ភ្នំពេញៈ កម្ពុជាបានចុះអនុស្សរណៈយោគយល់គ្នាជាមួយអង្គការពាណិជ្ជកម្មក្រៅស្រុកជប៉ុន (Jetro) ដើម្បីជំរុញបរិយាកាសវិនិយោគរវាងប្រទេសទាំង ២ ឲ្យកាន់តែទូលាយ និងបង្កើនភាពទាក់ទាញក្រុមហ៊ុនពីប្រទេសជប៉ុនឲ្យចូលមកវិនិយោគនៅកម្ពុជា។ នេះបើយោងតាមក្រសួងពាណិជ្ជកម្មកម្ពុជា។
អនុស្សរណៈយោគយល់គ្នាដែលចុះហត្ថលេខាកាលពីថ្ងៃម្សិលមិញមានគោលបំណងជួយពង្រឹងបន្ថែមនូវកិច្ចសហប្រតិបត្តិការក្នុងការជំរុញពាណិជ្ជកម្ម វិនិយោគ និងការអភិវឌ្ឍឧស្សាហកម្ម និងបង្កើនភាពជាដៃគូគ្រប់ជ្រុងជ្រោយរវាងក្រសួងពាណិជ្ជកម្មកម្ពុជាជាមួយអង្គការ Jetro។
អនុស្សរណៈនៃការយោគយល់ដែលត្រូវបានចុះហត្ថលេខានៅពេលនេះគឺជាការធ្វើបច្ចុប្បន្នភាពលើអនុស្សរណៈដែលក្រសួងពាណិជ្ជកម្ម និងអង្គការ Jetro បានចុះកាលពីថ្ងៃទី ១៤ ខែធ្នូ ឆ្នាំ ២០០៩។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានលើកឡើងថា អនុស្សរណៈថ្មីនេះនឹងជួយធ្វើឲ្យកិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ និងការអភិវឌ្ឍឧស្សាហកម្មរវាងប្រទេសទាំង ២ កាន់តែល្អបន្ថែមទៀត។
លោកបន្តថា Jetro បាននិងកំពុងធ្វើកិច្ចការជាច្រើននៅកម្ពុជាដែលមានដូចជា ការផ្គូផ្គងធុរកិច្ច ការសិក្សាវិភាគ ការចូលរួមពិព័រណ៍ពាណិជ្ជកម្ម ការជួយសម្របសម្រួលដល់ក្រុមហ៊ុនជប៉ុនចូលមកវិនិយោគនៅកម្ពុជា ការជួយបណ្ដុះបណ្ដាលមន្ត្រី និងវិស័យឯកជនព្រមទាំងជួយសម្រួលយ៉ាងច្រើនដល់ក្រុមហ៊ុនកម្ពុជាក្នុងការទៅចូលរួមក្នុងពិព័រណ៍នៅប្រទេសជប៉ុន។
ការវិនិយោគរបស់ផ្សារទំនើប Aeon នៅកម្ពុជាមួយផ្នែកក៏ទទួលបានការជំរុញពីកិច្ចប្រឹងប្រែងរបស់ Jetro ផងដែរ។
លោកស្រី Yuri Sato នាយិការងនៃអង្គការ JETRO បានឲ្យដឹងថា ការងារថ្មីមួយទៀតរបស់ Jetro នឹងអនុវត្តគឺការជំរុញនវានុវត្តន៍ និងការបង្កើតក្រុមហ៊ុនបច្ចេកវិទ្យាឌីជីថលថ្មីៗ (Innovation and Digital Technology Startup) ជាមួយនឹងការផ្គូផ្គងធុរកិច្ចក្នុងវិស័យនវានុវត្តន៍។
ទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន Jetro បានបង្ហាញថា ពាណិជ្ជកម្មទ្វេភាគីរវាងកម្ពុជា និងជប៉ុនសម្រេចបានជាង ១,០៤ ពាន់លានដុល្លារនៅឆមាសទី ១ ឆ្នាំ ២០១៩ កើនឡើង ១៦ ភាគរយបើធៀបរយៈពេលដូចគ្នាកាលពីឆ្នាំទៅក្នុងនោះការនាំចេញរបស់កម្ពុជាទៅកាន់ប្រទេសជប៉ុន មានទឹកប្រាក់ ៧៩២ លានដុល្លារ ខណៈការនាំចូលមកវិញមានទំហំ ២៥៦ លានដុល្លារ។ កាលពីឆ្នាំ ២០១៨ ទំហំពាណិជ្ជកម្មរវាងប្រទេសទាំង ២ មានតម្លៃ ១,៦ ពាន់លានដុល្លារ៕