ភ្នំពេញ: កម្ពុជា និងវៀតណាមបានសម្រេចឲ្យមានការដោះដូរទំនិញត្រង់តំបន់ ស នៃច្រកព្រំដែនអន្តរជាតិបាវិត-ម៉ុកបៃ ដើម្បីផ្ទេរទំនិញគ្នាទៅវិញទៅមក បន្ទាប់ពីរដ្ឋាភិបាលនៃប្រទេសទាំង ២ បានសម្រេចបិទច្រកព្រំដែនដើម្បីបង្ការការរីករាលដាលកូវីដ ១៩។
សេចក្តីសម្រេចនេះធ្វើឡើងក្នុងកិច្ចប្រជុំកាលពីសប្តាហ៍មុនដែលដឹកនាំដោយលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ព្រមទាំងលោក ម៉ែន វិបុល អភិបាលខេត្តស្វាយរៀងជាមួយនឹងអាជ្ញាធរវៀតណាម។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានគយ។
សេចក្តីប្រកាសព័ត៌មានបានឲ្យដឹងថា ភាគីទាំង ២ សម្រេចអនុញ្ញាតឲ្យរថយន្តដឹកទំនិញចូលមកដល់តំបន់ ស ដោយដូរអ្នកបើកបរប្តូរក្បាលរថយន្តសណ្តោង ការផ្ទេរទំនិញ ឬផ្ទេរកុងតឺន័រ។ វិធានការនេះនឹងត្រូវអនុវត្តរហូតដល់បញ្ហានៃកូវីដ ១៩ មានភាពល្អប្រសើរឡើងវិញ។
ទន្ទឹមនឹងនេះអាជ្ញាធរកម្ពុជាក៏សម្រេចអនុញ្ញាតឲ្យរថយន្តដឹកទំនិញពីវៀតណាមចូលដល់កំពង់ផែស្ងួតណាមួយនៅក្បែរព្រំដែន រួចធ្វើការផ្ទេរទំនិញចេញ និងផ្ទុកទំនិញដែលត្រូវនាំចេញពីកម្ពុជាដោយតម្រូវឲ្យអ្នកបើកបរស្លៀកសម្លៀកបំពាក់សុវត្ថិភាពការពារវីរុស។
អាជ្ញាធរវៀតណាមក៏បានស្នើសុំឲ្យមានការសហការជាមួយអាជ្ញាធរពាក់ពន្ធ ដើម្បីធ្វើឲ្យប្រាកដថាអ្នកបើកបរគោរពទៅតាមសេចក្តីសម្រេចខាងលើនេះ។
វិធានការនេះនឹងត្រូវអនុវត្តនៅគ្រប់ច្រកព្រំដែនទាំងអស់ដែលជាប់ព្រំប្រទល់នឹងខេត្តតៃនិញរបស់ប្រទេស វៀតណាម និងបានឯកភាពគ្នាបន្តកិច្ចសហការដោះស្រាយនូវបញ្ហាប្រឈមចំពោះមុខដែលអាចកើតមានជាយថាហេតុ។
សេចក្តីប្រកាសព័ត៌មាន៖ «ភាគីទាំង ២ បានឯកភាពផ្សព្វផ្សាយនូវដំណោះស្រាយទាំងនេះទៅដល់ធុរជនដែលមានការពាក់ព័ន្ធនឹងការដឹកជញ្ជូនទំនិញ ហើយធុរជនអាចជ្រើសរើសយកជម្រើសណាមួយក៏បាន ដែលងាយស្រួលសម្រាប់ពួកគេ»។
សេចក្តីប្រកាសព័ត៌មានបានឲ្យដឹងថា៖ «ដើម្បីដោះស្រាយការកកស្ទះនៅព្រំដែន ភាគីទាំង ២ បានសម្រេចអនុញ្ញាតឲ្យអនុវត្តភ្លាមៗ ហើយកាលពីថ្ងៃព្រហស្បតិ៍ គឺសមត្ថកិច្ចពាក់ពន្ធទាំងសងខាងបានអនុញ្ញាតឲ្យប្រតិបត្តិការរហូតដល់ម៉ោង ១០ យប់»។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញ-កម្ពុជាបានប្រាប់ភ្នំពេញប៉ុស្តិ៍ថា វិធានការនេះបានជួយសម្រួលដល់ការធ្វើពាណិជ្ជកម្មឆ្លងកាត់ព្រំដែនរវាងប្រទេសទាំង ២។ លោកថ្លែងថា៖ «សព្វថ្ងៃភាគីទាំង ២ អាចធ្វើការនាំចេញ-នាំចូលទំនិញបានជាធម្មតា ពិសេសបានជួយដល់ការដឹកជញ្ជូនវត្ថុធាតុដើមពីប្រទេសចិននឹងបញ្ជូនមកដល់រោងចក្រទាន់ពេលវេលានៅក្រុងបាវិត។
មេដឹកនាំប្រទេសទាំង ២ បានសន្យាថានឹងលើកកម្ពស់ពាណិជ្ជកម្មឆ្លងកាត់ព្រំដែនរវាងប្រទេសទាំង ២ សម្រេចឲ្យបានជាង ៥ ពាន់លានដុល្លារ នៅត្រឹមចុងឆ្នាំ ២០២០ នេះ។
ទិន្នន័យបានពីស្ថានទូតវៀតណាមប្រចាំនៅកម្ពុជាបានឲ្យដឹងថា ទំហំពាណិជ្ជកម្មសរុបសម្រាប់ឆ្នាំ ២០១៨ បានកើនឡើងដល់ ៤,៧ ពាន់លានដុល្លារ កើនឡើង ២៣,៨ ភាគរយបើធៀបនឹងឆ្នាំ ២០១៧។
រដ្ឋាភិបាលកម្ពុជាក៏បានសម្រេចបិទច្រកព្រំដែនមួយចំនួនជាប់ព្រំប្រទល់នឹងប្រទេសថៃផងដែរ ដោយសារតែករណីកូវីដ ១៩ នេះ៕