The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា-ចិន នឹង​ចុះ​កិច្ច​ព្រម​ព្រៀង​ផ្លូវ​អាកាស

កម្ពុជា-ចិន នឹង​ចុះ​កិច្ច​ព្រម​ព្រៀង​ផ្លូវ​អាកាស

កម្ពុជា-ចិន នឹង​ចុះ​កិច្ច​ព្រម​ព្រៀង​ផ្លូវ​អាកាស

ភ្នំពេញៈ ប្រទេស កម្ពុជា ចិន នឹង​ចុះ​ហត្ថលេខា​លើ​កិច្ច​ព្រម​ព្រៀង​ដឹក​ជញ្ជូន​តាម​ផ្លូវ​អាកាស ក្នុង​អំឡុង​ពេល​កិច្ច​ប្រជុំ​រយៈ​ពេល​បីថ្ងៃ​នៅ​ទីក្រុង ប៉េកាំង នៅ ខែ មករា ឆ្នាំ ២០១៤។

មន្ដ្រី​បាន​និយាយ​ថា កិច្ច​ព្រម​ព្រៀង​នេះ​គឺជា​ការ​ធ្វើ​បច្ចុប្បន្នភាព​មួយ និង​លក្ខខណ្ឌ​មួយ​ចំនួន​នៅ​ក្នុង​ការ​ឆ្លើយ​តប​នឹង​ការ​កើន​ឡើង​នៃ​ការ​ដឹក​ជញ្ជូន​តាម​ផ្លូវ​អាកាស​រវាង​ប្រទេស​ទាំង​ពីរ​នា​ពេល​ថ្មីៗ​នេះ​ដោយ​សង្ឃឹម​ថា លំហូរ​ភ្ញៀវ​ទេសចរ និង​ការ​វិនិយោគ​មក​ពី​ប្រទេស ចិន នឹង​មាន​ការ​កើន​ឡើង​បន្ថែម​ទៀត។

យោង​តាម​សេចក្ដី​ប្រកាស​ព័ត៌មាន​បាន​ពី​ក្រសួង ការ​បរទេស និង​សហ​ប្រតិបត្តិការ​អន្តរជាតិ​កម្ពុជា​ចេញ​កាល​ពី​ថ្ងៃ​ចន្ទ​ឲ្យ​ដឹង​ថា លោក ហោ ណាំហុង ឧប​នាយក​រដ្ឋ​មន្ដ្រី​នឹង​ដឹក​នាំ​គណៈ​ប្រតិភូ​ទៅ​ចូល​រួម​កិច្ច​ប្រជុំ​ដំបូង​នៃ​គណៈកម្មាធិការ​សហ​ប្រតិបត្តិការ​អន្តរ​រដ្ឋាភិបាល កម្ពុជា-ចិន ចាប់​ពី​ថ្ងៃ ទី១ ដល់ ថ្ងៃ ទី៣ ខែ មករា នៅ​ទីក្រុង ប៉េកាំង ហើយ​កិច្ច​ព្រម​ព្រៀង​នេះ​នឹង​ត្រូវ​ធ្វើ​ឡើង​នៅ​ពេល​នោះ។

លោក វណ្ណ ចន្ធី ប្រធាន​នាយកដ្ឋាន​ដឹក​ជញ្ជូន​ផ្លូវ​អាកាស​នៅ​អាកាសចរ​ស៊ីវិល​និយាយ​ថា កិច្ច​ព្រម​ព្រៀង​នេះ​នឹង​កែលម្អ​ការ​ដឹក​ជញ្ជូន​ផ្លូវ​អាកាស​កាន់​តែ​ច្រើន​ឡើង​រវាង​ប្រទេស​ទាំង​ពីរ​នេះ។ លោក​បន្ត​ថា៖ «យើង​បាន​ធ្វើ​កិច្ច​ព្រម​ព្រៀង​នេះ​រួច​ហើយ​ចាប់​តាំង​ពី​ឆ្នាំ ១៩៦៩ ប៉ុន្តែ​វា​ចាស់​បន្តិច​ហើយ​ពេល​នេះ។ បច្ចុប្បន្ន​យើង​ចង់​ធ្វើ​បច្ចុប្បន្នភាព​លើ​កិច្ច​ព្រម​ព្រៀង នេះ​ដើម្បី​ឲ្យ​ស្រប​នឹង​ស្ដង់ដារ​អន្តរជាតិ​ក្នុង​ការ​ឆ្លើយតប​ការ​កើន​ឡើង​នៃ​តម្រូវការ​ក្នុង​ពេល​បច្ចុប្បន្ន​នេះ»។

លោក​បន្ថែម​ថា៖ «កិច្ច​ព្រម​ព្រៀង​ថ្មី​នេះ​នឹង​ជួយ​កាន់​តែ​ច្រើន​ក្នុង​ការ​សម្រួល​ដល់​ការ​ដឹក​ជញ្ជូន​តាម​ផ្លូវ​អាកាស​រវាង​ប្រទេស​យើង​ទាំង​ពីរ​នេះ»។

កម្ពុជា​សង្ឃឹម​ថា​នឹង​បង្កើន​ចំនួន​ភ្ញៀវ​ទេសចរ​ចិន​បាន​កាន់​តែ​ច្រើន។ កាល​ពី​ខែ មិថុនា មន្ដ្រី​ទេសចរ​និយាយ​ថា ពួក​គេ​កំពុង​ពិចារណា​ការ​សាង​សង់ «ទីក្រុង ចិន» មួយ​នៅ​ភ្នំពេញ​ដើម្បី​ទទួល​បាន​ជនជាតិ​ចិន​កាន់​តែ​ច្រើន។

