The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា និង​ថៃ ចាប់​ផ្តើម​អនុវត្ត​ទិដ្ឋាការ​តែ​មួយ




កម្ពុជា និង​ថៃ ចាប់​ផ្តើម​អនុវត្ត​ទិដ្ឋាការ​តែ​មួយ

កម្ពុជា និង​ថៃ ចាប់​ផ្តើម​អនុវត្ត​ទិដ្ឋាការ​តែ​មួយ

ភ្នំពេញៈ​ប្រទេស​កម្ពុជា និង​ថៃ​នៅ​ថ្ងៃ​ព្រហស្បតិ៍​នេះ ចាប់​ផ្តើម​អនុវត្ត​ទិដ្ឋាការ​តែ​មួយ​ដើម្បី​ជួយ​សម្រួល​ដល់​ភ្ញៀវ​ទេសចរ​ដែល​មក​ពី​បណ្តា​ប្រទេស​នានា​ចូល​មក​ទស្សនា​ប្រទេស​ទាំង​ពីរ​នេះ​។

យោង​តាម​កាសែត The Nation បាន​ផ្សាយ​ថា លោក​រដ្ឋ​មន្ត្រី​ការ​បរទេស​ថៃ ស៊ូរ៉ាពុង តូវីចាក់​ចៃគុល និង​លោក​ឧបនាយក​រដ្ឋមន្ត្រី ហោ ណាំហុង រដ្ឋ​មន្ត្រី​ក្រសួង​ការ​បរទេស​កម្ពុជា​កាល​ពី​ថ្ងៃ​អង្គារ បាន​យល់​ព្រម​លើ​ការ​ប្រើ​ទិដ្ឋាការ​តែ​មួយ​ក្នុង​អំឡុង​លោក​ដឹក​នាំ​គណៈ​ប្រតិភូ​ទៅ​ចូល​រួម​កិច្ច​ប្រជុំ​គណៈ​កម្មាការ​ចម្រុះ​លើក​ទី​៨​។ ការសែត​ថៃ​មួយ​នេះ​បាន​រាយ​ការណ៍​ថា ភ្ញៀវ​ទេសចរ​មក​ពី​ប្រទេស​ចំនួន​៣៥​នឹង​ចូល​មក​ទស្សនា​ប្រទេស​ទាំង​ពីរ​នេះ​ដោយ​កាន់​ទិដ្ឋាការ​តែ​មួយ​។

លោក កុយ គួង អ្នក​នាំ​ពាក្យ​ក្រសួង​ការ​ប្រទេស​និង​កិច្ច​សហ​ប្រតិបត្តិការ​អន្តរជាតិ​មិន​អាច​ទាក់​ទង​ដើម្បី​ពន្យល់​បន្ថែម​ទៀត​បាន​ទេ​កាល​ពីថ្ងៃ​អង្គារ​។

វា​គឺជា​គម្រោង​សាក​ល្បង ដែល​ស្ថិត​នៅ​ក្រោម​ផែនការ​ទិដ្ឋាការ​តែ​មួយ ACMECs ដែល​ភ្ញៀវ​ទេសចរ​មក​ពី​បណ្តា​ប្រទេស​នានា​អាច​ដាក់​ពាក្យ​សុំ​ទិដ្ឋាការ​ទៅ​កាន់​ស្ថានទូត ឬ​នៅ​ការិយាល័យ​កុងស៊ុល​របស់​កម្ពុជា​ក៏​បាន របស់​ថៃ​ក៏​បាន​សម្រាប់​ការ​ធ្វើ​ដំណើរ​កម្សាន្ត​មក​កាន់​ប្រទេស​ទាំង​ពីរ​នេះ​។

លោក ថោង ខុន រដ្ឋមន្ត្រី​ក្រសួង​ទេសចរណ៍​បាន​លើក​ឡើង​ថា ការ​អនុវត្ត​គម្រោង​នេះ​នឹង​ធ្វើ​ឲ្យ​កាន់​តែ​ប្រសើរ​ឡើង​និង​ជួយ​សម្រួល​ដល់​ភ្ញៀវ​ទេសចរ​រវាង​ប្រទេស​ទាំង​ពីរ​។

លោក​មាន​ប្រសាសន៍​ថា៖ «​យើង​នឹង​ទទួល​បាន​អត្ថ​ប្រយោជន៍​ទៅ​វិញ​ទៅ​មក​ហើយ​ក៏​គ្មាន​ប្រទេស​ណា​មួយ​ខាត​បង់ ឬ​ឈ្នះ​នោះ​ទេ។ គម្រោង​នេះ​នឹង​ជួយ​ធ្វើ​ឲ្យ​កាន់​តែ​ងាយ​ស្រួល​ចំពោះ​ការ​ធ្វើ​ដំណើរ​របស់​អ្នក​ទេសចរ​។​បើ​ពួកគេ​នៅ​ជិត​ស្ថាន​ទូត ឬ​ការិយាល័យ​កុងស៊ុល​របស់​កម្ពុជា ឬ​ថៃ ពួកគេ​អាច​ដាក់​សុំ​ទិដ្ឋាការ​នៅ​ការិយាល័យ​ជិត​នោះ​បាន​»។

លោក​បាន​បន្ថែម​ថា៖​«ស្ថានទូត ឬ​ការិយាល័យ​កុងស៊ុល​របស់​យើង​គ្រាន់​តែ​ចេញ​ទិដ្ឋាការ​ឲ្យ​ពួកគេ​ប៉ុន្តែ​ពួកគេ​នៅ​តែ​ត្រូវ​ចំណាយ​ប្រាក់​នៅ​តាម​ព្រំ​ដែន​ត្រួត​ពិនិត្យ​ដដែល។ គ្មាន​នរណា​ម្នាក់​ខាត​បង់​នោះ​ទេ»។

