ភ្នំពេញៈ កម្ពុជា និងរុស្ស៊ីបានសន្យាថា បង្កើនពាណិជ្ជកម្មទ្វេភាគី និងការវិនិយោគរវាងប្រទេសទាំង ២ ពិសេសការបង្កើនការចូលទៅសហភាពសេដ្ឋកិច្ចអឺរ៉ុបអាស៊ី (EAEU) សម្រាប់ការធ្វើពិពិធកម្មទីផ្សាររបស់ប្រទេសនេះ។
លោកឧបនាយករដ្ឋមន្ដ្រី ហោ ណាំហុង បានជួបជាមួយលោក Dmitry Tsvetkov ឯកអគ្គរដ្ឋទូតរុស្ស៊ីប្រចាំកម្ពុជានៅទីក្រុងភ្នំពេញកាលពីថ្ងៃចន្ទបានឲ្យដឹងថា ប្រទេសទាំង ២ មានទំនាក់ទំនងការទូតល្អ ជាពិសេសការរួមចំណែកពីប្រទេសរុស្ស៊ីក្នុងការជួយបង្កើនកំណើនសេដ្ឋកិច្ចរបស់ប្រទេសនេះតាមរយៈការបើកចំហពាណិជ្ជកម្មកាន់តែខ្លាំង និងជំរុញឲ្យមានការវិនិយោគកាន់តែច្រើនចូលមកកម្ពុជាក្នុងរយៈពេលជាច្រើនឆ្នាំមកនេះ។
លោកថ្លែងថា៖ «ប្រទេសទាំង ២ របស់យើងមានទំនាក់ទំនងជិតស្និទ្ធបំផុត និងកិច្ចសហប្រតិបត្តិការល្អនៅក្នុងវិស័យជាច្រើន។ ចាប់តាំងពីឆ្នាំ ២០១៥ ប្រទេសទាំង ២ បានចុះកិច្ចព្រមព្រៀង ៥១ ស្ដីពីការបង្កើនពាណិជ្ជកម្ម ការវិនិយោគលើវិស័យហិរញ្ញវត្ថុ កសិកម្ម និងវិស័យជាច្រើនទៀត»។
លោកបន្តថា៖ «កាលពីឆ្នាំមុនពាណិជ្ជកម្មទ្វេភាគីរវាងប្រទេសទាំង ២ មានចំនួន ៥៥,៣៩ លានដុល្លារ ហើយយើងសង្ឃឹមថា នឹងបន្តកើនឡើងនៅឆ្នាំនេះ ខណៈកម្ពុជាស្វាគមន៍ភ្ញៀវទេសចររុស្ស៊ីប្រហែល ៥៥ ៦៥៣ នាក់ពីឆ្នាំ ២០១៩»។
លោកបន្តថា ថ្មីៗនេះប្រទេសទាំង ២ កំពុងស្ថិតក្នុងការចរចាលើអនុស្សរណៈនៃការយោគយល់គ្នាប្រហែល ១៤ ដែលរំពឹងថានឹងត្រូវចុះហត្ថលេខាក្នុងពេលឆាប់ៗដោយផ្ដោតលើវិស័យទេសចរណ៍ ការអប់រំ ច្បាប់ និងយុវវ័យ។ លោកសង្ឃឹមថា ប្រទេសរុស្ស៊ីនឹងគាំទ្រប្រទេសកម្ពុជាលើការចរចាពាណិជ្ជកម្មសេរីជាមួយអឺរ៉ុបអាស៊ី។
