ម៉ានីលៈ គណៈប្រតិភូកម្ពុជាដែលបានចូលរួមកិច្ចប្រជុំសេដ្ឋកិច្ចក្នុងតំបន់បានថ្លែងកាលពីថ្ងៃសុក្រថា ទោះបីសេដ្ឋកិច្ចក្នុងតំបន់អាចនឹងរងផលប៉ះពាល់ ដោយសារការបង្កើនការគាំពារនិយមរបស់អាមេរិកក៏ដោយ ក៏កម្ពុជាត្រូវបានព្យាករថានឹងមើលឃើញកំណើនបន្តិចបន្តួចដែរ។
កិច្ចប្រជុំថ្នាក់រដ្ឋមន្ដ្រីហិរញ្ញវត្ថុអាស៊ានបូក ៣ លើកទី ២១ និងប្រធានធនាគារកណ្ដាលដែលបានរៀបចំឡើងនៅក្នុងកិច្ចប្រជុំប្រចាំឆ្នាំរបស់ធនាគារអភិវឌ្ឍន៍អាស៊ី (ADB) នៅទីក្រុងម៉ានីលបានពិភាក្សាបញ្ហាប្រឈមសេដ្ឋកិច្ចពិភពលោក និងក្នុងតំបន់ដែលរួមទាំងការបារម្ភដោយសារ «សង្គ្រាមពាណិជ្ជកម្ម» ដែលដឹកនាំដោយអាមេរិក។
លោក វង្សី វិស្សុត រដ្ឋលេខាធិការក្រសួងហិរញ្ញវត្ថុកម្ពុជាដែលបានចូលរួមក្នុងកិច្ចប្រជុំនេះរួមជាមួយលោក ជា ចាន់តូ ទេសាភិបាលធនាគារជាតិនៃកម្ពុជាបានថ្លែងថា កិច្ចប្រជុំនេះបានលើកឡើងពីការបារម្ភជុំវិញការបង្កើនវោហារស័ព្ទគាំពារនិយមរបស់អាមេរិក ដែលបានបណ្ដាលឲ្យការចរចាមានភាពតានតឹងរវាងមន្ដ្រីរបស់អាមេរិក និងចិននៅទីក្រុងប៉េកាំងកាលពីសប្ដាហ៍មុន។
លោក វង្សី វិស្សុត ថ្លែងថា៖ «ការគាំពារនិយមរបស់អាមេរិក គឺជាសង្គ្រាមពាណិជ្ជកម្ម។ វានឹងបណ្ដាលឲ្យមានផលប៉ះពាល់ដល់អាស៊ានបូក ៣ ដោយសារភាគច្រើននៃប្រទេសទាំងនោះធ្វើពាណិជ្ជកម្មធំៗជាមួយអាមេរិក»។ លោកបន្តថា៖ «វាអាចប៉ះពាល់ដល់ស្ថិរភាពហិរញ្ញវត្ថុក្នុងតំបន់»។ លោកបន្ថែមថា អាស៊ានបូក ៣ កំពុងស្វែងរកយុទ្ធសាស្ដ្រក្នុងការកាត់បន្ថយហានិភ័យទាំងនេះ។
លោក វង្សី វិស្សុត ថ្លែងថា ប៉ុន្តែមូលនិធិរូបិយវត្ថុអន្តរជាតិ (IMF) វាយតម្លៃថា ប្រទេសកម្ពុជាទំនងត្រូវបានគេចផុតពីការខូចខាតនេះក្នុងជំហានដំបូង យ៉ាងហោចណាស់នៅក្នុងជុំទី ១ របស់ខ្លួន។
ទីផ្សារអាមេរិកមានចំនួន ២២ ភាគរយនៃការនាំចេញរបស់កម្ពុជា ៨០ ភាគរយក្នុងចំណោមនោះគឺសម្លៀកបំពាក់។ ប៉ុន្តែសម្លៀកបំពាក់មិនត្រូវបានកំណត់ទិសដៅដោយឧបសគ្គពាណិជ្ជកម្មនោះទេរហូតមកដល់ពេលនេះ។
លោកថ្លែងថា៖ «IMF ទើបនឹងធ្វើការវាយតម្លៃកម្ពុជានៅក្នុងកិច្ចប្រជុំដែលការកែទម្រង់ពន្ធរបស់អាមេរិកនឹងផ្ដល់អត្ថប្រយោជន៍ដល់កម្ពុជាដោយព្យាករថានឹងបន្តមានកំណើនតិចតួចក្នុងរយៈពេលមួយឆ្នាំខាងមុខ»។ លោកបន្ថែមថា ការកាត់បន្ថយពន្ធសម្រាប់ក្រុមហ៊ុនអាមេរិកត្រូវបានរំពឹងថា នឹងធ្វើឲ្យមានការកើនឡើងនៅក្នុងការទិញពីកម្ពុជា។
ប៉ុន្តែលោក Stephen Groff អនុប្រធាន ADB ទទួលបន្ទុកអាស៊ីខាងកើត អាស៊ីអាគ្នេយ៍ និងប៉ាស៊ីហ្វិកថ្លែងថាវាឆាប់ពេកក្នុងការសន្មតថាផលប៉ះពាល់កើតចេញពីភាពតានតឹងពាណិជ្ជកម្មរវាងអាមេរិក-ចិននោះ។
លោកថ្លែងថា៖ «ការរឹតបន្តឹងពាណិជ្ជកម្មរវាងចិន និងអាមេរិក ពួកគេនៅតែពិភាក្សា និងការចរចានៅឡើយ»៕LA