ភ្នំពេញៈ ខណៈមានការបង្ហាញពីគម្រោងសាងសង់ឃ្លាំង និងឡសម្ងួតស្រូវកាន់តែច្រើននៅកម្ពុជា តំណាងនៅក្នុងឧស្សាហកម្មនេះមានសុទិដ្ឋិនិយមថា កម្ពុជានឹងមិនជួបបញ្ហាប្រឈមដោយសារកង្វះខាត ឃ្លាំងស្តុក និងឡសម្ងួតច្រើនទេនៅឆ្នាំ ២០១៩ នេះ។
អនុប្រធានសហព័ន្ធស្រូវអង្ករកម្ពុជា (CRF) លោក នង វាសនា បានឲ្យដឹងថា ដោយសារការខិតខំអភិវឌ្ឍសមត្ថភាពរបស់ក្រុមហ៊ុនរោងម៉ាស៊ីនកិនស្រូវនីមួយៗរួមផ្សំនឹងការជួយគាំទ្រពីស្ថាប័នរដ្ឋផងនោះ រដូវកាលប្រមូលផលឆ្នាំនេះនឹងមិនមានបញ្ហាដូច ២-៣ ឆ្នាំមុនទៀតទេ ខណៈបច្ចុប្បន្នមានឡសម្ងួត និងឃ្លាំងស្តុកស្រូវត្រូវបានដាក់ដំណើរការស្ទើរតែគ្រប់ខេត្តទូទាំងប្រទេស។
លោកថ្លែងថា៖ «ខ្ញុំគិតថាយើងនឹងមិនមានបញ្ហាទៀតទេ ព្រោះកន្លងមករោងម៉ាស៊ីនតូចៗជាច្រើនបានអភិវឌ្ឍខ្លួនជាម៉ាស៊ីនបែបទំនើប ដែលមានសមត្ថភាពខ្លាំងអាចសម្ងួតស្រូវបានរាប់រយ ឬពាន់តោនក្នុង ១ ថ្ងៃ»។
លោក វាសនា បានអះអាងថា បច្ចុប្បន្ននៅកម្ពុជាមានរោងម៉ាស៊ីនកិនស្រូវសរុបជាង ៣០០ ដែលជារោងម៉ាស៊ីនធំៗអាចមានសមត្ថភាពស្តុកដល់រាប់ម៉ឺនតោន។
ទោះយ៉ាងណាលោកលើកឡើងថា អ្វីដែលជាឧបសគ្គសម្រាប់វិស័យស្រូវអង្ករកម្ពុជា អាចដោយសារតម្លៃស្រូវអង្ករនៅទីផ្សារអន្តរជាតិមានការប្រកួតប្រជែងខ្លាំង ខណៈដែលការផលិតស្រូវនៅតាមបណ្តាប្រទេសនាំចេញស្រូវបានកើនឡើងស្ទើរគ្រប់ប្រទេស។
បើតាមលោក វាសនា កាលពីឆ្នាំ ២០១៨ កម្ពុជាទទួលបានទិន្នផលស្រូវសរុបក្នុងរង្វង់ ១០,២ លានតោន។
ឃ្លាំងស្តុកស្រូវ និងឡសម្ងួតចំនួន ៣ ត្រូវបានដាក់ឲ្យដំណើរការកាលពីចុងឆ្នាំ ២០១៨ ដែលមាននៅក្នុងខេត្តកំពង់ធំ ព្រៃវែង និងតាកែវ ដែលឃ្លាំងស្តុក និងឡសម្ងួតនីមួយៗអាចផ្ទុកស្រូវបាន ៥០ ម៉ឺនតោន និងសម្ងួតស្រូវបាន ១ ៥០០ តោនក្នុង ១ ថ្ងៃ។
កាលពីឆ្នាំ ២០១៨ ឃ្លាំងស្តុកនៅខេត្តកំពង់ចាម ដែលជាជំនួយរបស់កូរ៉េខាងត្បូង តម្លៃ ២,៨ លានដុល្លារក៏ត្រូវបានដាក់ឲ្យដំណើរការ ដែលមានសមត្ថភាពសម្ងួតស្រូវបាន ៨០ តោនក្នុង ១ ថ្ងៃ និងអាចស្តុកស្រូវបាន ៦០០ តោន។
លោក សុង សារ៉ន នាយកប្រតិបត្តិក្រុមហ៊ុន CEO of Amru Rice (Cambodia) Co., Ltd ដែលមានឃ្លាំងស្តុក និងឡសម្ងួតស្រូវធំៗ ក្នុងខេត្តកំពង់ធំ និងបាត់ដំបង បាននិយាយថា លោកគិតថា ការប្រមូលផលស្រូវឆ្នាំនេះ នឹងមិនមានបញ្ហាកង្វះខាតឡសម្ងួត និងឃ្លាំងស្តុកទេ។ លោកបានបន្តថា នៅរដូវកាលប្រមូលផលស្រូវវស្សាខាងមុខ ក្រុមហ៊ុនលោកមានផែនការប្រមូលទិញស្រូវឲ្យបានក្នុងរង្វង់ចន្លោះពី ១០ ម៉ឺន ២០ ម៉ឺនតោន។
លោកថ្លែងថា៖ «ក្រុមហ៊ុនខ្ញុំមិនមានបញ្ហាទេ ព្រោះយើងត្រៀមខ្លួនរួចហើយសម្រាប់រដូវប្រមូលផលខាងមុខ»។
ទោះបីយ៉ាងណាលោកបញ្ជាក់ថា ដើម្បីឲ្យការប្រមូលផលស្រូវអាចដំណើរការទៅមុខដោយរលូន គេក៏ត្រូវគិតទៅលើបញ្ហាមួយចំនួនដូចជា កត្តាធម្មជាតិតម្រូវការហិរញ្ញប្បទាន ការសហការរវាងអ្នកវិនិយោគ និងប្រជាកសិករ ក្នុងការធ្វើផែនការច្រូតកាត់ (ចៀសវាងប្រមូលផលក្នុងពេលតែមួយ) ហេដ្ឋារចនាសម្ព័ន្ធក្នុងការដឹកជញ្ជូន និងផែនការសម្រាប់ការនាំចេញជាដើម៕ LA