ភ្នំពេញ: លោកនាយករដ្ឋមន្ត្រី ហ៊ុន សែន បានប្រកាសថា កម្ពុជានឹងប្រឈមកង្វះអគ្គិសនីប្រើប្រាស់ជាថ្មីម្តងទៀតនារដូវប្រាំងខាងមុខនេះដោយសារប្រភពថាមពលបានពីវារីអគ្គិសនីត្រូវបានកាត់បន្ថយ ខណៈជំរុញឲ្យក្រសួងរ៉ែ និងថាមពលបង្កើនល្បឿនបញ្ចប់ការដំឡើងរោងចក្រថាមពលអគ្គិសនីដើរដោយប្រេងខ្មៅកម្លាំង ៤០០ មេហ្គាវ៉ាត់ ដើម្បីដោះស្រាយបញ្ហាខ្វះអគ្គិសនីនេះ។
ថ្លែងក្នុងពិធីផ្សព្វផ្សាយ និងប្រកាសឲ្យប្រើប្រាស់ជាផ្លូវការផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣ កាលពីថ្ងៃទី ៧ ខែវិច្ឆិកា លោកនាយករដ្ឋមន្ត្រី ហ៊ុន សែន បានឲ្យដឹងថា ពីចុងឆ្នាំនេះទៅកម្ពុជានឹងប្រឈមកង្វះថាមពលអគ្គិសនីជាថ្មី។
តាមលោក ហ៊ុន សែន កង្វះអគ្គិសនីនេះដោយសារទឹកទន្លេមេគង្គមានកម្រិតទាបដែលមិនអាចធ្វើឲ្យវារីអគ្គិសនីផលិតថាមពលបានគ្រប់គ្រាន់តាមតម្រូវការ។ លោកថ្លែងថា៖ «ខ្ញុំសូមយកឱកាសនេះ សុំទោស [ប្រជាពលរដ្ឋ] ទុកជាមុន ឆ្នាំនេះយើងមានបញ្ហាទៀតហើយ ឆ្នាំនេះកម្រិតទឹកន្លេមេគង្គទាបវារីអគ្គិសនីកំពុងជួបការខ្វះខាតទឹកទៀតហើយ»។
លោកនាយករដ្ឋមន្ត្រីបានឲ្យដឹងថា បច្ចុប្បន្នប្រភពវារីអគ្គិសនីនៅកម្ពុជាអាចផលិតថាមពលបានសរុប ១ ៣២៨ មេហ្គាវ៉ាត់ ប៉ុន្តែនឹងធ្លាក់ចុះមកត្រឹម ១៨៤ មេហ្គាវ៉ាត់ ទៅ ៦៨៧ មេហ្គាវ៉ាត់ ដោយសារកម្រិតទឹកទាប។
លោកបន្តថា៖ «ខ្ញុំណែនាំឲ្យលោក ស៊ុយ សែម រដ្ឋមន្ត្រីក្រសួងរ៉ែ និងថាមពលឲ្យបង្កើនសកម្មភាពសាងសង់ និងរៀបចំការដំឡើងម៉ាស៊ីនផលិតថាមពលអគ្គិសនីកម្លាំង ៤០០ មេហ្គាវ៉ាត់ ឲ្យបានរួចរាល់បានឆាប់មុនការគ្រោងទុក ដោយបន្ថែមកម្លាំងកម្មករ និងធ្វើការទាំងថ្ងៃទាំងយប់»។
រដ្ឋាភិបាលបានចំណាយ ៤០០ លានដុល្លារក្នុងការបញ្ជាទិញម៉ាស៊ីនភ្លើងចំនួន ២ គ្រឿង ពីប្រទេស អាល្លឺម៉ង់ និងហ្វ្រាំងឡង់ ដែលតាមផែនការគ្រោងនឹងបញ្ចប់ការដំឡើងម៉ាស៊ីននៅឆ្នាំក្រោយ។
