ភ្នំពេញ: ក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍បានចុះអនុស្សរណៈយោគយល់គ្នាជាមួយអង្គការមូលនិធិអាស៊ី (TAF) ស្តីពីកិច្ចសហប្រតិបត្តិការគម្រោង Go Digital ASEAN ក្នុងគោលបំណងដើម្បីលើកកម្ពស់ចំណេះដឹងផ្នែកឌីជីថលដល់សហគ្រាសខ្នាតតូចបំផុត តូច និងមធ្យម (MSMEs) នៅតាមទីជនបទនៃប្រទេសកម្ពុជាព្រមទាំងបណ្តាប្រទេសក្នុងតំបន់អាស៊ាន។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្មបានចុះហត្ថលេខាលើអនុស្សរណៈយោគយល់គ្នាជាមួយលោកស្រី Meloney C. Lindberg ប្រធានអង្គការមូលនិធិអាស៊ីប្រចាំនៅកម្ពុជានៅទីស្តីការក្រសួងកាលពីថ្ងៃទី ២៨ ខែសីហា។
សេចក្តីប្រកាសព័ត៌មានបានឲ្យដឹងថា គម្រោងនេះទទួលបានការឧបត្ថម្ភពីក្រុមហ៊ុន Google.Org នូវថវិកាចំនួន ៣,៣ លានដុល្លារ ដែលគម្រោងនេះត្រូវបានអនុវត្តពីដៃគូគម្រោងមួយចំនួនរួមមានអង្គការ STAR Kampuchea អង្គការ DAI Global LLC និងអង្គការ lnSTEDD ILab Southeast Asia។
លោកស្រី Meloney C.Lindberg ប្រធានអង្គការមូលនិធិអាស៊ីបានឲ្យដឹងថា គម្រោងនេះកើតឡើងចំពេលដែលអាជីវកម្មរបស់សហគ្រាសខ្នាតតូច និងមធ្យមនៅកម្ពុជាចាំបាច់ត្រូវការចំណេះដឹង និងជំនាញឌីជីថល ដើម្បីចូលរួមនៅក្នុងសេដ្ឋកិច្ចឌីជីថល ព្រមទាំងរកប្រាក់ចំណូលផ្គត់ផ្គង់គ្រួសារក្នុងអំឡុងពេលរងផលប៉ះពាល់ដោយសារជំងឺកូវីដ ១៩។
លោកស្រីនិយាយថា៖ «ខ្ញុំរីករាយចំពោះការគាំទ្រពេញទីពីក្រសួងឧស្សាហកម្មដើម្បីអនុវត្តគម្រោងនៅថ្នាក់តំបន់ និងក្នុងប្រទេសកម្ពុជា»៕LA