ភ្នំពេញៈ កម្ពុជាត្រូវបានវាយតម្លៃល្អជាងមុន ៤ ចំណាត់ថ្នាក់ទាក់ទងនឹងភាពសកម្មក្នុងការតភ្ជាប់ទៅពិភពលោក ខណៈរបាយការណ៍ប្រចាំឆ្នាំ ២០១៨ ស្តីពីសន្ទស្សន៍តភ្ជាប់ទៅកាន់ពិភពលោក ដែលសិក្សាដោយក្រុមហ៊ុនឡូជីស្ទីក DHL បានឲ្យចំណាត់ថ្នាក់កម្ពុជា ៤៩ ក្នុងចំណោមប្រទេសសរុប ១៦៩។
ការសិក្សាលើកមុន ដែលក្រុមហ៊ុន DHL បានចេញផ្សាយនៅឆ្នាំ ២០១៥ បានចាត់ថ្នាក់កម្ពុជាស្ថិតក្នុងលេខរៀងទី ៥៣ ក្នុងចំណោមប្រទេសសរុប ១៦៩។
DHL បានចេញផ្សាយរបាយការណ៍លើកទី៥ របស់ខ្លួននៃសន្ទស្សន៍ការតភ្ជាប់ទៅកាន់ពិភពលោក (GCI DHL) ជាការវិភាគលម្អិតមួយនៃសកលភាវូបនីយកម្ម ដែលបានវាស់វែងដោយលំហូរជាអន្តរជាតិនៃពាណិជ្ជកម្ម មូលធន ព័ត៌មាន និងប្រជាជន។ គោលបំណងនេះ ដើម្បីបង្ហាញទំហំលំហូរជាអន្តរជាតិរបស់ប្រទេសទាក់ទងនឹងសកម្មភាពក្នុងស្រុក។
លោក Frank Appel អគ្គនាយកក្រុមហ៊ុន Deutsche Post DHL Group ដែលជាក្រុមហ៊ុនមេរបស់ DHL បានឲ្យដឹងនៅក្នុងរបាយការណ៍នេះថា ការធ្វើសកលភាវូបនីយកម្ម បានផ្លាស់ប្ដូរយ៉ាងខ្លាំង នូវរបៀបរស់នៅរបស់ប្រជាជន និងពិភពលោកសព្វថ្ងៃ ដែលត្រូវបានតភ្ជាប់មិនដូចពីមុននោះទេ។
លោកបានថ្លែងថា៖ «សម្រាប់បុគ្គល នេះអាចមានន័យថា ភាពសម្បូរបែបផ្នែកវប្បធម៌កាន់តែច្រើន ជម្រើសកាន់តែច្រើន ដើម្បីរៀនសូត្រ និងការអភិវឌ្ឍ។ សម្រាប់ក្រុមហ៊ុន ការធ្វើសកលភាវូបនីយកម្ម កំពុងបើកចំហទីផ្សារ និងឱកាសថ្មី»។ លោកបន្តថា៖ «សម្រាប់ប្រទេសជាច្រើន ការផ្លាស់ប្តូរទៅរកការធ្វើសមាហរណកម្មទៅក្នុងលំហូរឆ្លងកាត់ព្រំដែន កំពុងប្រែក្លាយទៅជាការអភិវឌ្ឍ និងនវានុវត្តន៍កាន់តែរហ័ស»។
របាយការណ៍ឆ្នាំ ២០១៨ របស់ GCI បង្ហាញថា ប្រទេសឈានមុខគេទាំង ១០ ដែលកម្ពុជាមានលំហូរ រួមមានចិនមានចំណែក ១៧ ភាគរយ ថៃ ១៧ ភាគរយ វៀតណាម ១១ ភាគរយ អាមេរិក ៩ ភាគរយ កូរ៉េ ៤ ភាគរយ ជប៉ុន ៤ ភាគរយ សិង្ហបុរី ៤ ភាគរយ ចក្រភពអង់គ្លេស ៣ ភាគរយ ប្រទេស ឡាវ ៣ ភាគរយ និងលំហូររបស់កម្ពុជាជាមួយបារាំងមាន ៣ ភាគរយ។
