ភ្នំពេញ: កម្ពុជា និងទីម័រខាងកើតបានប្តេជ្ញាពង្រីកកិច្ចសហប្រតិបត្តិការលើវិស័យទេសចរណ៍តាមរយៈការភ្ជាប់ជើងហោះហើរត្រង់រវាងប្រទេសទាំង ២ ក្រោយពីស្ថានភាពជំងឺកូវីដ ១៩ ស្ងប់ស្ងាត់។ នេះបើតាមរដ្ឋមន្ត្រីក្រសួងទេសចរណ៍។
ការថ្លែងនេះធ្វើឡើងនៅក្នុងជំនួបរវាងលោក ថោង ខុន រដ្ឋមន្ត្រីក្រសួងទេសចរណ៍ជាមួយនឹងលោក Ermeneglido Kupa Lopes ឯកអគ្គរដ្ឋទូតទីម័រប្រចាំកម្ពុជានៅទីស្តីការក្រសួងទេសចរណ៍កាលពីថ្ងៃពុធ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងក្នុងជំនួបនេះថា ភាគីទាំង ២ បានបង្ហាញគោលបំណងដូចគ្នាក្នុងការពង្រីកកិច្ចសហប្រតិបត្តិការលើវិស័យទេសចរណ៍បន្ថែមទៀត។
លោកបន្តថា កម្ពុជាកំពុងខិតខំប្រឹងប្រែងស្តារវិស័យទេសចរណ៍ឡើងវិញ បន្ទាប់ពីរងផលប៉ះពាល់យ៉ាងខ្លាំងដោយសារការរីករាលដាលជំងឺកូវីដ ១៩ ដើម្បីត្រៀមខ្លួនទទួលការវិលត្រឡប់របស់ភ្ញៀវទេសចរអន្តរជាតិក្រោយវិបត្តិវីរុសនេះត្រូវបានគ្រប់គ្រងទាំងស្រុង។
លោកថ្លែងថា៖ «កម្ពុជាបានជំរុញឲ្យភាគីទីម័រពន្លឿនការចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យទេសចរណ៍រវាងប្រទេសទាំង ២»។
លោក ទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន បានឲ្យដឹងថា អនុស្សរណៈនេះបានផ្ដោតលើការអភិវឌ្ឍផលិតផលទេសចរណ៍ ការអភិវឌ្ឍធនធាន មនុស្សក្នុងវិស័យទេសចរណ៍ និងបង្កើនការទាក់ទាញទេសចរពីគ្នាទៅវិញទៅមកឱ្យបានកាន់តែច្រើនថែមទៀត៖ «នៅពេលចប់វិបត្តិជំងឺកូវីដ ១៩ នេះ ភាគីទាំង ២ ក៏នឹងពិនិត្យលើលទ្ធភាពក្នុងការតភ្ជាប់ជើងហោះហើរត្រង់កម្ពុជា-ទីម័រ»៕LA