.jpg)
លោក ចម ប្រសិទ្ធ និងលោក Park Wonjoo ក្នុងពិធីចុះអនុស្សរណៈយោគយល់គ្នាស្តីពីកិច្ចសហប្រតិបត្តិការទទួលស្គាល់ប្រកាសនីយបត្រតក្កកម្ម (ប័ណ្ណប៉ាតង់) កាលពីថ្ងៃទី ១៦ ខែ សីហា។ ហ្វេសប៊ុក ក្រសួងឧស្សាហកម្ម និងសិប្បកម្ម
ភ្នំពេញ: ក្រសួងឧស្សាហកម្ម និងសិប្បកម្មកម្ពុជា និងអង្គភាពកម្មសិទ្ធិបញ្ញាកូរ៉េខាងត្បូងបានចុះអនុស្សរណៈយោគយល់គ្នាស្តីពីកិច្ចសហប្រតិបត្តិការទទួលស្គាល់ប្រកាសនីយបត្រតក្កកម្ម (ប័ណ្ណប៉ាតង់) ដើម្បីជំរុញកំណើនការវិនិយោគកូរ៉េនៅកម្ពុជា។
អនុស្សរណៈនេះត្រូវបានចុះហត្ថលេខាដោយលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម និងលោក Park Wonjoo ស្នងការអង្គភាពកម្មសិទ្ធិបញ្ញានៃប្រទេសកូរ៉េកាលពីថ្ងៃសុក្រសប្តាហ៍មុន។ លោក ចម ប្រសិទ្ធ បានឲ្យដឹងថាការទទួលស្គាល់ប័ណ្ណប៉ាតង់រវាងប្រទេសទាំង ២ នឹងជួយលើកកម្ពស់សេដ្ឋកិច្ចជាតិ និងសេដ្ឋកិច្ចសកលតាមរយៈការលើកទឹកចិត្តដល់អ្នកវិនិយោគ។ នេះបើតាមទំព័រហ្វេសប៊ុកក្រសួង។ លោកថ្លែងថា៖ «ភាពចាំបាច់ត្រូវគ្រប់គ្រងឲ្យមានប្រសិទ្ធភាពលើចំនួនពាក្យស្នើសុំ [ប៉ាតង់] អន្តរជាតិរបស់កម្ពុជា»។
លោកបានបន្ថែមថា កិច្ចព្រមព្រៀងនេះក៏ធ្វើឡើងក្នុងគោលបំណងបង្កើនកិច្ចសហប្រតិបត្តិការអន្តរការិយាល័យ និងកិច្ចខិតខំប្រឹងប្រែងសហប្រតិបតិ្តការទូទាំងពិភពលោកផងដែរ។ លោកបន្តថា៖ «កិច្ចព្រមព្រៀងនេះសម្រាប់ជាផលប្រយោជន៍រួមផ្នែកសេដ្ឋកិច្ចរវាងកម្ពុជា-កូរ៉េតាមរយៈការជំរុញវិស័យវិនិយោគ ការផ្លាស់ប្ដូរបទពិសោធ ការបណ្តុះបណ្តាលធនធានមនុស្ស និងបច្ចេកវិទ្យាជាដើម»។
លោក មេធាវី ពេជ អង្គ អតីតប្រធានសមាគមកម្មសិទ្ធិបញ្ញាកម្ពុជាបានប្រាប់ភ្នំពេញប៉ុស្តិ៍ថា កិច្ចព្រមព្រៀងនេះនឹងជួយពង្រឹងផ្នែកបច្ចេកទេស និងធនធានមនុស្សនៅកម្ពុជា។
លោកថ្លែងថា៖ «តាមរយៈកិច្ចព្រមព្រៀងនេះយើងនឹងទទួលបានផលប្រយោជន៍ពីបច្ចេកទេសថ្មីតាមរយៈការពិនិត្យ និងសិក្សាស្រាវជ្រាវ ហើយមន្ត្រីយើងកាន់តែមានលទ្ធភាពច្រើនក្នុងការធ្វើការងារផ្នែកបច្ចេកទេសនាំឲ្យធនធានយើងកើនឡើងផងដែរ»។
លោកបន្ថែមថាប្រទេសកម្ពុជានឹងទាក់ទាញអ្នកវិនិយោគថែមទៀតនៅពេលប្រទេសកម្ពុជាមានលទ្ធភាពក្នុងការការពារកម្មសិទ្ធិបញ្ញាប្រកបដោយប្រសិទ្ធភាព។ លោកបន្តថា៖ «បើយើងការពារកម្មសិទ្ធិបញ្ញាគេបាន គេនឹងជឿថាយើងមានលទ្ធភាពការពារការបង្កើតថ្មីរបស់គេ គេអាចមកវិនិយោគកាន់តែច្រើន គេអាចមកបង្កើតរោងចក្រ ហើយគេអាចយកទំនិញដែលយើងការពារមករកស៊ីនៅស្រុកយើង»។
បើតាមលោក ចម ប្រសិទ្ធ បានឲ្យដឹងថាប្រទេសកម្ពុជាមានកិច្ចសហប្រត្តិបត្តិការជាមួយប្រទេសសិង្ហបុរី ជប៉ុន ចិន និងសហគមន៍អឺរ៉ុប ស្តីពីការចុះបញ្ជី និងការទទួលស្គាល់សុពលភាពប្រកាសនីយបត្រតក្កកម្ម។
ទិន្នន័យរបស់ក្រសួងឧស្សាហកម្ម និងសិប្បកម្មបានបង្ហាញថាចាប់តាំងពី ២០១៥ មកទល់នឹងពេលនេះក្រសួងទទួលបានពាក្យស្នើសុំចុះបញ្ជីប្រកាសប៉ាតង់ចំនួន ៨១៦ ក្នុងនោះ ១៥០ ត្រូវបានពិនិត្យសម្រេច។
អនុស្សរណៈយោគយល់គ្នានេះត្រូវចូលជាធរមានចាប់ពីថ្ងៃចុះហត្ថលេខានេះតទៅ និងមានសុពលភាព ៥ ឆ្នាំ និងអាចបន្ត ៥ ឆ្នាំទៀតដោយស្វ័យប្រវត្តិ បើគ្មានភាគីណាមួយស្នើសុំមិនបន្តសុពលភាព៕LA
