.jpg)
ទេសចរចិនកំពុងអង្គុយលេងនៅឆ្នេរអូរឈើទាល ក្រុងព្រះសីហនុកាលពីឆ្នាំ ២០១៨។ ហេង ជីវ័ន
ភ្នំពេញៈ កម្ពុជា និងចិនបានចុះអនុស្សរណៈនៃការយោគយល់គ្នាលើកិច្ចសហប្រតិបត្តិការទេសចរណ៍ ឆ្នាំ ២០១៩-២០២១ ក្នុងគោលបំណងទាក់ទាញភ្ញៀវទេសចរ និងវិនិយោគជនជាតិចិនកាន់តែច្រើនមកកម្ពុជា។
អនុស្សរណៈនេះត្រូវបានចុះហត្ថលេខាដោយ លោក ថោង ខុន រដ្ឋមន្រ្តីក្រសួងទេសចរណ៍កម្ពុជា និងលោក Lin Jingzhen អនុប្រធានប្រតិបត្តិរបស់ធនាគារចិន (Bank of China) ក្នុងអំឡុងពេលនៃការចូលរួមក្នុង «វេទិកាខ្សែក្រវាត់ និងផ្លូវ» លើកទី២ នៅទីក្រុងប៉េកាំង កាលពីថ្ងៃទី ២៦។
ខ្លឹមសារនៃអនុស្សរណៈរួមមាន ការបង្កើតផលិតផល ទីផ្សារ ការផ្សព្វផ្សាយ និងការជួយសម្រួលដល់ការបង្កើតការទូទាត់តាមប្រព័ន្ធអនឡាញ ឬតាមប្រព័ន្ធឌីជីថលដូចជា Union Pay, WeChat Pay និង AliPay ជាប្រាក់យន់សម្រាប់ភ្ញៀវទេសចរចិនជាដើម។
លោក តុប សុភ័ក អ្នកនាំពាក្យក្រសួងទេសចរណ៍ បានឲ្យដឹងកាលពីម្សិលមិញថា អនុស្សរណៈនេះនឹងជួយឲ្យកម្ពុជាកាន់តែមានសក្តានុពលក្នុងការទាក់ទាញភ្ញៀវទេសចរចិន ដើម្បីកម្ពុជាសម្រេចបានតាមការរំពឹងទុកក្នុងការទទួលភ្ញៀវទេសចរចិនប្រមាណ ៣ លាននាក់ ក្នុងឆ្នាំ ២០២០ និងបន្តកើនដល់ ៥ លាននាក់នៅឆ្នាំ ២០២៥ និង ៨ លាននាក់នៅឆ្នាំ ២០៣០។
លោកថ្លែងថា៖ «ចិនមកកម្ពុជា មិនមែនសុទ្ធតែអ្នកទេសចរទាំងអស់នោះទេ តែក៏មានអ្នកវិនិយោគផងដែរ។ ការមកដល់នៃភ្ញៀវទេសចរនឹងជួយបង្កើតការងារថ្មីៗជាច្រើនសម្រាប់កម្ពុជា»។
ខ្លឹមសារនៃ MoU នោះក៏បានលើកឡើងពីការជំរុញការតភ្ជាប់ផ្លូវអាកាសទៅគោលដៅទេសចរណ៍សំខាន់ៗ ការបណ្តុះបណ្តាលធនធានមនុស្ស ការអភិវឌ្ឍសមត្ថភាពមន្រ្តីសាធារណៈ ព្រមទាំងសកម្មភាពមួយចំនួនដើម្បីគាំទ្រ និងជំរុញដល់ការអភិវឌ្ឍវិស័យទេសចរណ៍កម្ពុជាផងដែរ។
ការប្រើប្រាស់សេវា