លោក វិចទ័រ ហ្សូនា អ្នកនាំពាក្យ និងជាអគ្គនាយកនៃអគ្គនាយកដ្ឋានថាមពល បានឲ្យដឹងថា រោងចក្រផលិតថាមពលអគ្គីសនីដើរដោយប្រេងខ្មៅ ឬឧស្ម័ន ដែលមានសមត្ថភាពផលិតថាមពល ៤០០ មេហ្គាវ៉ាត់ស្ថិតនៅស្រុកល្វាឯម ខេត្តកណ្តាលដែលតាមផែនការគ្រោងប្រតិបត្តិការក្នុងអំឡុងខែឧសភា ឆ្នាំ២០២០។
លោកថ្លែងថា៖ «រោងចក្រនេះនឹងជួយបំពេញការខ្វះខាតថាមពលអគ្គិសនីនៅក្នុងរដូវប្រាំងដែលមានតម្រូវការប្រើប្រាស់ច្រើន វាស្របពេលការផលិតរបស់វារីអគ្គិសនីយើងមានការថយចុះ។ ខ្ញុំសូមអំពាវនាវដល់អ្នកប្រើប្រាស់ឲ្យចូលរួមប្រើប្រាស់សន្សំសំចៃភ្លើងទាំងអស់គ្នា»។
ដើម្បីដោះស្រាយបញ្ហាកង្វះថាមពលអគ្គិសនី រដ្ឋាភិបាលនឹងចរចាជាមួយអាជ្ញាធរអគ្គិសនីថៃនៅចុងខែវិច្ឆិកា ឬដើមខែធ្នូឆ្នាំនេះ ដើម្បីទិញអគ្គិសនីពីថៃ ៣០០ មេហ្គាវ៉ាត់បន្ថែមទៀត ខណៈរដ្ឋាភិបាលបានអនុម័តទិញអគ្គិសនីផ្តាច់មុខពីប្រទេសឡាវ ២ ៤០០ មេហ្គាវ៉ាត់ ពីរោងចក្រថាមពលដំណើរការដោយធ្យូងថ្មរបស់ឡាវ។
ខណៈកង្វះការផ្គត់ផ្គង់អគ្គិសនីជាឧបសគ្គដល់វិស័យផលិតកម្មរបស់កម្ពុជា វិស័យនេះក៏បាននិងកំពុងប្រឈមរួចហើយពីតម្លៃអគ្គិសនីខ្ពស់ បើធៀបនឹងប្រទេសជិតខាងដែលធ្វើឲ្យពិបាកប្រកួតប្រជែង។
អនុប្រធានសហព័ន្ធស្រូវអង្ករកម្ពុជាលោក ចាន់ សុខឃាំង បានឲ្យដឹងថា ការជូនដំណឹងជាមុននេះអាចធ្វើឲ្យក្រុមរោងម៉ាស៊ីនកិនស្រូវត្រៀមខ្លួនរួចជាមុនដើម្បីសម្រួលដល់ចង្វាក់ផលិតកម្ម។
លោកបានថ្លែងថា៖ «យើងត្រូវការភ្លើងច្រើន យើងនឹងជួបចរចាជាមួយអគ្គិសនី (EDC) ដើម្បីចរចាធ្វើយ៉ាងណាឲ្យសមាជិករោងម៉ាស៊ីនកិនស្រូវអាចមានភ្លើងអាចដំណើរការការងារទៅបាន»។
លោកបានបន្ថែមទៀតថា៖ «វាមានសារៈសំខាន់ណាស់ពាក់ព័ន្ធបញ្ហាស្រូវអង្ករ របស់កសិករ។ យើងនឹងរកដំណោះស្រាយនឹងជជែកជាមួយសមាជិករោងម៉ាស៊ីនកិនស្រូវសាកល្បងកិនស្រូវនៅពេលយប់ ព្យាយាមចែកពេលវេលាគ្នា»៕LA