.jpg)
សកម្មភាពកម្មករ កំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញនាពេលកន្លងមក។ ភ្នំពេញ ប៉ុស្តិ៍
ភ្នំពេញៈ ការនាំចេញសរុបរបស់កម្ពុជារយៈពេល ១២ ខែ ឆ្នាំ ២០១៨ នេះ កើនឡើងជាង ២៣ ភាគរយដល់ជាង ១០,៣៦ ពាន់លានដុល្លារ ដែលនាំមុខដោយការនាំចេញសម្លៀកបំពាក់ និងផលិតផលកសិកម្ម។ នេះបើតាមរបាយការណ៍ប្រចាំឆ្នាំរបស់ក្រសួងពាណិជ្ជកម្មចេញ ផ្សាយកាលពីថ្ងៃម្សិលមិញ។
របាយការណ៍បង្ហាញថា ក្នុងអំឡុងពេលពីខែធ្នូ ឆ្នាំ ២០១៧ ដល់ ខែវិច្ឆិកា ឆ្នាំ ២០១៨ កម្ពុជាបាននាំចេញទំនិញមានតម្លៃសរុប ១០,៣៦ ពាន់លានដុល្លារ កើនឡើងចំនួន ១,៩៣ ពាន់លានដុល្លារបើធៀបនឹងឆ្នាំ ២០១៧ ដោយបាននាំចេញទៅប្រទេសជាទិសដៅចំនួន ១៤៧ ប្រទេស។
ក្នុងអំឡុងកិច្ចប្រជុំប្រចាំឆ្នាំរយៈពេល ២ ថ្ងៃ កាលពីម្សិលមិញ ហើយត្រូវបញ្ចប់ថ្ងៃនេះ លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានឲ្យដឹងថា កំណើនឧស្សាហកម្មកាត់ដេរកំពុងជំរុញការនាំចេញរបស់ប្រទេសនេះ។ លោកថ្លែងថា៖ «ទំហំការនាំចេញស្មើនឹង ៦០ ភាគរយនៃផលិតផលក្នុងស្រុកសរុបរបស់យើង»។
លោកបានបន្ថែមថា ក្រសួងពាណិជ្ជកម្មសម្រេចបានកំណែទម្រង់ស៊ីជម្រៅ ដូចជាការពង្រឹងអភិបាលកិច្ចល្អ ការលើកកម្ពស់សេវាសាធារណៈ និងការកែប្រែនីតិវិធី និងច្បាប់ ព្រមទាំងការពង្រឹងគោលនយោបាយពាណិជ្ជកម្មផងដែរ។
របាយការណ៍ប្រចាំឆ្នាំរបស់ក្រសួងបង្ហាញថា រោងចក្រ ចំនួន ៥១ ត្រូវបានចុះបញ្ជីស្ថិតក្រោមការអនុគ្រោះពន្ធ (GSP )ដែលបានកើនឡើងចំនួន ១៩ រោងចក្រ ធៀបនឹងឆ្នាំ ២០១៧ ឬស្មើនឹង ៥៩,៣៧ ភាគរយ។
របាយការណ៍នេះបង្ហាញថា មានរោងចក្រ និងក្រុមហ៊ុននាំចេញផ្សេងទៀត ១៥៦ ក៏ត្រូវបាន ចុះបញ្ជីក្នុងអំឡុងពេលនេះដែរ។ លោកថ្លែងថា៖ «គោលនយោបាយរបស់ក្រសួងពាណិជ្ជកម្ម គឺជួយគាំទ្រតម្លៃបន្ថែមនៃផលិតផលកសិកម្ម សុវត្ថិភាពស្បៀង អាហារ ការបង្កើនកូតាអង្ករទៅប្រទេស ចិន ព្រមទាំងទីផ្សារផ្សេងទៀត ដែលអនុវត្តតាមកិច្ចព្រមព្រៀងពាណិជ្ជកម្មសេរី»។
លោកបន្ថែមថា កិច្ចប្រជុំប្រចាំឆ្នាំនេះនឹងឆ្លុះបញ្ចាំងលទ្ធផលភារកិច្ចក្នុងឆ្នាំ ២០១៨ និងការឆ្ពោះទៅភារកិច្ចថ្មីៗសម្រាប់ឆ្នាំខាងមុខ បន្ទាប់ពីការវាយតម្លៃ បញ្ហាប្រឈម ព្រមទាំងយុទ្ធសាស្ដ្ររបស់រដ្ឋាភិបាល។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជាបានឲ្យដឹងថា កម្ពុជានៅតែមានសក្ដានុពលសម្រាប់ក្រុមវិនិយោគិន ហើយសភាពាណិជ្ជកម្មកម្ពុជានឹងធ្វើការងារយ៉ាងជិតស្និទ្ធជាមួយក្រសួងពាណិជ្ជកម្ម ដើម្បីតាមដានព័ត៌មានប្រកបដោយសក្ដានុពលទាំងអស់សម្រាប់ទាក់ទាញក្រុមវិនិយោគិន។
លោកថ្លែងថា៖ «ការនាំចេញរបស់យើងនៅតែមានឱកាសច្រើនក្នុងការរីកចម្រើន យើងធ្វើការងារយ៉ាងជិតស្និទ្ធជាមួយក្រសួងពាណិជ្ជកម្ម ដើម្បីទាក់ទាញក្រុមវិនិយោគិនកាន់តែច្រើន ដោយសារតែយើងមានគោលនយោបាយសម្រាប់លើកកម្ពស់ការវិនិយោគ»។
គ្រឹះស្ថានហិរញ្ញវត្ថុអន្តរជាតិជាច្រើន ដែលរួមមាន ធនាគារពិភពលោក ធនាគារអភិវឌ្ឍន៍អាស៊ី (ADB)និងមូលនិធិរូបិយវត្ថុអន្តរជាតិ (IMF) បានរក្សាការព្យាករកំណើនសេដ្ឋកិច្ចកម្ពុជាជាមធ្យម ៧ ភាគរយ។ កំណើននេះត្រូវបានជំរុញភាគច្រើន ដោយការប្រើប្រាស់ក្នុងស្រុក និងការនាំចេញដែលមួយផ្នែកធំត្រូវបានគាំទ្រដោយតម្រូវការដ៏រឹងមាំនៅអាមេរិក និងសហភាពអឺរ៉ុប (EU)៕LA
