.jpg)
លោកនាយករដ្ឋមន្ត្រី ហ៊ុន សែន ចាប់ដៃជាមួយឧបនាយករដ្ឋមន្ត្រីទី ១ លោក Han Zheng កាលពីសប្តាហ៍មុន។ រូបថត ហ្វេសប៊ុក
ភ្នំពេញៈ កម្ពុជារំពឹងថានឹងមានទំនាក់ទំនងសេដ្ឋកិច្ចកាន់តែខ្លាំងឡើងៗជាមួយចិន បន្ទាប់ពីចូលរួមពិធីពិព័រណ៍ពាណិជ្ជកម្ម ចិន-អាស៊ាន នៅទីក្រុង ណាននីង កាលពីសប្តាហ៍មុន ជាទីដែលលោកនាយករដ្ឋមន្រ្តីកម្ពុជាបានជួបសន្ទនាផ្ទាល់ជាមួយតំណាងក្រុមហ៊ុនចិនធំៗ និងមានអនុស្សរណៈនៃការយោគយល់សរុបចំនួន ១២ ត្រូវបានចុះហត្ថលេខា។
ពិព័រណ៌ពាណិជ្ជកម្ មចិន-អាស៊ាន លើកទី ១៥ ដែលមានរយៈពេល ៤ ថ្ងៃបានធ្វើឡើងនៅទីក្រុង ណាននីង ប្រទេស ចិន ហើយមានតំណាងក្រុមហ៊ុនសរុបជាង ២ ៧០០ ក្រុមហ៊ុនមកពីប្រទេស ចិន និងបណ្តាប្រទេសនៅអាស៊ានចូលរួម។
ក្នុងជំនួបដាច់ដោយឡែកមួយជាមួយវិនិយោគិនចិន នៅព្រឹតិ្តការណ៍រយៈពេល ៤ ថ្ងៃ លោកនាយករដ្ឋមន្ត្រី ហ៊ុន សែន បានជួបជាមួយមេដឹកនាំក្រុមហ៊ុនចិន ចំនួន ៨ ដែលរួមទាំងលោក Lei Jun ប្រធានស្ថាបនិក និងជាអគ្គនាយក Xiaomi ជាក្រុមហ៊ុនផលិតទូរស័ព្ទស្មាតហ្វូនរបស់ចិន។
លើសពីនោះ មាន MoU ១២ ត្រូវបានចុះហត្ថលេខា រវាងមន្ដ្រីពាណិជ្ជកម្មកម្ពុជា និងមន្ដ្រីពាណិជ្ជកម្មទីក្រុង ណាននីង នៃខេត្ត គ័ងស៊ី ក្នុងគោលបំណងជំរុញកិច្ចសហប្រតិបត្តិការសេដ្ឋកិច្ច រវាងភាគីទាំង ២។ នេះបើតាមសេចក្ដីប្រកាសព័ត៌មានចេញផ្សាយលើទំព័រហ្វេសប៊ុករបស់ក្រសួងពាណិជ្ជកម្ម។
ខណៈសេចក្ដីប្រកាសព័ត៌មានមិនបានពន្យល់ព័ត៌មានលម្អិតអំពី MoU នីមួយៗ សេចក្ដីប្រកាសព័ត៌មានឲ្យដឹងថា តម្លៃសរុបនៃ MoU ទាំង ១២ រួមគ្នា មានតម្លៃ ៨០ លានដុល្លារ។
MoU នេះគ្របដណ្ដប់លើវិស័យមួយចំនួន រួមមានការបង្កើនសមត្ថភាពសម្រាប់មគ្គុទេសក៍ទេសចរណ៍ វិស្វកម្ម ការសាងសង់ព្រលានយន្តហោះ និងផែនការបង្កើតសាកលវិទ្យាល័យសម្រាប់ស្រាវជ្រាវឧស្សាហកម្ម និងមជ្ឈមណ្ឌលបណ្ដុះបណ្ដាលផ្នែកទេសចរណ៍។
លោក លឹម ហេង អនុប្រធានសភាពាណិជ្ជកម្មកម្ពុជា ដែលបានចូលរួមពិព័រណ៍ ចិន-អាស៊ាន លើកទី ១៥ នៅទីក្រុង ណាននីង បានឲ្យដឹងកាលពីម្សិលមិញថា ពិព័រណ៍ឆ្នាំនេះ បានបង្ហាញការទាក់ទាញកាន់តែច្រើន នៃការវិនិយោគរបស់ប្រទេស ចិន មកកម្ពុជា។
លោកថ្លែងថា៖ «បន្ទាប់ពីព្រឹត្តិការណ៍នេះ យើងនឹងមើលឃើញលំហូរចូលវិនិយោគចិនកាន់តែច្រើន ហើយនឹងបន្តជំរុញពាណិជ្ជកម្មរវាង កម្ពុជា និងចិន»៕LA
