.jpg)
ទិដ្ឋភាពស្ពានអាកាសស្ទឹងមានជ័យ ក្នុងរាជធានីភ្នំពេញ។ ទីក្រុងភ្នំពេញជាទីតាំងរស់នៅតម្លៃសមរម្យសម្រាប់បរទេសចូលនិវត្តន៍។ រ៉ាស់ហ៊ីម
ភ្នំពេញៈ កម្ពុជាបន្តជាប់ចំណាត់ថ្នាក់លេខ ១ ក្នុងនាមជាទីកន្លែងដែលការរស់នៅមានការចំណាយតិចបំផុតសម្រាប់និវត្តជនបរទេស។ នេះបើតាមសន្ទស្សន៍ Annual Global Retirement Index 2019 របស់ International Living។
របាយការណ៍ចុងក្រោយរបស់ទស្សនាវដ្តី International Living ដែលចេញផ្សាយលម្អិតស្តីពីកន្លែងរស់នៅល្អបំផុតក្នុងពិភពលោកសម្រាប់និវត្តជនបរទេស ឆ្នាំ ២០១៩ បានផ្តល់ពិន្ទុឲ្យកម្ពុជា ១០០ លើ ១០០ សម្រាប់ការចំណាយលើការរស់នៅតិចបំផុត។ ប្រទេស វៀតណាម បានឈរនៅលេខ ២ ដោយទទួលបានពិន្ទុ ៩៩ និងប្រទេស ថៃ ជាប់លេខ ៣ មាន ៩៤ ពិន្ទុ ខណៈប៉េរូជាប់លេខ ៤ និង ប៊ុលឡាវៀរស្ថិតនៅលេខ ៥។
ការស្រាវជ្រាវ ក្នុងចំណោមប្រទេសចំនួន ២៥ ដែលស្ថិតក្នុងតារាងរបស់សន្ទស្សន៍ Annual Global Retirement Index 2019 នោះបានផ្តោតលើសូចនាករចំនួន ៤ រួមមាន ហិរញ្ញវត្ថុ សុខភាព ជីវិតកម្សាន្ត និងអភិបាលកិច្ច។
សម្រាប់សូចនាករទាំង ៤ នេះ គឺត្រូវចែកចេញជា ១៣ ប្រភេទរួមមានការទិញ និងវិនិយោគ ការជួល អត្ថប្រយោជន៍ និង ការចុះភាគរយ ទិដ្ឋាការ និង ការស្នាក់នៅ ការចំណាយសម្រាប់រស់នៅ សម្របខ្លួនទៅស្ថានភាពថ្មី ការកម្សាន្ត និង ភាពងាយស្រួលក្នុងការទទួលបានសេវាកម្ម ការថែទាំសុខភាព ការកម្សាន្តប្រកប-ដោយផាសុកភាព ការអភិវឌ្ឍ អាកាសធាតុ អភិបាលកិច្ច និងឱកាស។
កម្ពុជាល្អជាងគេសម្រាប់ការស្នាក់នៅដែលមានតម្លៃទាបសម្រាប់និវត្តជនបរទេស។ បើទោះបីយ៉ាងនេះក្តី យោងតាមសន្ទស្សន៍ដដែល បើគិតពីទីកន្លែងល្អបំផុតក្នុងពិភពលោកសម្រាប់និវត្តជនស្នាក់នៅ ក្នុងឆ្នាំ ២០១៩ កម្ពុជាជាប់ចំណាត់លេខ ១២ ដោយមានពិន្ទុសរុប ៨១,២ ខណៈប្រទេស វៀតណាម ឈរនៅចំណាត់ថ្នាក់លេខ ១៩ ដែលមាន ៧៩,៤ ពិន្ទុ និងស្ថិតនៅក្រោមប្រទេស ថៃ ស្ថិតនៅចំណាត់ថ្នាក់លេខ ៩ ដែលមាន ៨៣,៥ ពិន្ទុ។
