កំពង់ចាមៈ កម្ពុជាបាននាំចេញសន្លឹកថ្នាំស្ងួតជាង ១ ០០០ តោនទៅវៀតណាមកាលពីឆ្នាំ ២០១៧ ដែលមានតម្លៃជាង ២ លានដុល្លារ កើនឡើង ២៤ ភាគរយ។ នេះបើយោងតាមតួលេខបានពីក្រសួងពាណិជ្ជកម្ម។
ទិន្នន័យដែលបានផ្ដល់ដោយ លោក ឡុង កែមវិចិត្រ អ្នកនាំពាក្យក្រសួងពាណិជ្ជកម្ម បង្ហាញថា កម្ពុជាបាននាំចេញថ្នាំជក់សរុប ១ ២០០ តោនទៅវៀតណាម ស្មើនឹង ២,៣៧ លានដុល្លារ ធៀបនឹង ៩៨៩, ៧៥ តោនកាលពីឆ្នាំ ២០១៦ ដែលមានតម្លៃ ១,៩១ លានដុល្លារ។
កម្ពុជា និងវៀតណាម បានយល់ព្រមក្នុងការផ្ដល់ការអនុគ្រោះពន្ធលើផលិតផលកសិកម្ម ចូលក្នុងប្រទេសទាំង២ទៅវិញទៅមក ដោយមិនគិតពន្ធកាលពីឆ្នាំ ២០១៦។
ស្ថិតក្រោមកិច្ចព្រមព្រៀងនេះ វៀតណាម បានអនុញ្ញាតឲ្យ កម្ពុជា នាំចេញស្លឹកថ្នាំជក់ដោយរួចពន្ធ ៣ ០០០ តោនក្នុង ១ ឆ្នាំ ទៅវៀតណាមចាប់ពីឆ្នាំ ២០១៦ ដល់ឆ្នាំ ២០១៧។
ប៉ុន្តែ មកដល់ពេលនេះគេនៅមិនច្បាស់នៅឡើយទេថា កិច្ចព្រមព្រៀងនេះនឹងបន្តទៀតឬយ៉ាងណា? នេះបើយោងតាមលោក ឡុង កែមវិចិត្រ។ លោកលើកឡើងថា៖ «យើងមិនមានការធ្វើបច្ចុប្បន្នភាពព័ត៌មាននៅឡើយទេទាក់ទងនឹងកិច្ចព្រមព្រៀងថ្នាំជក់ជាមួយវៀតណាមមកដល់ពេលនេះ»។
កម្ពុជា បានផលិតថ្នាំជក់ ៩ ០៨៩ តោនកាលពីរដូវប្រមូលផលមុន កើនឡើង ៣៧ ភាគរយ ធៀបនឹងរដូវប្រមូលផលឆ្នាំ ២០១៦។ នេះបើយោងតាមតួលេខបានពីក្រសួងកសិកម្ម។ តំបន់ដាំដុះក៏កើនឡើងដល់ ៦ ៨៥៩ ហិកតាផងដែរ ដែលកើនឡើង១៩ភាគរយធៀបនឹងឆ្នាំ ២០១៦។
កំពង់ចាម គឺជាកន្លែងដាំដុះថ្នាំជក់ច្រើនជាងគេ។ ក្រៅពីការនាំចេញ ថ្នាំជក់ត្រូវបានផ្គត់ផ្គង់ដល់ក្រុមហ៊ុនថ្នាំជក់ អង់គ្លេស អាមេរិក (BAT) មានមូលដ្ឋាននៅកម្ពុជា ស្ថិតក្រោមប្រព័ន្ធ «ការធ្វើកសិកម្មតាមកិច្ចសន្យា»។ នេះបើយោងតាមលោក គីម សាវឿន ប្រធានមន្ទីរកសិកម្មខេត្ត កំពង់ចាម។លោកបន្តថា ខេត្តនេះ មានផ្ទៃដីដាំដុះថ្នាំជក់សរុបចន្លោះពី ១ ៦០០ ហិកតា ទៅ ១ ៨០០ ហិកតា។
លោកថ្លែងថា៖ «ទំហំផ្ទៃដីដាំដុះ មិនផ្លាស់ប្តូរច្រើននោះទេ កសិករនៅទីនេះផលិតថ្នាំជក់ សម្រាប់ឲ្យក្រុមហ៊ុនបារីមួយនៅភ្នំពេញ ហើយផ្នែកនៅសល់ត្រូវលក់ឲ្យប្រទេស វៀតណាម តាមរយៈឈ្មួញ»។
លោក នាង ប្រុស ជាឈ្មួញម្នាក់នៅក្នុងស្រុកស្ទឹងត្រង់ ខេត្ត កំពង់ចាម ដែលបានប្រមូលទិញថ្នាំជក់ពីកសិករបានឲ្យដឹងថា តម្លៃថ្នាំជក់ស្ងួតដែលលោកទិញពីកសិករ មានតម្លៃប្រហែល ៨ ០០០ រៀលក្នុង ១ គីឡូក្រាម អាស្រ័យលើគុណភាព របស់សន្លឹកថ្នាំស្ងួត។ លោកថ្លែងថា៖ «មានអ្នកទិញជាច្រើនបានមកទិញបន្តពីខ្ញុំ។ ទីផ្សារនេះប្រសើរជាង ១ ឆ្នាំមុន ប៉ុន្តែតម្លៃមិនខុសគ្នាខ្លាំងនោះទេ»៕ LA