាស់ចម្ការចំនួន ២០ ដែលបានមកដាក់ពាក្យស្នើសុំចុះបញ្ជីចម្ការស្វាយ និងទីតាំងវេចខ្ចប់សម្រាប់នាំចេញផ្លែស្វាយស្រស់ទៅកាន់ប្រទេសចិន ដែលស្មើនឹងផ្ទៃដីសរុប ២១ ២៨៦ ហិកតា៕ LA