លោក តុប សុភ័ក អ្នកនាំពាក្យក្រសួងទេសចរណ៍ កាលពីថ្ងៃម្សិលមិញ បាននិយាយថា បច្ចុប្បន្នកម្ពុជាបានជាប់ជាប្រទេសគោលដៅទេសចរណ៍ពិភពលោក ដោយចំនួនភ្ញៀវទេសចរ និងចំនួននៃនិវត្តជនបរទេសដែលចូលមកស្នាក់នៅកម្ពុជា ដោយកាលពីឆ្នាំ ២០១៨ ភ្ញៀវបរទេសមកកម្ពុជា មានកំណើនប្រមាណ ១០ ភាគរយ បើធៀបនឹងឆ្នាំ ២០១៧។
លោកថ្លែងថា៖ «នេះជាមោទនភាពមួយសម្រាប់កម្ពុជា ខណៈកម្ពុជាជាប់ជាគោលដៅទេសចរណ៍លំដាប់ពិភពលោក [សម្រាប់និវត្តជនបរទេស]»។
លោកប្រាប់ទៀតថា មានកត្តាសំខាន់ចំនួន ៤ ដែលនាំឲ្យកម្ពុជាទទួលបានកំណើនភ្ញៀវទេសចររួមមាន កត្តាសុខសន្តិភាព និងសុវត្ថិភាពពេញលេញ កត្តាអាកាសធាតុដែលមានភាពអំណោយផល ពិសេសសម្រាប់មនុស្សចាស់ ការស្នាក់នៅ និងម្ហូបអាហារ មានតម្លៃសមរម្យ និងគោលនយោបាយរបស់រដ្ឋាភិបាលក្នុងការអនុញ្ញាតឲ្យជនបរទេសមានសិទ្ធិទិញលំនៅឋាននៅកម្ពុជា។
លោកបន្តថា៖ «កម្ពុជាមានអាកាសធាតុល្អ មិនក្តៅពេក ឬត្រជាក់ពេក ដូច្នេះជាលក្ខណៈអំណោយផលសម្រាប់មនុស្សចាស់ក្នុងការមកស្នាក់នៅដើម្បីទទួលបានសុខភាពល្អ និងការរស់នៅមានតម្លៃទាប»។ លោកបន្តថា ដោយសារមានលក្ខណៈអំណោយផលច្រើន កន្លងមកកម្ពុជាក៏ត្រូវបានជនបរទេស ពិសេសនិវត្តជនមួយចំនួន បានចាត់ទុកកម្ពុជាជាផ្ទះទី២ របស់ខ្លួនផងដែរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា កម្ពុជាជាកន្លែងទេសចរណ៍ដ៏ល្អមិនថាតែសម្រាប់និវត្តជន អ្នកសិក្សាស្រាវជ្រាវ ឬអ្នកទេសចរនោះទេ គឺកម្ពុជាមានជម្រើសច្រើនសម្រាប់ពួកគេ។
លោកស្រីបន្តថា របាយការណ៍ស្រាវជ្រាវនេះនឹងជួយឲ្យកម្ពុជាទទួលបានភ្ញៀវទេសចរទូទៅចូលមកស្នាក់នៅកម្ពុជាបានកាន់តែយូរផងដែរ។ លោកស្រី បានថ្លែងថា៖ «តាមរយៈរបាយការណ៍នេះនឹងជួយឲ្យកម្ពុជាទទួលបានចំនួនភ្ញៀវទេសចរពិសេសនិវត្តជនចូលមកស្នាក់នៅបានកាន់តែច្រើន និងយូរ ព្រោះកម្ពុជាមានជម្រើសច្រើនទៅតាមការចង់បានរបស់ពួកគេ»។
ទោះបីយ៉ាងណាបើតាមលោកស្រី ស៊ីវលីន រហូតមកដល់ពេលនេះចំនួននិវត្តជនបរទេស ដែលចូលមកស្នាក់នៅកម្ពុជា មិនទាន់មានចំនួនច្រើនដូចប្រទេសជិតខាងនោះទេ៕ LA