លោក ថោង ខុន រដ្ឋ​មន្ដ្រី​ក្រសួង ទេសចរណ៍ បាន​ថ្លែង​នៅ​ពេល​នោះ​ថា កម្ពុជា​ចាំ​បាច់​ត្រូវ​បង្កើត​ហាង​លក់​ទំនិញ​ទំនើប​ឲ្យ​បាន​កាន់​តែ ច្រើន​ដើម្បី​ទាក់​ទាញ​ដល់​ភ្ញៀវ​ទេសចរ​ចិន។

លោក​លើក​ឡើង​ថា៖ «បញ្ហា​សំខាន់​គឺ​យើង​ខ្វះ​សណ្ឋាគារ ភោជនីយដ្ឋាន​ល្អៗ សេវា​ដឹក​ជញ្ជូន។ សំខាន់​បំផុត​នោះ​គឺ​យើង​ធ្វើ​បាន​បន្តិច​បន្តួច​ជាមួយ​នឹង​ការ​ផ្សព្វ​ផ្សាយ​ពាណិជ្ជកម្ម​នៅ​ក្នុង​ទីផ្សារ ចិន។ ភ្ញៀវ​ទេសចរ​ចិន​ចូល​ចិត្ត​ការ​ទិញ​អីវ៉ាន់​ជាង​ភ្ញៀវ​ទេសចរ​ផ្សេង​ទៀត»។

ទិន្នន័យ​ពី​ក្រសួង ទេសចរណ៍​បង្ហាញ​ថា ចំនួន​ភ្ញៀវ​ទេសចរ ចិន បាន​កើន​ឡើង ៤៥ ភាគរយ​ក្នុង​រយៈ​ពេល ៩ខែ ឆ្នាំ ២០១៣ បើ​ធៀប​រយៈ​ពេល​ដូច​គ្នា​កាល​ពី​ឆ្នាំ​ទៅ​ពោល​គឺ​កើន​ឡើង​ពី ២៣៤ ៤៣៦ នាក់ ដល់ ៣៣៩ ៨៩៤ នាក់។

ក្រុមហ៊ុន អាកាសចរណ៍​ក្នុង​ស្រុក​កម្ពុជា​អង្គរ​អ៊ែរ បាន​ចាប់​ផ្ដើម​ជើង​ហោះ​ហើរ​លក្ខណៈ​ទៀង​ទាត់​របស់​ខ្លួន​រួច​ហើយ​កាល​ពី​ថ្ងៃ ទី២៦ ធ្នូ ភ្ជាប់​ទីក្រុង ភ្នំពេញ និង សៀមរាប ទៅ​ទីក្រុង ស៊ាងហៃ ដែល​មាន​ជើង​ហោះ​ហើរ ៦ ក្នុង​មួយ​សប្ដាហ៍​ដោយ​ប្រើ​ប្រាស់​យន្តហោះ Airbus A321 និង​ជើង​ហោះ​ហើរ​ចេញ​ពី​ទីក្រុង សៀមរាប ឆ្ពោះ​ទៅ​កាន់​ទីក្រុង គ័ងចូវ ប្រទេស ចិន ចាប់​ពី​ថ្ងៃ ទី២៦ ខែ កញ្ញា ឆ្នាំ​នេះ។

ក្រុមហ៊ុន​អាកាសចរណ៍ Juneyao Airlines របស់ ចិន ក៏​បាន​ដំណើរការ​ជើង​ហោះ​ហើរ​ត្រង់​ផង​ដែរ​រវាង​ទីក្រុង ស៊ាងហៃ និង​ទីក្រុង សៀមរាប ខណៈ​ក្រុមហ៊ុន​អាកាសចរណ៍ Air China ក៏​បាន​ចាប់ផ្ដើម​ជើង​ហោះ​ហើរ​ត្រង់​ចេញ​ពី​ទីក្រុង ប៉េកាំង កាល​ពី​ខែ វិច្ឆិកា។

ពាណិជ្ជកម្ម​ទ្វេ​ភាគី​រវាង​ប្រទេស កម្ពុជា និង ចិន មាន​ទឹក​ប្រាក់ ២,៥ លាន​ដុល្លារ​កាល​ពី​ឆ្នាំ ២០១១ ខណៈ​មេ​ដឹក​នាំ​ប្រទេស​ទាំង​ពីរ​បាន​សន្យា​ថា​នឹង​បង្កើន​ឲ្យ​បាន​ទ្វេ​ដង​នៅ​ត្រឹម​ឆ្នាំ ២០១៧។ ទិន្នន័យ​បាន​ពី​ក្រុម​ប្រឹក្សា​អភិវឌ្ឍន៍​កម្ពុជា​បង្ហាញ​ថា រដ្ឋាភិបាល​បាន​អនុម័ត​ការ​វិនិយោគ​មាន​ទឹក​ប្រាក់ ៩,០៥ ពាន់​លាន​ដុល្លារ​មក​ពី​ប្រទេស ចិន ចាប់​តាំង​ពី​ឆ្នាំ ១៩៩៤ រហូត​ដល់​ចុង​ខែ កក្កដា ឆ្នាំ ២០១២៕ PB

អត្ថបទគួរចាប់អារម្មណ៍