ភ្នំពេញៈ កម្ពុជាប្រមូលចំណូលពន្ធដារបាន ១,៩៣ ពាន់លានដុល្លារកាលពីឆ្នាំមុន កើនឡើង ៣០ ភាគរយធៀបនឹងឆ្នាំ ២០១៦ ដែលរួមចំណែកភាគច្រើនពីកំណើនពន្ធលើប្រាក់ចំណេញនិងពន្ធលើតម្លៃបន្ថែម (VAT) បន្ទាប់ពីការអនុវត្តប្រព័ន្ធពន្ធដារដែលមានប្រសិទ្ធភាពជាងមុន។
អគ្គនាយកអគ្គនាយកដ្ឋានពន្ធដារកាលពីម្សិលមិញ បានឲ្យដឹងថា ជាមួយនឹងកំណើននេះ បានធ្វើឲ្យចំណូលពន្ធសរុបរបស់កម្ពុជាឆ្នាំ ២០១៧ មានជាង ៣,៨ ពាន់លានដុល្លារ។
កំណើននេះជាអត្រាល្អមួយស្របពេលចំណូលពន្ធមានកាន់តែធំ ដែលអ្នកជំនាញផ្នែកហិរញ្ញវត្ថុរំពឹងថាកម្ពុជាកំពុងឆ្ពោះទៅរកឯករាជភាពផ្នែកថវិកា និងកំពុងឆ្ពោះទៅរកការកាត់បន្ថយការពឹងផ្អែកលើជំនួយ និងកម្ចីពីបរទេស។
លោក គង់ វិបុល អគ្គនាយកនៃអគ្គនាយកដ្ឋានពន្ធដារ បានប្រាប់ក្រុមអ្នកយកព័ត៌មានបន្ទាប់ពីកិច្ចប្រជុំបូកសរុបលទ្ធផលចំណូលពន្ធប្រចាំឆ្នាំ ២០១៧ កាលពីថ្ងៃម្សិលមិញថា ការសម្រេចបានចំណូលជិត ២ ពាន់លានដុល្លារនេះគឺច្រើនជាងផែនការដែលបានកំណត់ក្នុងច្បាប់ថវិកាជាតិឆ្នាំ ២០១៧ រហូតដល់ ១៣ ភាគរយ។
លោកថ្លែង ដោយសំដៅដល់ការកែតម្រូវរបបពន្ធរបស់ខ្លួន កាលពីចុងឆ្នាំ ២០១៥ ហើយបានលុបចោលរបបពន្ធលើម៉ៅការដែលគ្រប់គ្រងមិនបានល្អរបស់ខ្លួនដែលដាក់អ្នកជាប់ពន្ធទាំងអស់នៅក្នុងរបបពិតកាន់តែតឹងរ៉ឹងថា៖ «វាជាលទ្ធផលដ៏ល្អសម្រាប់ GDT និងសម្រាប់រដ្ឋាភិបាលដែលឆ្លុះបញ្ចាំងពីប្រសិទ្ធភាពនៃការកែទម្រង់លើប្រព័ន្ធពន្ធ»។
លោកបន្ថែមថា អ្នកជាប់ពន្ធកំពុងយល់ដឹងកាន់តែច្រើនអំពីកាតព្វកិច្ចរបស់ពួកគេ និងឆន្ទៈក្នុងការគោរព។
លោកបន្តថា៖ «កាលពីអតីតកាល ម្ចាស់សហគ្រាសមួយចំនួនដែលធ្លាប់បានប្រកាសថា ពួកគេខាតបង់ដើម្បីគេចពន្ធ ប៉ុន្តែនៅពេលនេះពួកគេកំពុងមានឆន្ទៈក្នុងការគោរព និងប្រកាសដោយផ្ទាល់ដែលធ្វើឲ្យប្រាក់ចំណូលពន្ធកើនឡើងគួរឲ្យកត់សម្គាល់»។
របាយការណ៍របស់ GDT មិនបានបែងចែកប្រាក់ចំណូលពន្ធតាមប្រភេទនោះទេ ប៉ុន្តែលោក គង់ វិបុល បានប្រាប់អ្នកយកព័ត៌មានកាលពីម្សិលមិញថា ប្រាក់ចំណូលពន្ធបានកើនឡើង ៣១ ភាគរយ ការប្រមូលពន្ធ VAT បានកើនឡើង ៣១ ភាគរយ ខណៈពន្ធលើអចលនទ្រព្យកើនឡើង ១២ ភាគរយ និងពន្ធលើប្រាក់ខែកើនឡើង ១០ ភាគរយ។
លោក Anthony Galliano អគ្គនាយកក្រុមហ៊ុន Cambodian Investment Management បានថ្លែងកាលពីម្សិលមិញថា កំណើនប្រាក់ចំណូលកាលពីឆ្នាំ ២០១៧ ឆ្លុះបញ្ចាំងកំណើនជាបន្តនៃការចុះបញ្ជីអ្នកជាប់ពន្ធថ្មី ការអនុវត្តកាន់តែតឹងរ៉ឹង និងកំណើនខ្លាំងលើចំនួនការធ្វើសវនកម្ម និងប្រភពប្រាក់ចំណូលដ៏សំខាន់បានពីការធ្វើសវនកម្ម។
លោកថ្លែងថា៖ «កម្ពុជាកំពុងសម្រេចបានជាបណ្ដើរៗ នៃដំណាក់កាលគ្រប់គ្រងដោយខ្លួនឯងជាមួយនឹងការពឹងផ្អែកកាន់តែតិចលើម្ចាស់ជំនួយបរទេស និងការខ្ចីប្រាក់»។
លោកបន្តថា៖ «ប្រសិនបើការអនុវត្តនេះបន្ត ខ្ញុំរំពឹងថា កម្ពុជាអាចផ្ដល់មូលនិធិដ៏ច្រើនដល់ថវិកាជាតិរបស់ខ្លួនក្នុងរយៈពេល ៣ ឆ្នាំជាមួយនឹងការរួមបញ្ចូលរបស់ GDT និងប្រាក់ចំណូលពីគយ»។
ប្រាក់ចំណូលគយរបស់កម្ពុជាកាលពីឆ្នាំ ២០១៧ បានកើនឡើងដល់ ១,៩ ពាន់លានដុល្លារ ដែលកើនឡើង ១០,៤ ភាគរយ ធៀបនឹងឆ្នាំ ២០១៦។ ប្រសិនបើយើងរួមបញ្ចូលប្រាក់ចំណូលពន្ធ និងប្រាក់ចំណូលគយរួមគ្នា ប្រាក់ចំណូលរដ្ឋាភិបាលបានពីប្រភពទាំង២នេះមានចំនួនសរុប៣,៨ពាន់លានដុល្លារកាលពីឆ្នាំមុន៕ LA