.jpg)
ទិដ្ឋភាពពលករដែលចូលបំពេញបែបបទទៅធ្វើការនៅប្រទេសថៃនៅច្រកព្រំដែនអន្តរជាតិ ប៉ោយប៉ែតកន្លងមក។ ហេង ជីវ័ន
ភ្នំពេញៈ នាយកដ្ឋានពាណិជ្ជកម្មបរទេសរបស់ថៃ (DFT) នឹងរៀបចំព្រឹតិ្តការណ៍ភាពជាដៃគូសេដ្ឋកិច្ចថៃ-កម្ពុជា ដែលរដ្ឋាភិបាលប្រទេសទាំង ២ និងវិស័យឯកជន ត្រូវបានអញ្ជើញឲ្យចូលរួមផ្សព្វផ្សាយពាណិជ្ជកម្ម និងការវិនិយោគ។ នេះបើតាមសេចក្តីរាយការណ៍របស់កាសែត The Nation។
ព្រឹត្តិការណ៍នេះនឹងមានកម្មវិធីសកម្មភាពផ្គូផ្គងអាជីវកម្មសម្រាប់វិស័យ ៤ ដែលគេរំពឹងថានឹងធ្វើឲ្យមានកើតមានពាណិជ្ជកម្មភា្លមៗ ដែលមានតម្លៃជាង ៣០ លានបាត និងការផ្ដល់យោបល់ស្ដីពីរបៀបក្នុងការចូលទីផ្សារកម្ពុជា។
លោក Adul Chotinisakorn អគ្គនាយក DFT ឲ្យដឹងថា ភាពជាដៃគូសេដ្ឋកិច្ចតាមព្រំដែនថៃ-កម្ពុជា នឹងត្រូវធ្វើឡើងនៅថ្ងៃទី ២៥ និង ២៦ ខែមីនា ដោយមានគោលបំណងបង្កើនទំនាក់ទំនងទ្វេភាគី ក្នុងកម្រិតមូលដ្ឋាន និងការពង្រីកពាណិជ្ជកម្មនៅតាមព្រំដែន។ ព្រឹត្តិការណ៍នេះអនុវត្តតាមយុទ្ធសាស្ត្រកំណើននៃកិច្ចសហប្រតិបត្តិការរបស់ខេត្តតាមព្រំដែន ដែលត្រូវបានចុះហត្ថលេខាដោយរដ្ឋមន្ដ្រីក្រសួងពាណិជ្ជកម្មថៃ និងកម្ពុជាកាលពីឆ្នាំមុន។
ឆ្នាំនេះ មន្ដ្រីជាន់ខ្ពស់មកពីក្រសួងពាណិជ្ជកម្មរបស់ប្រទេស កម្ពុជា ព្រមទាំងតំណាងជាច្រើនមកពីរដ្ឋាភិបាល និងវិស័យឯកជន មកពីខេត្តជាប់ព្រំដែន នៅក្នុងប្រទេសទាំង ២ ត្រូវបានរំពឹងថា នឹងចូលរួមក្នុងកិច្ចប្រជុំនេះ។ ភារកិច្ចរបស់ពួកគេនឹងកំណត់ដំណោះស្រាយល្អបំផុតក្នុងការជំរុញ និងការលើកកម្ពស់ ពាណិជ្ជកម្ម និងការវិនិយោគតាមព្រំដែន ព្រមទាំងកិច្ចសហប្រតិបត្តិការ លើទិដ្ឋភាពផ្សេងៗ។
ព្រឹត្តិការណ៍នេះត្រូវបានដាក់បញ្ចូលនូវសកម្មភាពមួយចំនួន រួមកិច្ចប្រជុំផ្គូរផ្គងអាជីវកម្មរវាងសហគ្រិនរបស់ប្រទេស ថៃ និងសហគ្រិនរបស់ប្រទេស កម្ពុជា មកពីវិស័យ ៤ គឺ អាហារ និងភេសជ្ជៈ ទំនិញប្រើប្រាស់ (ផលិតផលសុខភាព និងសម្ជស្ស) គ្រឿងចក្រកសិកម្ម និងរថយន្ត (រួមទាំងគ្រឿងបន្លាស់ម៉ូតូ និងគ្រឿងបន្លាស់រថយន្ត)។
លោក រំពឹងថា សកម្មភាពនេះនឹងនាំឲ្យមានកិច្ចព្រមព្រៀងពាណិជ្ជកម្មភ្លាមៗ មានតម្លៃ ៣០ លានបាត ដែលបង្ហាញនៅក្នុងវិស័យអាហារ និងភេសជ្ជៈ និងទំនិញប្រើប្រាស់ ដោយសារតែមានសក្ដានុពលយ៉ាងខ្លាំង។
ពាណិជ្ជកម្មតាមព្រំដែនរវាងប្រទេសទាំង ២ នេះ បានទទួលកំណើនខ្លាំងក្នុងរយៈពេល ២-៣ ឆ្នាំចុងក្រោយនេះ។ កាលពីឆ្នាំមុន ពាណិជ្ជកម្មតាមព្រំដែនរបស់ថៃ និងកម្ពុជា មានតម្លៃ ៤៥,៧៩ ពាន់លានបាត កើនឡើង ១៦ ភាគរយ។
DFT ជឿជាក់ថា ព្រឹត្តិការណ៍ភាពជាដៃគូសេដ្ឋកិច្ចតាមព្រំដែនថៃ និងកម្ពុជា នឹងមិនគ្រាន់តែជំរុញសេដ្ឋកិច្ចរបស់ប្រទេសទាំង ២ ប៉ុណ្ណោះទេ ប៉ុន្តែថែមទាំងនឹងបង្កើនតម្លៃពាណិជ្ជកម្មតាមព្រំដែនផងដែរ៕LA
