.jpg)
កូនដើមកៅស៊ូដែលត្រូវបានបណ្តុះនៅចម្ការកៅស៊ូមួយក្នុងខេត្តរតនគិរីកន្លងមក។ វៀតណាមភាគច្រើនវិនិយោគលើដំណាំកៅស៊ូនៅកម្ពុជា។ ហេង ជីវ័ន
ភ្នំពេញៈ កម្ពុជាជាគោលដៅវិនិយោគក្រៅប្រទេសទី ២ របស់វៀតណាមនៅឆមាសទី ១ ឆ្នាំ ២០១៨ ដោយទទួលបានទឹកប្រាក់វិនិយោគ ៣២ លានដុល្លារ ក្នុងចំណោមគម្រោងវិនិយោគក្រៅប្រទេសវៀតណាមសរុប ២៦៣ លានដុល្លារ។ នេះបើតាមទិន្នន័យពីការិយាល័យស្ថិតិទូទៅរបស់ ក្រសួងផែនការ និងវិនិយោគវៀតណាម។
តាមតួលេខបានពីការិយាល័យស្ថិតិវៀតណាម (GSO) នៅអំឡុងចាប់ពីខែមករា ដល់ខែមិថុនា ឆ្នាំនេះ ក្រុមហ៊ុនរបស់ប្រទេសវៀតណាម បានវិនិយោគសរុប ២៦៣ លានដុល្លារនៅក្នុងប្រទេស ២៧ នៅក្រៅប្រទេសវៀតណាម ហើយក្នុងចំណោមនោះប្រទេសឡាវជាប់ចំណាត់ថ្នាក់ទី ១ ដោយមានការវិនិយោគសរុប ៣១,៩ ភាគរយ ខណៈដែលប្រទេសកម្ពុជាមានចំណាត់ថ្នាក់ទី ២ ដោយមានការវិនិយោគសរុប ១២,៣ ភាគរយ។
លោក លឹម ហេង អនុប្រធានសភាពាណិជ្ជកម្មកម្ពុជា (CCC) បានថ្លែងកាលពីថ្ងៃពុធថា ការវិនិយោគរបស់ វៀតណាមនៅកម្ពុជាភាគច្រើនវិនិយោគលើវិស័យកសិកម្ម ក្រុមហ៊ុនលក់រាយ និងវិស័យហិរញ្ញវត្ថុ។
លោក បានសង្កេតឃើញថា លំហូរចូលការវិនិយោគរបស់ប្រទេសវៀតណាមមកកម្ពុជា បង្ហាញកំណើនយឺត ក្នុងរយៈពេល ២-៣ ឆ្នាំចុងក្រោយនេះ ខណៈលំហូរចូលការវិនិយោគរបស់ប្រទេសចិន កំពុងបង្កើនល្បឿនយ៉ាងខ្លាំង។
លោកថ្លែងថា៖ «ការទទួលបានការវិនិយោគផ្ទាល់ពីបរទេសកាន់តែច្រើន មកប្រទេសរបស់យើង នឹងជួយបង្កើតការងារ និងធ្វើពិធីកម្មសេដ្ឋកិច្ចរបស់យើង»។
លោកបន្ថែមថា ប្រទេសកម្ពុជា បានរក្សាការកែលម្អបរិស្ថានការវិនិយោគ ដូច្នេះប្រទេសនេះនឹងទទួលបានការវិនិយោគផ្ទាល់ពីបរទេស (FDI) កាន់តែច្រើនឡើងៗនៅពេលអនាគត។
តំណាងសា្ថនទូតវៀតណាមប្រចាំនៅកម្ពុជា មិនអាចទាក់ទងសុំការអត្ថាធិប្បាយបានទេកាលពីម្សិលមិញ។ យោងតាម GSO ក្នុងអំឡុងឆមាសទី ១ ឆ្នាំនេះ ការវិនិយោគក្រៅប្រទេសរបស់វៀតណាមលើវិស័យហិរញ្ញវត្ថុ និងធនាគារបានកើនឡើង ដោយមានទុនវិនិយោគសរុបរហូតដល់ ១០៦,២ លានដុល្លារ ឬ ៤០,៤ ភាគរយនៃទុនវិនិយោគសរុបនៅបរទេសក្នុងអំឡុងពេលនេះរបស់ប្រទេសវៀតណាម។
វិស័យកសិកម្ម រុក្ខាប្រមាញ់ និងអាហារសមុទ្រ បានជាប់ចំណាត់ថ្នាក់ទី ២ ដោយមានតម្លៃ ៦៣,៧៩ លានដុល្លារ បន្ទាប់មកឧស្សាហកម្មកែច្នៃ និងឧស្សាហកម្មផលិតកម្ម មានការវិនិយោគសរុប ៤៨,៩ លានដុល្លារ៕
