.jpg)
សកម្មភាពក្រុមកម្មករកំពុងសម្អាតសម្បុកត្រចៀកកាំដោយទាញយកសំរាមផ្សេងៗដែលនៅជាប់ក្នុងសម្បុក។ ហេង ជីវ័ន
ភ្នំពេញៈ កម្ពុជារំពឹងថានឹងអាចនាំចេញសម្បុកត្រចៀកកាំទៅទីផ្សារចិនជាផ្លូវការនៅឆ្នាំក្រោយ ខណៈបច្ចុប្បន្នមន្ត្រីជំនាញនៃក្រសួងកសិកម្មកំពុងរៀបចំនីតិវិធី និងធ្វើការជាមួយអាជ្ញាធរគយរបស់ចិន។ នេះបើតាមអគ្គនាយកនៃអគ្គនាយកដ្ឋានកសិកម្ម។
កាលពីចុងខែតុលាលោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម បានដឹកនាំគណៈប្រតិភូក្រសួងទៅជួបពិភាក្សាជាមួយភាគីចិនក្នុងគោលបំណងជំរុញការនាំចេញសម្បុកត្រចៀកកាំទៅកាន់ប្រទេសចិនជាផ្លូវការ។
យោងតាមការចុះផ្សាយរបស់ភ្នំពេញ ប៉ុស្តិ៍ កាលពីឆ្នាំ ២០១៦ បានឲ្យដឹងថា តម្លៃពាណិជ្ជកម្មសម្បុកត្រចៀកកាំនៅទូទាំងពិភពលោកត្រូវបានប៉ាន់ប្រមាណថាមានចំនួន ៥ ពាន់លានដុល្លារ ក្នុង ១ ឆ្នាំ។ ចិនគឺជាទីផ្សារធំជាងគេ ខណៈឥណ្ឌូនេស៊ី និងម៉ាឡេស៊ី គឺជាប្រទេសផ្គត់ផ្គង់ឈានមុខគេក្នុងពិភពលោក។
លោក ងិន ឆាយ បានប្រាប់ភ្នំពេញប៉ុស្តិ៍កាលពីម្សិលមិញថា បច្ចុប្បន្ននេះក្រុមការងារជំនាញក្រសួងកសិកម្មកំពុងរៀបចំបកប្រែឯកសារភាសាចិនស្តីពីលក្ខខណ្ឌដែលតម្រូវឲ្យកម្ពុជាត្រូវបំពេញមុននឹងផ្ញើទៅក្រុមអ្នកជំនាញចិនឲ្យមកពិនិត្យស្ថានភាពជាក់ស្តែងនៅកន្លែងចិញ្ចឹម គុណភាពផលិតផល និងភូតគាមអនាម័យជាដើម។
លោកថ្លែងថា៖ «អគ្គនាយកដ្ឋានកំពុងខិតខំយ៉ាងខ្លាំងក្នុងការជួបចរចាជាមួយភាគីចិនដើម្បីធ្វើយ៉ាងណាឲ្យផលិតផលទឹកមាត់ត្រចៀកកាំរបស់យើងអាចនាំចេញជាផ្លូវការទៅកាន់ប្រទេសចិន»។
បច្ចុប្បន្នទិន្នន័យឧស្សាហកម្មសម្បុកត្រចៀកកាំរបស់កម្ពុជាមិនត្រូវបានកត់ត្រាជាផ្លូវការទេ ខណៈការផលិតភាគច្រើនធ្វើឡើងជាលក្ខណៈឯកជន ឬបុគ្គល។ ការជួញដូរ និងនាំចេញក៏ត្រូវបានធ្វើឡើងក្រៅប្រព័ន្ធផងដែរ។
តាមលោក ងិន ឆាយ លក្ខខណ្ឌដែលអាចនាំចេញទៅទីផ្សារចិនរួមមាន បរិស្ថានផ្ទះចិញ្ចឹម និងកន្លែងជុំវិញត្រូវស្អាត និងរោងចក្រកែច្នៃជាដើម។
លោក ណាង សុធី ប្រធានសហព័ន្ធសម្បុកត្រចៀកកាំកម្ពុជាបាននិយាយថា បើកម្ពុជាអាចនាំចេញសម្បុកត្រចៀកកាំជាផ្លូវការទៅចិននោះ គឺជាការល្អ ខណៈកន្លងមកការនាំចេញត្រូវបានធ្វើឡើងដោយឈ្មួញជាលក្ខណៈឯកជន។ លោកថ្លែងថា៖ «នៅពេលមានទីផ្សារប្រទេសចិនជាផ្លូវការ វានឹងជួយធ្វើឲ្យអ្នកចិញ្ចឹមកាន់តែមានទំនុកចិត្ត ហើយការសម្រិតសម្រាំងគុណភាព ព្រមទាំងតម្លៃក៏នឹងអាចមានស្ថិរភាពល្អផងដែរ»។
លោកបន្តថា កាលពីដំបូងត្រចៀកកាំត្រូវបានគេចិញ្ចឹមភាគច្រើននៅតាមបណ្តាខេត្តជាប់មាត់សមុទ្រ តែបច្ចុប្បន្នត្រូវបានគេចិញ្ចឹមស្ទើរតែគ្រប់ខេត្ត។ លោកបញ្ជាក់ថា៖ «កំណើននេះភាគច្រើនដោយសារអ្នកចិញ្ចឹមពួកគាត់មានក្តីរំពឹងទៅលើទីផ្សារប្រទេសចិន ស្របពេលដែលបច្ចេកវិទ្យាថ្មីៗសម្រាប់ការចិញ្ចឹមក៏មានភាពងាយស្រួលជាងមុនផងដែរ»។
បច្ចុប្បន្នសម្បុកត្រចៀកកាំ មិនទាន់សម្អាតមានតម្លៃចន្លោះពី ៧៥០ ទៅ ៨៥០ ដុល្លារក្នុង ១ គីឡូក្រាម ចំណែកសម្បុកដែលសម្អាតរួចអាចមានតម្លៃពី ១ ៥០០ ដុល្លារ ដល់ ៣ ៥០០ ដុល្លារ អាស្រ័យទៅលើគុណភាព។ នេះបើតាមលោក ណាង សុធី ។
លោកបន្តថា បច្ចុប្បន្នក្នុង ១ ខែកម្ពុជាអាចប្រមូលផលសម្បុកត្រចៀកកាំ បានយ៉ាងតិចចន្លោះពី ១ ០០០ ទៅ ១ ៥០០ គីឡូក្រាម ក្នុងនោះតម្រូវការក្នុងស្រុកមានប្រមាណ ៣០ ភាគរយ និង ៧០ ភាគរយ ត្រូវបានឈ្មួញនាំចេញទៅក្រៅប្រទេសដែលភាគច្រើននាំចេញក្រៅផ្លូវការទៅចិន៕ LA
