.jpg)
លោក វេង សាខុន (ស្តាំ) និងលោក Xiong Bo ក្នុងពិធីចុះហត្ថលេខាកាលពីថ្ងៃម្សិលមិញ។ ហេង ជីវ័ន
ភ្នំពេញៈ កម្ពុជា និងចិនបានចុះកិច្ចព្រមព្រៀងលើពិធីសារស្តីពីការនាំចេញចេកកម្ពុជាទៅកាន់ប្រទេសចិន ដើម្បីបើកផ្លូវឲ្យកម្ពុជាអាចនាំចេញចេកទៅកាន់ទីផ្សារប្រទេសចិន ខណៈកន្លងមកការនាំចេញមានតែទីផ្សាររបស់វៀតណាមប៉ុណ្ណោះ។
ពិធីសារស្តីពីលក្ខខណ្ឌតម្រូវភូតគាមអនាម័យត្រូវបានធ្វើឡើងនៅក្រសួងកសិកម្ម រុក្ខាប្រមាញ់ និងនេសាទកាលពីថ្ងៃម្សិលមិញរវាងលោក វេង សាខុន រដ្ឋមន្ត្រីក្រសួងកសិកម្មជាមួយលោក Xiong Bo ឯកអគ្គរដ្ឋទូតប្រទេសចិនប្រចាំកម្ពុជា។
ចេកសម្រាប់នាំចេញ (ចេកអំបូងលឿង) ជាប្រភេទចេកដែលមានភាពធន់ជាមួយការដឹកជញ្ជូនមិនងាយទុំជោរ និងមានសម្បកក្រាស់។ ចេកប្រភេទនេះអាចផ្តល់ផលពី ៦០-៧៣ តោនក្នុង ១ ហិកតាក្នុង ១ ឆ្នាំដែលគេអាចប្រមូលផល ៣ ដងក្នុងរយៈពេល ២ ឆ្នាំ។
លោក វេង សាខុន ថ្លែងថាកិច្ចព្រមព្រៀងនេះនឹងជួយធ្វើឲ្យផលិតផលកសិកម្មកម្ពុជាពិសេសដំណាំចេកកាន់តែមានទីផ្សារបន្ថែមទៀត។ លោកបន្តថា ការស្វែងរកទីផ្សារគឺជារឿងសំខាន់ណាស់សម្រាប់កម្ពុជាដែលជាប្រទេសកសិកម្ម។
លោកបានបន្តថា៖ «ពិធីចុះហត្ថលេខានេះគឺជាការបើកទ្វារសម្រាប់ការនាំចេកពីកម្ពុជាទៅកាន់ទីផ្សារប្រទេសចិន ដែលជាទីផ្សារដ៏ធំក្នុងតំបន់»។
លោកបន្ថែមថានៅពេលនេះកម្ពុជាកំពុងបន្តស្នើសុំឲ្យភាគីចិនពិនិត្យលទ្ធភាព និងពន្លឿនការងារក្នុងការនាំចូលផលិតផលកសិកម្មដែលមាន ដូចជា ស្វាយ តាង៉ែន ផ្លែស្រកានាគ ម្រេច និងសម្បុកទឹកមាត់ត្រចៀកកាំពីចិនផងដែរ។
លោក Xiong Bo ឯកអគ្គរដ្ឋទូតប្រទេសចិនប្រចាំនៅកម្ពុជាបាននិយាយថា ការចុះហត្ថលេខានេះគឺជាការបើកឱកាសឲ្យកម្ពុជានាំចេញចេករបស់ខ្លួនទៅប្រទេសចិន។
លោកថ្លែងថា៖ «យើងនឹងខិតខំពង្រឹងកិច្ចសហប្រតិបត្តិការជាមួយប្រទេសកម្ពុជាឲ្យកាន់តែទូលាយបន្ថែមទៀត ហើយសង្ឃឹមថា ផលិតផលរបស់កម្ពុជានឹងនាំចេញទៅកាន់ប្រទេសចិនកាន់តែច្រើនបន្ថែមទៀត»។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានប្រាប់ថា ការចុះកិច្ចព្រមព្រៀងនាពេលនេះមិនមែនមានន័យថា ចេកកម្ពុជាអាចនាំចេញទៅកាន់ប្រទេសចិនបានភ្លាមៗ ដោយមិនមានលក្ខខណ្ឌកំណត់នោះទេ។
លោកអះអាងថា៖ «យ៉ាងហោចណាស់គេត្រូវការពេល ២-៣ ខែទៀតទើបដំណើរការនាំចេញចេកទៅប្រទេសចិនអាចសម្រេចបានដោយយើងត្រូវរៀបចំបែបបទមួយចំនួនទាក់ទងនឹងលក្ខខណ្ឌតម្រូវឲ្យមានការត្រួតពិនិត្យភូតគាមអនាម័យ»។
ការត្រួតពិនិត្យភូតគាមអនាម័យមានគោលបំណងដើម្បីទប់ស្កាត់ការរីករាលដាលឆ្លងនូវសមាសភាពចង្រៃ ភូតគាមអនាម័យ និងសមាសភាពចង្រៃដែលបង្កគ្រោះថ្នាក់ពីតំបន់មួយទៅតំបន់មួយទៀត តាមគ្រប់មធ្យោបាយដើម្បីការពារអាយុជីវិតមនុស្ស សត្វ និងផលិតផលកសិកម្ម និងជីវសាស្ត្រចម្រុះ។ នេះបើតាមឯកសាររបស់អគ្គនាយកដ្ឋានគយ និងរដ្ឋាករកម្ពុជា។
បច្ចុប្បន្ននៅកម្ពុជាមានកសិដ្ឋានធំៗចំនួន ៣ (ខេត្តរតនគិរីក្រចេះ និងខេត្តកំពត) ដែលមានផ្ទៃដីសរុប ៤ ៩៩៦ ហិកតាកំពុងដាំចេកអំបូងលឿងសម្រាប់នាំចេញទៅកាន់ប្រទេសវៀតណាមជារៀងរាល់ថ្ងៃ។
ទំហំពាណិជ្ជកម្មរវាងកម្ពុជា-ចិនបានកើនឡើងពី ៤ ៧៦០ លានដុល្លារក្នុងឆ្នាំ ២០១៦ ទៅដល់ ៥ ៨០០ លានដុល្លារក្នុងឆ្នាំ ២០១៧ គឺកើនឡើងចំនួន ២១,៨ ភាគរយ៕
