ភ្នំពេញ: ប្រទេសគុយបាបានសន្យាថានឹងជំរុញឲ្យវិនិយោគិនរបស់ខ្លួនចូលមកបណ្តាក់ទុននៅកម្ពុជា ក្រោយពីស្ថានភាពនៃការរីករាលដាលរបស់ជំងឺកូវីដ១៩ មានភាពល្អប្រសើរឡើងវិញ។ នេះបើយោងតាមរដ្ឋមន្ត្រីក្រសួងទេសចរណ៍។
ការលើកឡើងនេះបានធ្វើនៅក្នុងជំនួបរវាងលោក ថោង ខុន រដ្ឋមន្ត្រីក្រសួងទេសចរណ៍ជាមួយនឹងលោកស្រី Liurka Rodriguez Barrios ឯកអគ្គរដ្ឋទូតប្រទេសគុយបាប្រចាំនៅកម្ពុជាកាលពីថ្ងៃពុធ។ នេះបើយោងតាមទំព័រហ្វេសប៊ុកផ្លូវការរបស់ក្រសួងទេសចរណ៍។
ដោយសម្លឹងឃើញពីសក្តានុពលវិស័យទេសចរណ៍កម្ពុជានៅពេលអនាគត បើទោះបីជាបច្ចុប្បន្នកំពុងរងផលប៉ះពាល់ធ្ងន់ធ្ងរដោយសារការរាតត្បាតនៃជំងឺកូវីដ១៩ក៏ដោយ លោកស្រី Barrios បានសន្យាថានឹងជួយជំរុញវិនិយោគិនរបស់ខ្លួនឲ្យមកកម្ពុជាបន្ថែមទៀតដើម្បីចូលរួមចំណែកជំរុញកំណើនសេដ្ឋកិច្ចប្រទេសកម្ពុជា។
លោកស្រីថ្លែងថា៖ «ប្រទេសគុយបានៅតែបន្តការគាំទ្រ និងពង្រឹងទំនាក់ទំនងល្អជាមួយកម្ពុជា ហើយនៅពេលវិបត្តិកូវីដ១៩ រសាយផុតចេញពីពិភពលោក គុយបានឹងជំរុញឲ្យភ្ញៀវទេសចរ និងអ្នកវិនិយោគរបស់ខ្លួនឲ្យចូលមកវិនិយោគនៅកម្ពុជាបន្ថែមទៀត»។
ក្នុងជំនួបនោះលោក ថោង ខុន បានថ្លែងថា ដើម្បីពង្រឹងទំនាក់ទំនងពាណិជ្ជកម្មទ្វេភាគីរវាងកម្ពុជា និងគុយបាភាគីទាំង ២ គ្រោងនឹងប្រារព្ធខួបអនុស្សាវរីយ៍លើកទី ៦០ ក្រោយវិបត្តិកូវីដ១៩ ត្រូវបានគ្រប់គ្រងទាំងស្រុង។
លោកថ្លែងថា៖ «ខ្ញុំសូមវាយតម្លៃខ្ពស់ចំពោះការរួមចំណែករបស់វិនិយោគិនគុយបាក្នុងការជំរុញការអភិវឌ្ឍកម្ពុជានាពេលកន្លងមក»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍ កាលពីថ្ងៃម្សិលមិញថា នៅកម្ពុជាការវិនិយោគដោយវិនិយោគិនគុយបាមានចំនួនតិចតួចនៅឡើយ។ ទោះយ៉ាងណាកម្ពុជាស្វាគមន៍គ្រប់អ្នកវិនិយោគិនបរទេសដែលមានបំណងធ្វើវិនិយោគនៅកម្ពុជា។ លោកបានថ្លែងថា៖ «វិនិយោគិនគុយបាមានចំនួនតិចតួចដែលធ្វើការវិនិយោគនៅកម្ពុជា ដូច្នេះជារឿងល្អដែលគុយបាសន្យាថានឹងជំរុញវិនិយោគិនខ្លួនមកកម្ពុជាក្រោយពីជំងឺកូវីដ១៩ មានភាពធូរស្រាលឡើងវិញ»។
ក្រុមប្រឹក្សាអភិវឌ្ឍន៍កម្ពុជា (CDC) បានផ្តល់អាជ្ញាប័ណ្ណឲ្យក្រុមហ៊ុនធ្វើការវិនិយោគចំនួន ៤០ គម្រោងក្នុងរយៈពេល ៣ ខែដើមឆ្នាំ ២០២០ នេះដែលមានទុនវិនិយោគសរុបជាង ៩០០ លានដុល្លារ។ គម្រោងវិនិយោគទាំងនោះ រួមមានការសាងសង់រោងចក្រកាត់ដេរសម្លៀកបំពាក់ ស្បែកជើង និងផលិតផលធ្វើដំណើររោងចក្រដំឡើងគ្រឿងសង្ហារិម សម្ភារផ្ទះបាយ គ្រឿងផ្គុំអគ្គិសនី សណ្ឋាគារ និងផ្សារទំនើប ជាដើម។ នេះបើតាមទីភ្នាក់ងារសារព័ត៌មាន AKP៕ LA