ភ្នំពេញ: កម្ពុជា និងថៃ បានឯកភាពបន្តពិភាក្សាឡើងវិញពីគម្រោងអភិវឌ្ឍន៍ប្រេង និងឧស្ម័ននៅតំបន់អះអាងត្រួតស៊ីគ្នាក្នុងឈូងសមុទ្រថៃជាប់ព្រំដែនទឹករវាងប្រទេសទាំង ២។ នេះបើតាមអ្នកនាំពាក្យក្រសួងរ៉ែ និងថាមពលកម្ពុជា។
លោក ជៀប សួរ អ្នកនាំពាក្យក្រសួងរ៉ែ និងថាមពលបានប្រាប់ភ្នំពេញប៉ុស្តិ៍កាលពីថ្ងៃចន្ទម្សិលមិញថា ក្រោយពីបញ្ចប់កិច្ចប្រជុំរដ្ឋមន្ត្រីថាមពលអាស៊ានលើក ៣៧ នៅទីក្រុងបាងកកកាលពីថ្ងៃទី ៦ ខែ កញ្ញា តាមលទ្ធផលនៃកិច្ចប្រជុំនេះភាគីកម្ពុជា និងថៃបានឯកភាពគ្នាបន្តពិភាក្សាឡើងវិញពីគម្រោងអភិវឌ្ឍន៍ថាមពលនៅតំបន់ដែលអះអាងថាត្រួតស៊ីគ្នាដែលបានពន្យារពេលជាយូរមកហើយ។
លោកថ្លែងថា៖ «ភាគីទាំង ២ បានឯកភាពគ្នាក្នុងការបន្តពិភាក្សារកដំណោះស្រាយនៅតំបន់ [អះអាង] ត្រួតស៊ីគ្នារវាងកម្ពុជា និងថៃដោយរដ្ឋមន្ត្រីថាមពលថៃបានបង្ហាញឆន្ទៈធ្វើការជាមួយកម្ពុជាក្នុងការស្វែងរកដំណោះស្រាយ»។
ទោះបីយ៉ាងនេះក្តីលោក ជៀប សួរ ថ្លែងថាភាគីទាំង ២ មិនទាន់បានកំណត់ពេលជាក់លាក់ ដើម្បីពិភាក្សានៅឡើយទេ។
សិទ្ធិអភិវឌ្ឍន៍នៅលើតំបន់អះអាងត្រួតស៊ីគ្នា ទំហំ ២៦ ០០០ គីឡូម៉ែត្រការ៉េរវាងប្រទេសកម្ពុជា និងថៃក្នុងឈូងសមុទ្រថៃជាតំបន់ជម្លោះដែលភាគីទាំង ២ បានទាមទាររៀងៗខ្លួនតាំងពីដើមទសវត្សរ៍ឆ្នាំ ១៩៧០។
អនុស្សរណៈយោគយល់គ្នា ដើម្បីរុករករួមគ្នាក្នុងតំបន់នោះត្រូវបានចុះហត្ថលេខាកាលពីឆ្នាំ ២០០១ ប៉ុន្តែក្រោយមករដ្ឋាភិបាលថៃបានទុកចោលនៅឆ្នាំ ២០០៩។ ប៉ុន្តែកិច្ចពិភាក្សាពីកិច្ចខិតខំប្រឹងប្រែងរួមគ្នាដើម្បីរុករកប្រេង និងឧស្ម័នបានកើតឡើងវិញ នៅពេលដែលលោកស្រី យីងឡាក់ ស៊ីណាវ៉ាត្រា ប្អូនស្រីរបស់លោក ថាក់ស៊ីន បានឡើងកាន់តំណែងជានាយករដ្ឋមន្ត្រីនៅឆ្នាំ ២០១១។ ប៉ុន្តែត្រូវផ្អាកវិញចាប់តាំងពីលោកស្រី យីងឡាក់ អស់តំណែងកាលពីខែ ឧសភា ឆ្នាំ ២០១៤។ តំបន់អះអាងត្រួតស៊ីគ្នានេះត្រូវបានគេប៉ាន់ប្រមាណថា មានប្រេង និងឧស្ម័ន ៥០០ លានបារ៉ែល នៅក្រោមបាតសមុទ្រ។
ទោះបីយ៉ាងនេះក្តីលោក ជៀប សួរ សង្ឃឹមថាការជួបពិភាក្សាលើកនេះនឹងទទួលបានលទ្ធផលវិជ្ជមានបន្ទាប់ពីគម្រោងនេះត្រូវបានពន្យារពេលជាច្រើនឆ្នាំ។ លោកបានថ្លែងថា៖ «[ការអភិវឌ្ឍនោះ] ដើម្បីបានផលប្រយោជន៍ពីធនធានយកមកប្រើប្រាស់ក្នុងការអភិវឌ្ឍប្រទេសជាតិយើង ហើយជាសន្តិសុខថាមពលសម្រាប់យើង»។
