.jpg)
ស្បែកជើងដាក់តាំង ក្នុងហាងលក់សែ្បកជើងមួយកន្លែងនៅរាជធានីភ្នំពេញ។ ភ្នំពេញ ប៉ុស្តិ៍
ភ្នំពេញៈ ការនាំចេញសម្លៀកបំពាក់ និងស្បែកជើងរបស់ប្រទេសកម្ពុជាបានមើលឃើញកំណើនយ៉ាងខ្លាំងដល់ប្រមាណ ៤ ពាន់លានដុល្លារនៅឆមាសទី ១ ឆ្នាំនេះជាកំណើន ២ ខ្ទង់ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ NBC។
ជាមួយនឹងកំណើនដ៏ខ្លាំងនេះអ្នកនៅក្នុងឧស្សាហកម្មនេះលើកឡើងថា ប្រហែលដោយសារតែការលក់កាន់តែរឹងមាំទៅកាន់ទីផ្សារអាមេរិក។
របាយការណ៍ពាក់កណ្ដាលឆ្នាំរបស់ធនាគារជាតិនៃកម្ពុជា (NBC) បង្ហាញថា ការនាំចេញសម្លៀកបំពាក់ និងស្បែកជើងរបស់កម្ពុជារួមបញ្ចូលគ្នាមានតម្លៃប្រមាណ ៤ ពាន់លានដុល្លារកើនឡើង ១១ ភាគរយធៀបនឹងរយៈពេលដូចគ្នាកាលពីឆ្នាំ ២០១៦។ ល្បឿនកំណើននេះកើនឡើងជិត ២ ដងធៀបនឹងកំណើន ៦,៩ ភាគរយកាលពីឆមាសទី ១ ឆ្នាំ ២០១៧។ នេះបើតាមរបាយការណ៍។
បើទោះបីយ៉ាងនេះក្តីរបាយការណ៍របស់ NBC មិនបានផ្ដល់ព័ត៌មានលម្អិតពីមូលហេតុនៃកំណើននេះទេ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) បានថ្លែងថា កំណើននេះអាចរួមចំណែកដោយសារប្រតិបត្តិការកាន់តែប្រសើរនៃសេដ្ឋកិច្ចពិភពលោក ជាពិសេសទិសដៅទីផ្សារកម្ពុជាដូចជា អាមេរិក និងសហភាពអឺរ៉ុប។
លោកបានថ្លែងថា៖ «យើងបានមើលឃើញកំណើនដ៏រឹងមាំនៃការនាំចេញសម្លៀកបំពាក់ និងផលិតផលស្បែកជើងទៅទីផ្សារអាមេរិកនៅឆមាសទី ១ ឆ្នាំនេះ»។
លោក ម៉ូនីកា បន្តថាការនាំចេញទំនិញធ្វើដំណើរបានកើនឡើងគួរឲ្យកត់សម្គាល់ បន្ទាប់ពីកម្ពុជាទទួលបានប្រព័ន្ធអនុគ្រោះពន្ធ (GSP) នាំចេញដោយរួចពន្ធទៅអាមេរិកចាប់តាំងពីខែកក្កដា ឆ្នាំ ២០១៦។
លោកបានថ្លែងថា៖ «មុនពេលយើងទទួលបានប្រព័ន្ធ GSP ការនាំចេញទំនិញធ្វើដំណើរទៅអាមេរិកមានតម្លៃប្រហែល ៥០ លានដុល្លារក្នុងមួយឆ្នាំប៉ុណ្ណោះ»។ លោកបានបន្តថា៖ «គ្រាន់តែក្នុងរយៈពេល ៦ ខែនៅឆ្នាំនេះប៉ុណ្ណោះ [បន្ទាប់ពីទទួលបាន GSP] យើងអាចនាំចេញទំនិញដែលទាក់ទងនឹងការធ្វើដំណើរក្នុងតម្លៃ ១៦០ លានដុល្លារ»។
ទោះបីជាយ៉ាងនេះក្តីការនាំចេញមានកំណើនយឺតទៅទីផ្សារសហភាពអឺរ៉ុប ដោយសារអត្រាកំណើនដែលទទួលបានមានតែមួយខ្ទង់ប៉ុណ្ណោះធៀបនឹង ២ ខ្ទង់កាលពីឆ្នាំមុន។ នេះបើយោងតាមលោក ម៉ូនីកា។ លោកថ្លែងថា ការនាំចេញរបស់កម្ពុជាទៅប្រទេសកាណាដា ជប៉ុន និងចិនក៏កើនឡើងផងដែរ ប៉ុន្តែស្ថិតនៅក្នុងចំណែកតូចនៅឡើយ។
ក្នុងអំឡុងបេសកកម្មស្វែងរកការពិតនៅក្នុងប្រទេសកម្ពុជា គណៈប្រតិភូគណៈកម្មការអឺរ៉ុបបានព្រមានកាលពីសប្ដាហ៍មុនពីលទ្ធភាពដកកម្ពុជាពីផែនការអនុគ្រោះពាណិជ្ជកម្ម ដែលជាវិធានការចុងក្រោយ ប្រសិនបើកិច្ចខិតខំប្រឹងប្រែងរបស់ពួកគេលើការដោះស្រាយបញ្ហាសិទ្ធិមនុស្ស និងនយោបាយនៅកម្ពុជា បរាជ័យ។
លោក ច័ន្ទ សុផល ប្រធានវិទ្យាស្ថានដើម្បីសិក្សាគោលនយោបាយបានថ្លែងថា ប្រសិនបើហេតុការណ៍នេះកើតឡើងវាពិតជាមានផលប៉ះពាល់សម្រាប់វិស័យវាយនភ័ណ្ឌនៅកម្ពុជា ប៉ុន្តែមិនមែនជាក្តីបារម្ភនោះទេ។
លោកថ្លែងថា៖ «បើសហភាពអឺរ៉ុបដកកម្ពុជាចេញពីក្រុមប្រទេសទទួលបានការអនុគ្រោះពន្ធ EBA នោះផលប៉ះពាល់ពិតជាកើតមាន តែខ្ញុំគិតថាវាមិនមានអ្វីធំដុំទេសម្រាប់កម្ពុជា ព្រោះវានឹងមានផលប៉ះពាល់ដល់រោងចក្រមួយចំនួនដែលនាំចេញទំនិញនៅកាន់ទីផ្សារអឺរ៉ុបតែប៉ុណ្ណោះ»។
ទោះបីយ៉ាងនេះក្តីវិស័យនេះមានចំនួនជាង ៧០ ភាគរយនៃការនាំចេញសរុបរបស់កម្ពុជាដែលភាគច្រើនបំផុតត្រូវបាននាំចេញទៅសហភាពអឺរ៉ុប អាមេរិក និងកាណាដា។
យោងតាមរបាយការណ៍របស់ក្រសួងការងារកាលពីដើមឆ្នាំនេះបានបង្ហាញថា ការនាំចេញសម្លៀកបំពាក់របស់ប្រទេសកម្ពុជានៅឆ្នាំ ២០១៧ បានកើនឡើង ៤ ភាគរយរហូតដល់ ៧,៦ ពាន់លានដុល្លារ បើធៀបនឹងឆ្នាំ ២០១៦ ដែលមាន ៧,៣ ពាន់លានដុល្លារ៕ LA
រាយការណ៍បន្ថែម ដោយ ហ៊ីន ពិសី
