The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា-ប៉ាគីស្ថាន​ប្តេជ្ញា​ពង្រឹង​វិនិយោគ​ពាណិជ្ជកម្ម​




កម្ពុជា-ប៉ាគីស្ថាន​ប្តេជ្ញា​ពង្រឹង​វិនិយោគ​ពាណិជ្ជកម្ម​

កម្ពុជា-ប៉ាគីស្ថាន​ប្តេជ្ញា​ពង្រឹង​វិនិយោគ​ពាណិជ្ជកម្ម​

121217_13
សកម្មភាពនៅកំពង់ផែស្វយ័តភ្នំពេញ ផា លីណា

ភ្នំពេញៈ ប៉ាគីស្ថាន​កំពុង​ស្វែង​រក​ការ​បង្កើន​ទំនាក់​ទំនង​ពាណិជ្ជកម្ម​ការ​វិនិយោគ និង​វិស័យ​ទេសចរណ៍​ជាមួយ​ប្រទេស​កម្ពុជា​។

ទិន្នន័យ​ពី​ស្ថានទូត​ប៉ាគីស្ថាន​ប្រចាំ​កម្ពុជា​បាន​បង្ហាញ​ថា​ពាណិជ្ជកម្ម​ទ្វេ​ភាគី​រវាង​ប្រទេស​ទាំង​ពីរ មាន​លក្ខណៈ​ល្អ​ប្រសើរ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​។​តម្លៃ​សរុប​នៃ​ពាណិជ្ជកម្ម​ទ្វេភាគី​បាន​កើន​ឡើង​ដល់​១៦​លាន​ដុល្លារ​នៅ​ឆ្នាំ​២០១១​ហើយ​នៅ​ឆមាស​ទី​មួយ​ឆ្នាំ​នេះ បាន​កើន​ដល់​៤៣​លាន​ដុល្លារ​។

លោក Fazalur-Rahman Kazi ឯក​អគ្គ​រដ្ឋទូត​ប៉ាគីស្ថាន​បាន​ជួប​ជាមួយ​ឧប​នាយក​រដ្ឋមន្ត្រី​សុខ អាន កាល​ពី​សប្តាហ៍​មុន​ហើយ​បាន​និយាយ​ថា​ប៉ាគីស្ថាន​ចង់​ឃើញ​ពាណិជ្ជកម្ម​និង​ការ​វិនិយោគ​កាន់​តែ​ច្រើន​រវាង​ប្រទេស​ទាំង​ពីរ​ខណៈ​ដែល​អាស៊ី​កំពុង​ក្លាយ​ជា​អ្នក​នាំ​មុខ​កំណើន​សកល។

លោក​បន្ត​ថា​៖​«​ឥឡូវ​នេះ​ប្រទេស​អឺរ៉ុប​នៅ​តែ​ស្ថិត​ក្នុង​វិបត្តិ​ហិរញ្ញវត្ថុ​ហើយ​ប៉ាគីស្ថាន​ឥឡូវ​នេះ​កំពុង​ផ្តោត​លើ​អាស៊ី​ដែល​មាន​អត្រា​កំណើន​សេដ្ឋកិច្ច​ខ្ពស់​។​ហេតុ​ផល​ដែល​ប៉ាគីស្ថាន​ចង់​កសាង​ទំនាក់​ទំនង​សេដ្ឋកិច្ច​កាន់​តែ​រឹង​មាំ​ជាមួយ​កម្ពុជា ដោយ​សារ​តែ​យើង​កត់​សម្គាល់​ឃើញ​ថា​កម្ពុជា​ទទួល​បាន​កំណើន​ខ្ពស់​ជាង​៦​ភាគ​រយ​កាល​ពី​ឆ្នាំ​ទៅ​។ ប៉ាគីស្ថាន​ចង់​ធ្វើ​ឲ្យ​ទំនាក់​ទំនង​ទ្វេ​ភា​គី​រវាង​ប្រទេស​ទាំង​ពីរ​កាន់​តែ​ប្រសើរ​»​។

លោក​បាន​បន្ត​ទៀត​ថា ប្រទេស​កម្ពុជា​គួរ​តែ​ទទួល​បាន​អត្ថ​ប្រយោជន៍​កាន់​តែ​ច្រើន​នៅ​ក្នុង​ទំនាក់​ទំនង​ជាមួយ​ប្រទេស​ប៉ាគីស្ថាន​ខណៈ​ដែល​ប្រទេស​នេះ​កំពុង​បង្កើន​វិស័យ​អប់រំ​និង​សុខាភិបាល​ក៏​ដូច​ជា​សេដ្ឋកិច្ច​ផង​ដែរ​។​លោក​បន្ត​ថា​៖​«​យើង​សង្ឃឹម​ថា​ប៉ាគីស្ថាន​នឹង​មាន​ទំនាក់​ទំនង​សេដ្ឋកិច្ច​កាន់​តែ​ច្រើន​ជាមួយ​ប្រទេស​សមាជិក​អាស៊ាន​ទាំង​អស់​»​។

ជាមួយ​គ្នា​នេះ​ដែរ​លោក​សុខ​អាន​បាន​មាន​ប្រសាសន៍​ថា​ប្រទេស​ទាំង​ពីរ​នឹង​រក្សា​បន្ត​ការ​លើក​កម្ពស់​ទំនាក់​ទំនង​ទាំង​នយោ​បាយ​និង​សេដ្ឋកិច្ច​ដើម្បី​ប្រយោជន៍​ទៅ​វិញ​ទៅ​មក។

លោក​បាន​ថ្លែង​ថា​៖​«​ឥឡូវ​នេះ​យើង​មិន​ត្រឹម​តែ​កិច្ច​សហ​ប្រតិ​បត្តិ​ការ​សេដ្ឋកិច្ច​ទ្វេ​ភាគី​ដ៏​ល្អ​ប៉ុណ្ណោះ​ទេ​ប៉ុន្តែ​យើង​ក៏​ចង់​មើល​ឃើញ​កំណើន​ពាណិជ្ជកម្ម​និង​វិនិយោគ​កាន់​តែ​ច្រើន​ថែម​ទៀត​សម្រាប់​ប្រយោជន៍​ប្រទេស​ទាំង​ពីរ»​៕

អត្ថបទគួរចាប់អារម្មណ៍