លោកបន្តថា៖ «បន្ទាប់ពីមានការឯកភាពគ្នា ភាគីទាំង ២ នឹងធ្វើការសិក្សាស្រាវជ្រាវតំបន់ [ត្រួតស៊ីគ្នា] ព្រោះតំបន់នោះមិនទាន់មាននរណាហ៊ានធ្វើការសិក្សានោះទេ»។
នៅក្នុងចក្ខុវិស័យថាមពលអាស៊ីអាគ្នេយ៍កាលពីឆ្នាំ ២០១៣ របស់ទីភ្នាក់ងារថាមពលអន្តរជាតិ (IEA) បានឲ្យដឹងថាត្រឹមឆ្នាំ ២០៣៥ ការផលិតឧស្ម័នរបស់ប្រទេសថៃត្រូវបានរំពឹងថា នឹងធ្លាក់ចុះ ៧៥ ភាគរយ ខណៈតម្រូវការក្នុងស្រុកសម្រាប់ឧស្ម័នធម្មជាតិនឹងកើនឡើងក្នុងអំឡុងពេលនោះ។ IEA បានលើកឡើងថា OCA នឹងផ្ដល់អត្ថប្រយោជន៍ដល់ចក្ខុវិស័យថាមពលរបស់ប្រទេសថៃទៅដល់ឆ្នាំ ២០៣៥។
លោក Sontirat Sontijirawong រដ្ឋមន្ត្រីថាមពលប្រទេសថៃបានប្រាប់កាសែត The Nation ដោយសង្ឃឹមថា កម្ពុជា និងថៃ អាចឈានដល់កិច្ចព្រមព្រៀងមួយដែលស្រដៀងគ្នានឹងតំបន់អភិវឌ្ឍន៍រួមគ្នារវាងម៉ាឡេស៊ី និងថៃដែលអនុញ្ញាតឲ្យប្រទេសនីមួយៗអាចទាញយក ៥០ ភាគរយ នៃទិន្នផលឧស្ម័នសរុបក្នុងតំបន់នោះ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីកាលពីថ្ងៃម្សិលមិញបានស្វាគមន៍ចំពោះភាគីទាំង ២ ដែលបានឯកភាពគ្នាបន្តពិភាក្សាពីគម្រោងអភិវឌ្ឍន៍ថាមពលនៅតំបន់អះអាងត្រួតស៊ីគ្នានេះ ហើយថាវាអាចឈានទៅរកដំណោះស្រាយ។ លោកថ្លែងថា៖ «នេះជារឿងល្អមានភាពវិជ្ជមានព្រោះភាគីទាំង ២ យល់ស្របការបែងចែកខ្សែខណ្ឌសីមារវាងប្រទេសទាំង ២ បន្ទាប់ពីនេះទៅគេបែងចែកផលគ្នាអាស្រ័យលើការពិភាក្សាគ្នា»។
បច្ចុប្បន្ននេះកម្ពុជាកំពុងស្វែងរក និងការទាញយកប្រេងនៅក្នុងសមុទ្ររបស់ខ្លួននៅក្នុងប្លុក A ដែលត្រូវបានអភិវឌ្ឍដោយក្រុមហ៊ុន KrisEnergy Ltd មានមូលដ្ឋាននៅក្នុងប្រទេស សិង្ហបុរី។ ក្រុមហ៊ុននេះបញ្ជាក់ថា ខ្លួននឹងអាចសម្រេចបានតាមការគ្រោងទុកក្នុងការទាញយកដំណក់ប្រេងជាលើកដំបូងរបស់ខ្លួននៅចុងឆ្នាំ ២០១៩ នេះ។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបានឲ្យដឹងកាលពីខែ សីហា ឆ្នាំ ២០១៧ ថា ប្លុក A ត្រូវបានគេជឿជាក់ថានឹងមានប្រេងប្រហែល ៣០ លានបារ៉ែល ដែលអាចទាញយកបានរហូតដល់រយៈពេល ៩ ឆ្នាំ៕LA