មានការលើកឡើងថា ការមកដល់យ៉ាងគំហុកនៃអ្នកទេសចរចិន ហាក់មិនសូវផ្តល់ផលវិជ្ជមានច្រើនសម្រាប់អ្នកនៅក្នុងស្រុកនោះ ដោយសារបច្ចុប្បន្នភាគច្រើនគេសង្កេតឃើញជនជាតិចិនបានបង្កើតសេវាស្ទើរសព្វគ្រប់ក្នុងការបម្រើដល់ជនជាតិចិនដែលមកទស្សនា និងរស់នៅកម្ពុជា។
ប៉ុន្តែអ្នកនាំពាក្យក្រសួងទេសចរណ៍បានលើកឡើងថា ជាធម្មតាការងារក្នុងវិស័យទេសចរណ៍ ទោះបីប្រជាពលរដ្ឋក្នុងស្រុកមិនទទួលបានការងារដោយផ្ទាល់ ក៏ទទួលបានដោយប្រយោលដែរ។ លោកថ្លែងថា៖ «ខ្ញុំទទួលស្គាល់កន្លែងខ្លះចិនបើកអាជីវកម្មសម្រាប់ចិនគ្នាគាត់ខ្លះ តែក៏មានសម្រាប់ខ្មែរផងដែរ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានសាទរចំពោះការចុះ MoU នេះថាជាការបង្កើនកិច្ចសហប្រតិបត្តិការជាអន្តរជាតិជាមួយចិន។ ប៉ុន្តែលោកអះអាងថា ដើម្បីឲ្យការរីកចម្រើនបានដល់ប្រជាជនក្នុងស្រុកគ្រប់ស្រទាប់នោះ អាជ្ញាធរត្រូវពង្រឹង និងបង្កើតច្បាប់បន្ថែម ដើម្បីកំណត់ពីប្រភេទអាជីវកម្ម និងទំហំទឹកប្រាក់វិនិយោគសម្រាប់ជនបរទេស ដោយមិនមែនគ្រាន់តែមានប្រាក់បន្តិចបន្តួចយកទៅបើកអាជីវកម្មតាមការនឹកឃើញនោះទេ។
លោកថ្លែងថា៖ «ខ្ញុំមានសុទិដ្ឋិនិយមថា កម្ពុជានឹងមិនបាត់បង់ប្រយោជន៍ពីការសហការជាមួយចិនទេ ប្រសិនបើយើងអនុវត្តបានទៅតាមច្បាប់ដែលខ្លួនមាន»។
លោក លូ ម៉េង សហប្រធានក្រុមការងារវិស័យទេសចរណ៍ឯកជនរដ្ឋាភិបាល បានប្រាប់ថា កំណើនភ្ញៀវទេសចរដែលធ្វើដំណើរមកកម្ពុជាដោយស្របច្បាប់ គឺជារឿងល្អ ព្រោះវិស័យទេសចរណ៍ អាចជួយកែប្រែកម្រិតជីវភាពប្រជាជន និងអភិវឌ្ឍប្រទេសកម្ពុជាឲ្យកាន់តែរីកចម្រើន។ ទោះយ៉ាងណាលោកលើកឡើងថា៖ «កម្ពុជាក៏គួរតែពង្រឹងការអនុវត្តច្បាប់ ការគ្រប់គ្រង និងការប្រកបអាជីវកម្មរបស់ជនបរទេសផងដែរ»។
ទិន្នន័យក្រសួងទេសចរណ៍ បានឲ្យដឹងថា កាលពីឆ្នាំ ២០១៨ កម្ពុជាទទួលបានភ្ញៀវទេសចរសរុបចំនួន ៦,២ លាននាក់ កើនឡើង ១១ ភាគរយ បើធៀបនឹងឆ្នាំ ២០១៧ ហើយភ្ញៀវទេសចរចិន នៅតែបន្តឈានមុខគេ ២ ឆ្នាំជាប់គ្នា ជាមួយនឹងចំនួនសរុបចំនួនប្រមាណ ២ លាននាក់៕LA
