.jpg)
សកម្មភាពកម្មករកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅទីក្រុងភ្នំពេញកន្លងមក។ ភ្នំពេញ ប៉ុសិ៍្ត
ភ្នំពេញៈ ការនាំចេញផលិតផលកាត់ដេរ និងស្បែកជើងរបស់កម្ពុជាបានបង្ហាញពីកំណើនយ៉ាងគំហុកកាលពីឆ្នាំ ២០១៨ រហូតដល់ ២៤ ភាគរយ ជាអ្វីដែលធនាគារជាតិនៃកម្ពុជា បញ្ជាក់ក្នុងរបាយការណ៍ប្រចាំឆ្នាំថា ដោយសារស្ថានភាពល្អប្រសើរនៃសេដ្ឋកិច្ចសកល ពិសេស ប្រទេស ដែលជាទីផ្សារសំខាន់របស់កម្ពុជា។
របាយការណ៍ឆ្នាំ ២០១៨ របស់ NBC បានឲ្យដឹងថា ការនាំចេញសម្លៀកបំពាក់ និងស្បែកជើងរបស់កម្ពុជា មានតម្លៃ ១០ ពាន់លានដុល្លារ កើនឡើង ២៤ ភាគរយ ធៀបនឹង ៨ ពាន់លានដុល្លារកាលពីឆ្នាំ ២០១៧។ អត្រាកំណើនកាលពីឆ្នាំ ២០១៧ មាន ៧,៦ ភាគរយប៉ុណ្ណោះ។
របាយការណ៍បានឲ្យដឹងថា៖ «កំណើននៃការនាំចេញផលិតផលសម្លៀកបំពាក់ និងស្បែកជើងត្រូវបានជំរុញដោយភាពប្រសើរឡើងនៃស្ថានភាពសេដ្ឋកិច្ចពិភពលោក ពិសេសទិសដៅនាំចេញចម្បងៗ ដូចជា EU ដែលមានចំណែកទីផ្សារ ៤៦ ភាគរយ នៃការនាំចេញផលិតផលកាត់ដេរសរុប អាមេរិក ២៤ ភាគរយ កាណាដា ៩ ភាគរយ និងជប៉ុន ៨ ភាគរយ»។
មន្ដ្រី NBC មិនអាចទាក់ទងសុំព័ត៌មានលម្អិតបន្ថែមបានទេ។ តំណាងមកពីសមាគមរោងចក្រកាត់ដេរកម្ពុជា (GMAC) ក៏មិនបានឆ្លើយតបនឹងការសុំអត្ថាធិប្បាយពីកាសែតភ្នំពេញ ប៉ុស្តិ៍ ដែរកាលពីថ្ងៃម្សិលមិញ។
លោក អាត់ ធន់ ប្រធានសហភាពការងារកម្ពុជា បានឲ្យដឹងថា អត្រាកំណើន ២៤ ភាគរយសម្រាប់ការនាំចេញផលិតផលសម្លៀកបំពាក់ ជាកំណើនដ៏ធំមួយ។ លោកនៅមានការសង្ស័យថា តើតួលេខនេះឆ្លុះបញ្ចាំងភាពពិតដែរឬទេ?
លោក អាត់ ធន់ បានឲ្យដឹងថា ការនាំចេញទំនិញធ្វើដំណើរ ដែលកម្ពុជាបានទទួលឋានៈនាំចេញរួចពន្ធពីអាមេរិក កាលពីខែកក្កដា ឆ្នាំ ២០១៦ បានបង្កើនល្បឿនគួរឲ្យកត់សម្គាល់ ហើយវាអាចជាកត្តាដ៏សំខាន់មួយ ក្នុងការបង្កើនល្បឿនកំណើននៃការនាំចេញសម្លៀកបំពាក់ និងស្បែកជើងកាលពីឆ្នាំមុន។ ប៉ុន្តែលោកនៅតែឆ្ងល់លើអត្រាកំណើនខ្ពស់ដែលមានរហូតដល់ ២៤ ភាគរយនេះ។
លោកថ្លែងថា៖ «តាមការអង្កេត ចំនួននាំចេញ និងតម្រូវការការងារសម្រាប់វិស័យនេះ មិនកើនឡើងខ្លាំងដូចអត្រាកំណើន [លើកឡើងដោយ NBC នោះទេ]។
លោកបន្ថែមថា៖ «ចំនួនកម្មករ [នៅក្នុងវិស័យនេះ] មិនកើនឡើងច្រើននោះទេ ការងារបន្ថែមម៉ោង ក៏មិនច្រើនផងដែរ និងមានរោងចក្រមួយចំនួនបិទទ្វារផងដែរ។ ដូច្នេះការនាំចេញរបស់វិស័យនេះ បើមានកំណើន វាមិនគួរច្រើនដល់កម្រិតនោះទេ វាសមហេតុផលបើវាកើនឡើងក្នុងល្បឿនស្រដៀងគ្នានឹងឆ្នាំ ២០១៧»។
តម្លៃនៃការនាំចេញសម្លៀកបំពាក់កាលពីឆ្នាំមុន មានចំណែកប្រហែល ៧៤ ភាគរយនៃការនាំចេញសរុបរបស់កម្ពុជា។ វិស័យនេះផ្ដល់ការងារដល់កម្មករប្រហែល ៨០ ម៉ឺននាក់ និងទទួលបានអត្ថប្រយោជន៍ពីការអនុគ្រោះពន្ធ EBA ពីសហភាពអឺរ៉ុប។
ប្លុកនេះបានព្រមានកាលពីខែតុលាថា កម្ពុជានឹងបាត់បង់ EBA ជាការឆ្លើយតបការពិន័យដល់ការងាកចេញពីលទ្ធិប្រជាធិបតេយ្យរបស់ប្រទេសនេះ។
កាលពីដើមខែនេះ សមាជិកព្រឹទ្ធសភាអាមេរិក ២ រូប បានស្នើឲ្យរដ្ឋបាលខ្លួនឲ្យពិនិត្យឡើងវិញនូវការផ្តល់ឲ្យកម្ពុជាដែលទទួលបានការអនុគ្រោះពន្ធដែលបានផ្ដល់ ដោយអាមេរិក ស្ថិតក្រោមប្រព័ន្ធអនុគ្រោះពន្ធ (GSP)»៕LA
