.jpg)
បុគ្គលិកធនាគារម្នាក់រាប់ប្រាក់ដុល្លារអាមេរិក ដែលដាក់ក្បែរប្រាក់យន់ របស់ចិន។ រូបថត សហការី
ភ្នំពេញ៖ កម្ពុជា និងខេត្ត ក្វាងទុង ប្រទេស ចិន គួរជំរុញការប្រើប្រាស់ប្រាក់យន់ចិន ដើម្បីជាមធ្យោបាយទូទាត់រាល់ការ នាំចេញ-នាំចូលទំនិញរវាងប្រទេសទាំងពីរ ឲ្យកាន់តែទូលំទូលាយ ចៀសជាងប្រាក់ដុល្លារ ដើម្បីកាត់បន្ថយថ្លៃប្រតិបត្តិការពាណិជ្ជកម្ម ខណៈការដោះដូរពាណិជ្ជកម្មទ្វេភាគីកាន់តែធំឡើង។ នេះបើយោងតាមការអះអាងរបស់លោក អ៊ៅ យ៉ាងវ៊ីមីង អភិបាលរងខេត្ត ក្វាងទុង។
ការលើកឡើងរបស់លោក យ៉ាងវ៊ីមីង បានធ្វើឡើង កាលពីថ្ងៃសុក្រសប្តាហ៍មុន ក្នុងជំនួបការងារជាមួយលោក ប៉ាន សូរស័ក្កិ រដ្ឋមន្រ្តីក្រសួង ពាណិជ្ជកម្មកម្ពុជា។ នេះបើយោងតាមអ្នកនាំពាក្យក្រសួង ពាណិជ្ជកម្មកម្ពុជា កាលពីម្សិលមិញ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជាបានឲ្យដឹង កាលពីម្សិលមិញថា ស្របពេលដែលទំហំពាណិជ្ជកម្មចិន និងកម្ពុជាកំពុងកើនឡើង ហើយសេដ្ឋកិច្ចចិនកាន់តែមានឥទ្ធិពលនៅលើឆាកអន្តរជាតិ ការប្រើប្រាស់ប្រាក់យន់ចិនដើម្បីធ្វើជារូបិយប័ណ្ណទូទាត់ទំនិញសម្រាប់ពាណិជ្ជកម្មអន្តរជាតិ កម្ពុជា-ចិន ត្រូវបានភាគីចិនផ្តួចផ្តើមឡើង ដើម្បីជំរុញភាពងាយស្រួលក្នុងការធ្វើពាណិជ្ជកម្មរបស់ប្រទេសទាំង ២។
លោកបន្តថាការជំរុញឲ្យមានការប្រើប្រាស់រូបិយប័ណ្ណយន់ដោយផ្ទាល់ដើម្បីទូទាត់ទំនិញឆ្លងប្រទេសសម្រាប់កម្ពុជា-ចិនអាចរួមចំណែកកាត់បន្ថយការពឹងផ្អែកលើការប្រើប្រាស់ដុល្លារលើការធ្វើពាណិជ្ជកម្មអន្តរជាតិដែលវាជាការល្អសម្រាប់ពាណិជ្ជករចិន និងកម្ពុជា។
លោកបន្តថា៖ «អត្រាប្តូរប្រាក់ហ្នឹងវាមានហានិភ័យដែរសម្រាប់អ្នករកស៊ី។ ជួនកាលប្រាក់ដុល្លារអាមេរិកវាឡើងចុះ ធៀបនឹងប្រាក់យន់ចិន អីទៅ វាអាចធ្វើឲ្យខាតបង់»។
លោកបន្តថា៖ «យើងធ្វើការដោះដូរពាណិជ្ជកម្មជាមួយចិនកាន់តែច្រើនជាងមុនអ៊ីចឹងការទទួលប្រាក់យន់ដើម្បីទូទាត់ [ទំនិញជាមួយចិន] ក៏ជាការល្អដែរសម្រាប់ពាណិជ្ជករ»។
យ៉ាងណាក៏ដោយលោក ថៃ បានថ្លែងថាមិនទាន់មានកិច្ចព្រមព្រៀងណាមួយត្រូវបានធ្វើឡើងដើម្បីដំណើរការគំនិតផ្ដួចផ្ដើមនេះនៅឡើយទេ តែភាគីទាំង ២ បានយល់ព្រមទៅវិញទៅមកក្នុងការប្រើប្រាស់រូបិយប័ណ្ណរបស់ប្រទេសទាំង ២ ដើម្បីទូទាត់សម្រាប់ការនាំចូល និងនាំចេញទំនិញរវាងប្រទេសកម្ពុជា និងចិន។