លោក Dmitry Tsvetkov បានកត់សម្គាល់អំពីការអភិវឌ្ឍយ៉ាងរហ័សរបស់ប្រទេសកម្ពុជាដែលទទួលបានកំណើនខ្ពស់បំផុតនៅក្នុងតំបន់ប្រហែល ៧ ភាគរយកាលពីឆ្នាំមុន ទោះបីជាកម្ពុជាមិនមែនជាប្រទេសផលិតប្រេងដូចជាបណ្ដាប្រទេសផ្សេងទៀតក៏ដោយ។ លោកបន្តថា ក្រុមការងាររវាងប្រទេសកម្ពុជា និងរុស្ស៊ីបានចាប់ផ្ដើមការចរចារួចហើយស្ដីពីកិច្ចព្រមព្រៀងពាណិជ្ជកម្មសេរីជាមួយអឺរ៉ុបអាស៊ី។
កាលពីខែតុលាឆ្នាំមុនក្រុមមន្ដ្រីប្រទេសកម្ពុជាបានទៅទស្សនកិច្ចប្រទេសរុស្ស៊ី ជុំវិញកិច្ចព្រមព្រៀងពាណិជ្ជកម្មសេរីជាមួយសហភាពសេដ្ឋកិច្ចអឺរ៉ុបអាស៊ី (EAEU) ដែលជាប្លុករបស់បណ្ដាប្រទេសជាច្រើននៅអាស៊ីកណ្ដាល និងខាងជើង និងអឺរ៉ុបខាងកើត។
ប្លុកនេះមានផលិតផលក្នុងស្រុកសរុប (GDP) រួមចំនួន ៥ ពាន់ពាន់លានដុល្លារ។ EAEU គឺជាអង្គការអន្តរជាតិមួយសម្រាប់កិច្ចសហប្រតិបត្តិការសេដ្ឋកិច្ចក្នុងតំបន់មានរដ្ឋ ៥ ជាសមាជិកគឺអាម៉េនី បេឡារុស កាហ្សាក់ស្ថាន កៀហ្ស៊ីស៊ីស្ថាន និងរុស្ស៊ីដោយមានប្រជាជនរួមចំនួន ១៨៣ លាននាក់។
កាលពីឆ្នាំ ២០១៦ ប្រទេសកម្ពុជា និង EAEU បានចុះកិច្ចព្រមព្រៀង MoU ដើម្បីលើកកម្ពស់កិច្ចសហប្រតិបត្តិការផ្នែកពាណិជ្ជកម្ម។ ខណៈកម្ពុជានៅតែកំពុងស្ថិតនៅក្នុងចំណាត់ថ្នាក់ប្រទេសអភិវឌ្ឍន៍តិចតួចបំផុត (LDC) ផលិតផលកម្ពុជាប្រហែល ៣៦ មុខអាចចូលទៅក្នុងទីផ្សាររបស់ EAEU ដោយរួចពន្ធនៅក្នុងរយៈពេល ៣ ឆ្នាំក្រោយ។
ក្នុងចំណោមបណ្ដាប្រទេសអាស៊ានមានតែវៀតណាមប៉ុណ្ណោះដែលសម្រេចបានកិច្ចព្រមព្រៀងពាណិជ្ជកម្មសេរីជាមួយ EAEU ខណៈប្រទេសសិង្ហបុរីកំពុងរំពឹងថានឹងសម្រេចបានកិច្ចព្រមព្រៀងនេះនៅឆ្នាំនេះ។
បច្ចុប្បន្នក្រុមហ៊ុន ម៉ុង ឫទ្ធីគ្រុប ជាក្រុមហ៊ុនពហុផលិតផលកសិកម្មក្នុងស្រុកកំពុងរៀបចំផែនការក្នុងការពង្រីកទីផ្សារសម្រាប់ការនាំចេញផ្លែស្វាយទៅប្រទេសរុស្ស៊ី និងប្រទេសហុងគ្រី។ លោក ម៉ុង ឫទ្ធី ប្រធានក្រុមហ៊ុន ម៉ុង ឫទ្ធីគ្រុប បានឲ្យដឹងកាលពីមុនថា ក្រុមហ៊ុនរបស់លោកគ្រោងនឹងនាំចេញផ្លែស្វាយប្រហែល ៥ ០០០ តោន ក្នុង ១ ឆ្នាំ៕LA