កម្ពុជា គឺជាប្រទេសមួយស្ថិតក្នុងចំណោមប្រទេស ៤ ផ្សេងទៀត រួមមានម៉ាឡេស៊ី ម៉ូហ្សំប៊ិក សិង្ហបុរី និងវៀតណាម ដែលមានលំហូរជាអន្តរជាតិ លើសពីការរំពឹងទុកភាគច្រើនបំផុតក្នុងរបាយការណ៍ឆ្នាំ ២០១៨ របស់ GCI នេះ។
ចំណាត់ថ្នាក់របស់កម្ពុជាទាក់ទងនឹងសកម្មភាពលំហូរធៀបនឹងសកម្មភាពក្នុងស្រុកបានកើនឡើងយ៉ាងខ្លាំងនៅ ១ ទសវត្សរ៍ចុងក្រោយ ដោយមានចំណាត់ថ្នាក់ ២៧ នៅក្នុងរបាយការណ៍ ២០១៨ ទល់នឹង ៤៦ កាលពីឆ្នាំ ២០០៨។
ក្នុងនាមជាប្រទេសចំណូលមធ្យមកម្រិតទាប ចំណាត់ថ្នាក់របស់កម្ពុជាទាក់ទងនឹងសកម្មភាពលំហូរធៀបនឹងសកម្មភាពក្នុងស្រុកនៅមានកម្រិតទាបនៅឡើយ តែយ៉ាងណាវាបានកើនលើសអ្វីដែលបានរំពឹងទុក។
របាយការណ៍ GCI ឆ្នាំ ២០១៨ បង្ហាញថា ប្រទេសតភ្ជាប់ទៅកាន់ពិភពលោកភាគច្រើនបំផុតរបស់ពិភពលោក គឺប្រទេស ហូឡង់ សិង្ហបុរី ស្វ៊ីស បែលហ្ស៊ិក អារ៉ាប់រួមអេមីរ៉ាត អៀរឡង់ លុចសំបួ ដាណឺម៉ាក ចក្រភពអង់គ្លេស និងអាល្លឺម៉ង់។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានឲ្យដឹងកាលពីម្សិលមិញថា ប្រទេស កម្ពុជា មានការរីកចម្រើនផ្នែកដឹកជញ្ជូន និងប្រព័ន្ធទូរគមនាគមន៍ ដែលជួយសម្រួលលំហូរជាអន្តរជាតិកាន់តែច្រើន។
លោក ចន្ធី រំពឹងថា ពាណិជ្ជកម្មអន្តរជាតិ មូលធន ព័ត៌មាន និងលំហូរប្រជាជននឹងត្រូវបានរំពឹងថា នឹងកើនឡើងបន្ថែមទៀតនៅពេលអនាគត។
លោកបានថ្លែងថា៖ «លំហូរទំនិញ និងប្រជាជនបច្ចុប្បន្ន នៅក្នុងប្រទេស កម្ពុជា បច្ចុប្បន្ន គឺទៅដល់ពិភពលោកកាន់តែច្រើនជាងកាលពីពេលកន្លងមក ជាពិសេសនៅក្នុងរយៈពេល ២ ឬ៣ ឆ្នាំចុងក្រោយនេះ ដោយសារតែយើងបានបង្កើតបណ្ដាញឡូជីស្ទីកកាន់តែប្រសើរជាមួយពិភពលោក»។
លោកបន្តថា៖ «ផលិតផលដែលផលិតនៅកម្ពុជា កំពុងចូលទៅទីផ្សារអន្តរជាតិកាន់តែច្រើនឡើងៗ។ ពេលទំនិញលំហូរកាន់តែច្រើន ប្រជាជនក៏កើនឡើងផងដែរ»៕LA