.jpg)
លោកនាយករដ្ឋមន្ត្រី ហ៊ុន សែន អំឡុងពេលកិច្ចប្រជុំកំពូលអាស៊ានបូក ៣ តាមរយៈអនឡាញកាលពីពេលថ្មីៗនេះ។ រូបថត SPM
ភ្នំពេញៈ ក្រសួងប្រៃសណីយ៍ និងទូរគមនាគមន៍បានជំរុញក្រុមការងារស្ដីពីការរៀបចំសេចក្ដីព្រាងក្របខ័ណ្ឌគោលនយោបាយរដ្ឋាភិបាលឌីជីថលត្រូវពន្លឿនការងារឲ្យបានលឿន និងត្រូវស្របជាមួយគោលនយោបាយសេដ្ឋកិច្ចឌីជីថលរបស់កម្ពុជា។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានឲ្យដឹងកាលពីថ្ងៃអង្គារក្នុងអំឡុងកិច្ចប្រជុំមួយនៅទីស្ដីការក្រសួងថា ការងារស្ដីពីសេចក្ដីព្រាងក្របខ័ណ្ឌរដ្ឋាភិបាលឌីជីថលគឺត្រូវធ្វើឲ្យបានឆាប់រហ័ស និងត្រូវសិក្សាបន្ថែមទៀតអំពីនិន្នាការរដ្ឋាភិបាលឌីជីថលរបស់ប្រទេសក្នុងតំបន់ និងពិភពលោក ដើម្បីប្រមូលធាតុចូលពីក្រុមអ្នកជំនាញសំខាន់ៗក្នុងការរៀបចំគោលនយោបាយរដ្ឋាភិបាលឌីជីថល។
លោកថ្លែងថា៖ «ក្រុមការងារទទួលបន្ទុកសេចក្ដីព្រាងនេះ សូមពន្លឿនការពិភាក្សារៀបចំឯកសារទស្សនទាននៃការរៀបចំក្របខ័ណ្ឌគោលនយោបាយរដ្ឋាភិបាលឌីជីថលដោយបន្ស៊ីគ្នាជាមួយក្របខ័ណ្ឌគោលនយោបាយសេដ្ឋកិច្ចឌីជីថលដែលបានរៀបចំដោយក្រុមការងារនៃឧត្តមក្រុមប្រឹក្សាសេដ្ឋកិច្ចជាតិ»។
លោកបន្ថែមថា ដើម្បីធ្វើឲ្យគោលនយោបាយនេះកាន់តែទូលំទូលាយ និងឆ្លើយតបតាមតម្រូវការជាក់ស្ដែងរបស់ប្រទេសអភិវឌ្ឍន៍គឺត្រូវប្រមូលព័ត៌មានពីក្រសួង ឬស្ថាប័នដែលតំណាងរបស់ពួកគេកំពុងស្ថិតក្នុងគណៈកម្មាធិការរដ្ឋាភិបាលឌីជីថល។
សេចក្ដីព្រាងដំបូងនៃផែនការយុទ្ធសាស្ដ្ររដ្ឋាភិបាលអេឡិចត្រូនិកកម្ពុជាឆ្នាំ ២០១៨ ឆ្នាំ ២០២៣ ត្រូវបានព្រាងស្របជាមួយនឹងផែនការមេ ICT កម្ពុជាឆ្នាំ ២០២០ និងគោលនយោបាយ Telecom-ICT ឆ្នាំ ២០២០។ ផែនការយុទ្ធសាស្ដ្ររដ្ឋាភិបាលអេឡិចត្រូនិកឆ្នាំ ២០១៨ ឆ្នាំ ២០២៣ មានគោលបំណងបើកសករាជថ្មីសម្រាប់ប្រជាជនកម្ពុជាដែលវិស័យសាធារណៈមានគោលបំណងបង្កើតរួមគ្នា ដើម្បីតភ្ជាប់ និងដើម្បីបង្កើនប្រសិទ្ធភាពតាមរយៈការប្រើប្រាស់បច្ចេកវិទ្យាឌីជីថល និងការផ្លាស់ប្តូរសេដ្ឋកិច្ចនៃសេដ្ឋកិច្ចឌីជីថល។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបានឲ្យដឹងក្នុងសិក្ខាសាលាពិគ្រោះយោបល់ថ្នាក់ជាតិដំបូងស្ដីពី «គោលនយោបាយ និងទិសដៅសេដ្ឋកិច្ចឌីជីថលរបស់ប្រទេសកម្ពុជា» នៅក្នុងទីក្រុងភ្នំពេញកាលពីឆ្នាំមុនថា សេដ្ឋកិច្ចឌីជីថលកំពុងកើតឡើងជារូបរាងបណ្ដើរៗ និងកំពុងបង្កើតសកម្មភាពអាជីវកម្មថ្មីនៅក្នុងការទូទាត់ឌីជីថល ការកម្សាន្តអនឡាញ ពាណិជ្ជកម្មអេឡិចត្រូនិក ខណៈដែលការកើនឡើងចំនួនអ្នកប្រើប្រាស់កំពុងសម្របខ្លួនរបស់ពួកគេក្នុងការប្រើប្រាស់បច្ចេកវិទ្យាទាំងនេះនៅកម្ពុជា។
លោកថ្លែងថា៖ «សម្រាប់ប្រទេសកំពុងអភិវឌ្ឍន៍ដូចជាកម្ពុជា បច្ចេកវិទ្យាថ្មីនេះនឹងផ្ដល់ឱកាសក្នុងការលោតផ្លោះឆ្លងផុតពីដំណាក់កាលអភិវឌ្ឍន៍តាមបែបប្រពៃណី។ នៅក្នុងបរិបទនៃការធ្វើសកលភាវូបនីយកម្ម និងសមាហរណកម្មពិភពលោក ប្រទេសកម្ពុជាពិតណាស់មិនអាចគេចផុតពីផលប៉ះពាល់ដោយសារបដិវត្ដន៍ឧស្សាហកម្មទី ៤ នោះទេ។ ការណ៍នេះតម្រូវឲ្យរដ្ឋាភិបាលត្រូវផ្ដោតការយកចិត្តទុកដាក់លើការចាប់យកឱកាស និងការគ្រប់គ្រងហានិភ័យ»។
លោកលើកឡើងថា៖ «សេដ្ឋកិច្ចឌីជីថលរបស់ប្រទេសកម្ពុជានៅតែកំពុងស្ថិតក្នុងដំណាក់កាលដំបូង។ កម្ពុជាអាចត្រូវការចំណាយពេលវេលា ៥ ឆ្នាំដំបូងដើម្បីដាក់ធាតុមូលដ្ឋានគ្រឹះទាំងសង់ជាមួយគ្នាដោយត្រឹមត្រូវ ឬការត្រៀមជាស្រេចផ្នែកឌីជីថល ហើយនឹងចំណាយពេលវេលា ៥ ឆ្នាំ ឬ ១០ ឆ្នាំទៀតដើម្បីធ្វើឲ្យរីកចម្រើនសេដ្ឋកិច្ចឌីជីថល និងក្នុងគោលបំណងសម្រាប់សេដ្ឋកិច្ចដែលជំរុញដោយបច្ចេកវិទ្យា»។
លោកថ្លែងថា ទាក់ទងនឹងបញ្ហានេះវាមានតម្លៃក្នុងការបញ្ជាក់ថា ប្រទេសកម្ពុជាមិនមានគោលបំណងក្នុងការបង្កើតតំបន់ Silicon Valley ឬដើម្បីបង្កើតក្រុមហ៊ុនបង្កើតថ្មីដែលកំណត់ទិសដៅនោះទេ។ «ទិសដៅជាយុទ្ធសាស្ដ្រនេះនឹងបង្កើតបរិយាកាសឌីជីថលដ៏រឹងមាំដែលអាចឲ្យទាំងក្រុមហ៊ុនខ្នាតតូច និងក្រុមហ៊ុនធំៗនៅក្នុងប្រទេសកម្ពុជាអាចមានលទ្ធភាពតភ្ជាប់ទៅនឹងចង្វាក់តម្លៃពិភពលោកនៃសេដ្ឋកិច្ចឌីជីថល»។
កាលពីឆ្នាំមុនរដ្ឋាភិបាលបានប្រកាសរួចហើយមូលនិធិ ៥ លានដុល្លារប្រចាំឆ្នាំដើម្បីគាំទ្រក្រុមហ៊ុនបង្កើតថ្មីផ្នែកបច្ចេកវិទ្យា និងអភិវឌ្ឍន៍ធនធានមនុស្សផ្នែកបច្ចេកវិទ្យា៕LA
