.jpg)
ផ្សារទំនើបអ៊ីអនម៉ល។ កម្ពុជា និងជប៉ុន ប្តេជ្ញារក្សាទំហំពាណិជ្ជកម្មទ្វេភាគីជាង $២ ពាន់លាន បើទោះបីជាប្រឈមនឹងការរីករាលដាលដោយសារកូវីដ ១៩ ក៏ដោយ។ រូបថត សហការី
ភ្នំពេញ: កម្ពុជា និងជប៉ុនបានប្តេជ្ញារក្សាទំហំពាណិជ្ជកម្មទ្វេភាគីជាង ២ ពាន់លានដុល្លារ ក្នុងឆ្នាំ ២០២០ នេះ បើទោះបីជាប្រឈមនឹងការរីករាលដាលដោយសារកូវីដ ១៩ ក៏ដោយ។ នេះបើតាមលោកស្រី ជា គឹមថា អនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ។
ថ្លែងក្នុងកិច្ចប្រជុំពិគ្រោះយោបល់ថ្នាក់ឧត្តមមន្ត្រីរវាងកម្ពុជា និងជប៉ុនលើកទី ៣ កាលពីថ្ងៃចន្ទលោកស្រីបានឲ្យដឹងថា ពាក់ព័ន្ធវិស័យពាណិជ្ជកម្ម និងវិនិយោគភាគីទាំង ២ មានសុទិដ្ឋិនិយមថា និន្នាការល្អនៃពាណិជ្ជកម្មទ្វេភាគី ដែលបានកើនដល់ជាង ២ ពាន់លានដុល្លារកាលពីឆ្នាំមុនដែលទំហំពាណិជ្ជកម្មនឹងបន្តរក្សាកំណើនរបស់ខ្លួនសម្រាប់ឆ្នាំ ២០២០ នេះ បើទោះបីជាកំពុងប្រឈមនឹងការរាតត្បាតជាសកលនៃកូវីដ ១៩ ក៏ដោយ។
លោកស្រីថ្លែងថា៖ «ពួកគេក៏បានបង្ហាញការប្តេជ្ញាចិត្តពង្រីកពាណិជ្ជកម្ម និងវិនិយោគរវាងប្រទេសទាំង ២ ព្រមទាំងបានឯកភាពជំរុញឲ្យស្ថាប័នពាក់ព័ន្ធធ្វើការយ៉ាងជិតស្និទ្ធជាមួយគ្នាដើម្បីធ្វើឲ្យប្រសើរឡើងនូវបរិយាកាសវិនិយោគនៅកម្ពុជាក្នុងគោលដៅទាក់ទាញវិនិយោគិនជប៉ុនឲ្យបានកាន់តែច្រើនឡើង»។
លោកស្រីបន្តថា ចំពោះកិច្ចសហប្រតិបត្តិការអភិវឌ្ឍន៍កម្ពុជាថ្លែងអំណរគុណភាគីជប៉ុនដែលបានជួយអភិវឌ្ឍសេដ្ឋកិច្ច និងសង្គមកម្ពុជាក្រោមជំនួយជាច្រើនរបស់ជប៉ុន។ លោកស្រីបន្ថែមថា៖ «ភាគីជប៉ុនក៏បានសន្យាថានឹងបន្តជួយដល់កម្ពុជា ពិសេសលើវិស័យអាទិភាពរួមមាន ការអភិវឌ្ឍវិស័យភ័ស្តុភារកម្ម ហេដ្ឋារចនាសម្ព័ន្ធ ឧស្សាហកម្ម និងធនធានមនុស្សជាដើម»។
ការនាំចេញរបស់កម្ពុជាទៅជប៉ុនសម្រេចបាន ១៤៩ លានដុល្លារក្នុងខែមករា ឆ្នាំ ២០២០ កើនឡើង ០,២ ភាគរយបើធៀបនឹងរយៈពេលដូចគ្នាកាលពីឆ្នាំមុន ខណៈកម្ពុជានាំចូលមកវិញមានតម្លៃជាង ៣៣ លានដុល្លារកើនឡើង ០,១ ភាគរយ។ នេះបើតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន (Jetro)។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា តាមរយៈយុទ្ធសាស្ត្រកិច្ចសហប្រតិបត្តិការមេគង្គ-ជប៉ុននឹងអាចសម្រេចបានទំហំពាណិជ្ជកម្មតាមគោលដៅកំណត់។ លោកបានថ្លែងថា៖ «យុទ្ធសាស្ត្រនេះជាគន្លឹះសំខាន់ជួយទាក់ទាញវិនិយោគិនជប៉ុនមកកម្ពុជា ខ្ញុំគិតថា វិស័យកសិឧស្សាហកម្មនៅតែមានទំហំធំសម្រាប់វិនិយោគិនជប៉ុននៅប៉ុន្មានឆ្នាំខាងមុខនេះ»។
ចាប់តាំងពីឆ្នាំ ១៩៩៥ រហូតមកដល់ខែកញ្ញា ឆ្នាំ ២០១៩ គម្រោងវិនិយោគជប៉ុនមានចំនួន ១៤១ គម្រោងដែលមានទុនវិនិយោគ ២,៥ ពាន់លានដុល្លារ។ នេះបើយោងតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា។
ក្នុងចំណោមនោះ ៦៦ គម្រោងក្នុងតំបន់សេដ្ឋកិច្ចពិសេសដែលប៉ាន់ប្រមាណថា មានទុនវិនិយោគ ៣៤០ លានដុល្លារ។ គម្រោងភាគច្រើនវិនិយោគលើថាមពលគ្រឿងបង្គុំអគ្គិសនី គ្រឿងបន្លាស់យានយន្ត កសិឧស្សាហកម្ម ការកែច្នៃអាហារ មន្ទីរពេទ្យ សុខភាព និងលក់រាយជាដើម។
ការនាំចេញរបស់កម្ពុជាទៅកាន់ទីផ្សារប្រទេសជប៉ុនសម្រេចបាន ១,៧ ពាន់លានដុល្លារកាលពីឆ្នាំមុន កើនឡើង ៧,៧ ភាគរយ បើធៀបនឹងឆ្នាំ ២០១៨។ នេះបើតាមទិន្នន័យរបស់ Jetro។ ទិន្នន័យបង្ហាញថា កម្ពុជាបាននាំចូលទំនិញពីជប៉ុនមានតម្លៃជាង ៥៦២ លានដុល្លារ កើន ៣៣,៤ ភាគរយ បើធៀបនឹងឆ្នាំ ២០១៨៕