លោកបន្តថា រដ្ឋមន្ត្រីពាណិជ្ជកម្មកម្ពុជាបានស្វាគមន៍សំណើនេះ ហើយបានលើកឡើងពីសក្តានុពលនៃការពង្រីកទំហំពាណិជ្ជកម្មកម្ពុជា-ចិន ជាពិសេសខេត្តក្វាងទុង។
កាលពីខែកញ្ញាឆ្នាំ ២០១៧ ធនាគារជាតិកម្ពុជា និងធនាគារកណ្តាលរដ្ឋចិនប្រចាំខេត្តគ័ងស៊ីបានដាក់ឲ្យដំណើរការប្រព័ន្ធទិន្នន័យអត្រាប្តូរប្រាក់ រៀល-យន់ ប្រចាំខេត្តគ័ងស៊ីប្រទេសចិនដែលជាដំណើរការមួយអនុញ្ញាតឲ្យអ្នកកាន់ប្រាក់រៀលខ្មែរអាចធ្វើការប្តូរប្រាក់យន់ចិនដោយផ្ទាល់នៅតាមបណ្តាធនាគារនៅខេត្តរបស់ចិនមួយនេះ។ មុនពេលមានកិច្ចព្រមព្រៀងដំណើរការគម្រោងនេះការប្តូរប្រាក់បែបនេះអាចធ្វើបាននៅតែក្នុងប្រទេសកម្ពុជាប៉ុណ្ណោះ។
យោងតាមទិន្នន័យរបស់ NBC កាលពីឆ្នាំ ២០១៦ ការប្រើប្រាស់ប្រាក់យន់ចិន ក្នុងការទូទាត់ការដោះដូរទំនិញ និងសេវាជាប្រាក់យន់មានចំនួន ២,៥ ពាន់លានយន់ (ប្រមាណ ៣៧៧ លានដុល្លារ) ឬស្មើនឹង ៧ ភាគរយនៃការទូទាត់ក្នុងទំហំពាណិជ្ជកម្មសរុបរបស់ប្រទេសទាំង ២ ខណៈ ៩៣ ភាគរយទូទាត់ជាប្រាក់ដុល្លារ។
តាមទិន្នន័យ NBC គិតមកទល់ពេលនេះមានធនាគារ ១៧ នៅក្នុងប្រទេសកម្ពុជាដែលប្រតិបត្តិការទូទាត់ពាណិជ្ជកម្មជាប្រាក់យន់កើនឡើងពី ១១ ធនាគារពីឆ្នាំ ២០១៤។ មកដល់ពេលនេះមានធនាគារ ៤ បើកគណនីប្រាក់បញ្ញើជាប្រាក់យន់។
លោក លឹម ហេង អនុប្រធានសភាពាណិជ្ជកម្មកម្ពុជា (CCC) បានឲ្យដឹងថា គំនិតផ្តួចផ្តើមដើម្បីជំរុញការប្រើប្រាស់ប្រាក់យន់ជាការទូទាត់ពាណិជ្ជកម្មគឺជាការល្អ ខណៈពាណិជ្ជករកម្ពុជាបានធ្វើពាណិជ្ជកម្មជាមួយពាណិជ្ជករចិនកាន់តែច្រើនឡើង ជាពិសេសការលក់ចេញនូវកសិផល និងការនាំចូលផលិតផលសម្រេចសម្រាប់ទីផ្សារក្នុងស្រុក។
លោកបន្តថា រហូតមកដល់ពេលនេះ សមាជិករបស់ CCC មួយចំនួនចាប់ផ្តើមប្រើប្រាស់ប្រាក់យន់ក្នុងការទូទាត់ តែយ៉ាងណាក៏ដោយក៏នៅតែពឹងខ្លាំងលើការប្រើប្រាស់ប្រាក់ដុល្លារអាមេរិកនៅពេលជួញដូរជាមួយជនជាតិចិន។
លោកថ្លែងថា៖ «វាមានហានិភ័យខ្លាំង បើយើងពឹងផ្អែកខ្លាំងពេកតែលើរូបិយប័ណ្ណតែមួយក្នុងការទូទាត់ទំនិញពេលធ្វើពាណិជ្ជកម្មជាលក្ខណៈអន្តរជាតិ។ អ៊ីចឹងវាជាការល្អប្រសើរបើយើងមានជម្រើស ហើយអាចប្រើប្រាស់រូបិយប័ណ្ណផ្សេងៗក្នុងការទូទាត់ទំនិញចេញ-ចូល»៕ LA
