ភ្នំពេញៈ កម្ពុជា និងវៀតណាមកំពុងស្វែងរកដំណោះស្រាយរួមគ្នាតាមរយៈការបង្កើតតំបន់ត្រួតពិនិត្យរួមគ្នា ដើម្បីជួយសម្រួលដល់ការដឹកជញ្ជូនទំនិញឆ្លងកាត់ព្រំដែន (បាវិត-ម៉ុកបៃ) ឲ្យកាន់តែមានភាពឆាប់រហ័ស ខណៈការកកស្ទះចរាចរណ៍ទីនោះកំពុងកើនឡើង។
រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល កាលពីថ្ងៃព្រហស្បតិ៍សប្តាហ៍មុនបានដឹកនាំក្រុមគណៈប្រតិភូអន្តរក្រសួង និងក្រុមអ្នកជំនាញទៅពិនិត្យមើលស្ថានភាពកកស្ទះចរាចរណ៍ផ្លូវជាតិលេខ ១ ចំណុចច្រកទ្វារព្រំដែនអន្តរជាតិបាវិតព្រមទាំងបានបន្តទៅចូលរួមកិច្ចប្រជុំទ្វេភាគីជាមួយលោក Nguyen Van The រដ្ឋមន្ត្រីក្រសួងដឹកជញ្ជូនវៀតណាមនៅទីក្រុងហូជីមិញ ប្រទេស វៀតណាម។
លោក ស៊ុន ចាន់ថុល បាននិយាយថាការកកស្ទះចរាចរណ៍នៅចំណុចព្រំដែនអន្តរជាតិបាវិត គឺជារឿងដ៏សំខាន់ដែលត្រូវដោះស្រាយ ខណៈកន្លងមកមិនត្រឹមតែវិស័យឯកជននោះទេ។
លោកថ្លែងថា៖ «បច្ចុប្បន្នភាគីវៀតណាមមានដីប្រមាណ ៥០ ហិកតា ដែលអាចបង្កើតជាតំបន់ត្រួតពិនិត្យរួមគ្នា។ ការបង្កើតតំបន់ត្រួតពិនិត្យរួមគ្នានេះគឺជាបំណងរបស់ប្រទេសជាសមាជិកមហាអនុតំបន់មេគង្គ ក៏ដូចជាទស្សនវិស័យរបស់អាស៊ានដែលចង់ឲ្យមានតំបន់ត្រួតពិនិត្យរួមគ្នា ដើម្បីផ្តល់ភាពងាយស្រួលដល់អ្នកវិនិយោគក្នុងការដឹកជញ្ជូនទំនិញឆ្លងកាត់ព្រំដែន»។
តាមរយៈកិច្ចប្រជុំ ភាគីទាំង ២ បានឯកភាពគ្នាលើដំណោះស្រាយមួយចំនួនដូចជា ធ្វើការសិក្សាលម្អិតអំពីការបង្កើតតំបន់ត្រួតពិនិត្យរួមគ្នា ការពង្រីកគន្លងចរាចរណ៍ និងលំហូររថយន្តឆ្លងកាត់នៅច្រកទ្វារព្រំដែន បាវិត-ម៉ុកបៃ ការបង្កើនម៉ោងធ្វើការចាប់ពីម៉ោង ៦:០០ ព្រឹក ដល់ម៉ោង ១០:០០ យប់ និងពិនិត្យលទ្ធភាពបង្កើនចំនួនកូតារថយន្តឆ្លងកាត់ប្រទេសទាំង ២ ពី ៥០០ គ្រឿង ទៅ ៨០០ គ្រឿង។
អ្នកនាំពាក្យក្រសួងសាធារណការ និងដឹកជញ្ជូនលោក វ៉ាស៊ឹមសុរិយា ប្រាប់ភ្នំពេញប៉ុស្តិ៍កាលពីម្សិលមិញថា នៅពេលខាងមុខភាគីវៀតណាមនឹងបញ្ជូនសេចក្តីព្រាងប្លង់ និងផែនការយុទ្ធសាស្ត្រមកឲ្យកម្ពុជាជាមុនសិន ដើម្បីកម្ពុជាពិនិត្យពិភាក្សា។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបានប្រាប់ថា ការបង្កើតឲ្យមានកន្លែងត្រួតពិនិត្យរួមគ្នានេះ ជាក្តីប្រាថ្នាចង់បានរបស់វិស័យដឹកជញ្ជូនជាយូរមកហើយ។ លោកថ្លែងថា៖ «យើងមិនត្រឹមតែចង់បានឲ្យមានតំបន់ត្រួតពិនិត្យរួមគ្នាប៉ុណ្ណោះទេ គឺយើងថែមទាំងចង់បានកន្លែងនោះមានទំហំធំដែលអាចឲ្យរថយន្តដឹកទំនិញចូលចតបានច្រើនទៀតផង»។
តាមលោក ចន្ទី ជារៀងរាល់ថ្ងៃមានរថយន្តកុងតឺន័រជាមធ្យមពី ៣០០-៤០០ គ្រឿងឆ្លងកាត់ព្រំដែនកម្ពុជា-វៀតណាម ត្រង់ច្រកអន្តរជាតិបាវិត៕