លោក​រដ្ឋ​មន្ត្រី បាន​ថ្លែង​បន្ត​ថា៖ «វា​ជា​ការ​ល្អ​សម្រាប់​យើង​ពី​ព្រោះ​នៅ​ប្រទេស​មួយ​ចំនួន​យើង​អត់​មាន​ការិយាល័យ​កុងស៊ុល​គ្រប់​គ្រាន់​ទេ​។ ប្រសិន​បើ​គម្រោង​សាក​ល្បង​នេះ ទទួល​បាន​ជោគ​ជ័យ​យើង​នឹង​បន្ត​ធ្វើ​បែប​នេះ​ជាមួយ​ឡាវ មីយ៉ាន់មា និង​វៀតណាម​ទៀត​»។

លោក អាង គឹមអ៊ាង ប្រធាន​សមាគម​ទី​ភ្នាក់​ងារ​ទេសចរណ៍​កម្ពុជា​បាន​ស្វាគមន៍​ចំពោះ​គម្រោង​នេះ ដោយ​លោក​ថ្លែង​ថា៖​«វា​ពិត​ជា​ល្អ​មែន​ទែន ពី​ព្រោះ​ភ្ញៀវ​ទេសចរ​អាច​ពេញ​ចិត្ត​ធ្វើ​ដំណើរ​កម្សាន្ត​មក​កាន់​ប្រទេស​ទាំង​ពីរ​នេះ​។ លើស​ពី​នេះ​គម្រោង​នេះ​ក៏​អាច​ជួយ​ទាក់​ទាញ​ភ្ញៀវ​ទេសចរ​កាន់​តែ​ច្រើន​មក​ទស្សនា​ប្រទេស​យើង​ផង​ដែរ​»។

ប្រទេស​ថៃ​ធ្លាប់​បាន​ក្លាយ​ជា​តំបន់​ទេសចរណ៍​ដ៏​សំខាន់​សម្រាប់​ប្រទេស​កម្ពុជា​ជា​ច្រើន​ឆ្នាំ​មក​ហើយ​។ ទោះ​បី​ជា​យ៉ាង​ណា​ទំនាក់​ទំនង​រវាង​ប្រទេស​ទាំង​ពីរ​ចាប់​ផ្តើម​ល្អក់​កករ​ចាប់​ពី​ឆ្នាំ​២០០៨​មក​នៅ​ពេល​ដែល​អំពើ​ហិង្សា​បាន​ផ្ទុះ​ឡើង​ដោយ​យោធា​រវាង​ប្រទេស​ទាំង​ពីរ​នៅ​តាម​ព្រំដែន​។ ប៉ុន្តែ​ស្ថានភាព​មាន​ភាព​ប្រសើរ​ឡើង​វិញ​ហើយ បន្ទាប់​ពី​លោកស្រី យីងឡាក់ នាយក​រដ្ឋមន្ត្រី​ថៃ​បាន​ឡើង​កាន់​អំណាច​។

លោក ថោង ខុន បាន​បន្ថែម​ថា បច្ចុប្បន្ន​នេះ ចំនួន​ភ្ញៀវ​ទេសចរ​មក​ទស្សនា​កម្ពុជា​តាម​រយៈ​ប្រទេស​ថៃ​បាន​កើន​ឡើង។

លោក​មាន​ប្រសាសន៍​ថា៖​«​ឥឡូវ​នេះ​ចំនួន​ភ្ញៀវ​ទេសចរ​មក​ពី​ថៃ​មាន​ចំនួន​៣៥​ភាគ​រយ​ដែល​ដូច​គ្នា​នឹង​ប្រទេស​វៀតណាម​ដែរ​។ ខ្ញុំ​សង្ឃឹម​ថា នៅ​ពេល​គម្រោង​នេះ​ទទួល​បាន​ជោគ​ជ័យ យើង​នឹង​កាន់​តែ​ទទួល​បាន​ភ្ញៀវ​ទេសចរ​ច្រើន​ឡើង​ថែម​ទៀត​»។

ទិន្នន័យ​ពី​ក្រសួង​ទេចរណ៍​បាន​បង្ហាញ​ថា ភ្ញៀវ​ទេសចរ​មក​ពី​ប្រទេស​ថៃ​ស្ថិត​នៅ​ចំណាត់​ថ្នាក់​លេខ​៥​សម្រាប់​រយៈ​ពេល​១០​ខែ​ដំបូង​នៃ​ឆ្នាំ​នេះ​ដែល​ស្មើ​នឹង​ចំនួន​១៦០ ០២៨​នាក់ គឺ​កើន​ឡើង​៩០,១​ភាគ​រយ​បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។

កាល​ពី​ដើម​ខែ​នេះ ប្រទេស​ថៃ​និង​កម្ពុជា ក៏​បាន​ប្រកាស​ផង​ដែរ​ថា ក្រុមហ៊ុន​ដឹក​អ្នក​ដំណើរ​របស់​រដ្ឋ​ថៃ នឹង​ចាប់​ផ្តើម​ផ្តល់​សេវា​ដឹក​ជញ្ជូន​អ្នក​ដំណើរ​ពី​ទីក្រុង​សៀមរាប និង​ភ្នំពេញ ទៅ​ទីក្រុង​បាងកក និង​ពី​ទីក្រុង​បាងកក មក​ទីក្រុង​សៀមរាប និង​ភ្នំពេញ ដោយ​ចាប់​ផ្តើម​ពី​ថ្ងៃ​ទី​២៩ ខែ​ធ្នូ​នេះ​តទៅ៕ CC

អត្ថបទគួរចាប់អារម្មណ៍