ភ្នំពេញ: កម្ពុជា និងម៉ាឡេស៊ីបានចុះហត្ថលេខាលើកិច្ចព្រមព្រៀងស្តីពីពន្ធត្រួតគ្នា (DTA) និងកិច្ចសហប្រតិបត្តិការនៅក្នុងវិស័យទេសចរណ៍ ដើម្បីជំរុញពាណិជ្ជកម្ម និងវិនិយោគរវាងប្រទេសទាំង ២។ នេះបើយោងតាមសេចក្តីថ្លែងការណ៍រួមកាលពីថ្ងៃម្សិលមិញ។
កិច្ចព្រមព្រៀងទាំង ២ នេះត្រូវបានចុះហត្ថលេខាកាលពីថ្ងៃម្សិលមិញក្នុងអំឡុងដំណើរទស្សនកិច្ចរបស់លោកនាយករដ្ឋមន្ត្រីម៉ាឡេស៊ី Mahathir Mohamad មកកម្ពុជា។
កិច្ចព្រមព្រៀងការចៀសវាងយកពន្ធត្រួតគ្នា និងការទប់ស្កាត់ការគេចវេះពន្ធលើប្រាក់ចំណូលរវាងប្រទេសទាំង ២ និងកិច្ចសហប្រតិបត្តិការទេសចរណ៍ត្រូវបានចុះហត្ថលេខារវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក ថោង ខុន រដ្ឋមន្ត្រីក្រសួងទេសចរណ៍ជាមួយនឹងលោក Saifuddin Abdullah រដ្ឋមន្ត្រីក្រសួងការបរទេសម៉ាឡេស៊ី។
លោកនាយករដ្ឋមន្ត្រី ហ៊ុន សែន និងលោក Mahathir Mohamad បានធ្វើជាសាក្សីនៅក្នុងពិធីចុះហត្ថលេខាលើកិច្ចព្រមព្រៀង និងអនុស្សរណៈយោគយល់គ្នាចំនួន ២ នេះ។
នៅក្នុងជំនួបកាលពីថ្ងៃម្សិលមិញលោកនាយករដ្ឋមន្ត្រី ហ៊ុន សែន បានថ្លែងថា ប្រទេសទាំង ២ បានប្តេជ្ញាសម្របសម្រួលវិធានការចាំបាច់នានាដើម្បីពង្រឹងកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគ។ លោកថ្លែងថា៖ «រដ្ឋាភិបាលកម្ពុជាស្វាគមន៍ធុរជនម៉ាឡេស៊ីមកស្វែងរកឱកាសវិនិយោគនៅកម្ពុជា ជាពិសេសនៅក្នុងវិស័យកសិកម្ម អប់រំ និងទេសចរណ៍»។
តាមលោកនាយករដ្ឋមន្ត្រី រដ្ឋាភិបាលម៉ាឡេស៊ីក៏ប្ដេជ្ញាចិត្តបង្កើនល្បឿនពាណិជ្ជកម្មតាមរយៈគំនិតផ្ដួចផ្ដើមដែលមានវិសាលភាពឆ្លងកាត់ព្រំដែននៅក្នុងអាស៊ាន និងវេទិកាឌីជីថលដូចជាពាណិជ្ជកម្មអេឡិចត្រូនិកផងដែរ។
ដោយឡែកលោកនាយករដ្ឋមន្ត្រីម៉ាឡេស៊ី Mahathir Mohamad បានថ្លែងថា ប្រទេស ម៉ាឡេស៊ី នឹងជួយជំរុញឲ្យមានការបញ្ជាទិញទំនិញពីកម្ពុជាបន្ថែមទៀត។
លោកថ្លែងថា៖ «នៅពេលត្រឡប់ទៅកាន់ប្រទេសម៉ាឡេស៊ីវិញ ខ្ញុំនឹងប្រាប់ទៅប្រជាជនយើងពិនិត្យមើលថាអ្វីដែលអាចទិញពីកម្ពុជាបានថែមទៀត ពិតណាស់ប្រហែលជាទិញអង្ករហើយកម្ពុជាមានផ្លែឈើល្អៗ និងផលិតផលផ្សេងទៀត»។
លោកបន្តថា៖ «ដើម្បីពង្រឹងទំនាក់ទំនងរវាងប្រជាជន និងប្រជាជន យើងចង់ឃើញភ្ញៀវទេសចរមកទស្សនានៅកម្ពុជាកាន់តែច្រើន ហើយសង្ឃឹមថា ភ្ញៀវទេសចរកម្ពុជាទៅម៉ាឡេស៊ីក៏កើនឡើងដែរ»។
លោក Eldeen Husaini Mohd Hashim អគ្គរដ្ឋទូតម៉ាឡេស៊ីប្រចាំនៅកម្ពុជា បានប្រាប់កាសែត BERNAMA ថា កិច្ចព្រមព្រៀង DTA នឹងជួយបង្កើនជំរុញពាណិជ្ជកម្មរវាងប្រទេសទាំង ២។
លោកថ្លែងថា៖ « DTA បានរារាំងវិនិយោគម៉ាឡេស៊ីមិនឲ្យមកកម្ពុជា។ ការមាន DTA នឹងផ្តល់ឲ្យក្រុមហ៊ុនម៉ាឡេស៊ីកាន់តែច្រើនមកស្វែងយល់ពីឱកាសធុរកិច្ច និងវិនិយោគនៅកម្ពុជា»។
លោក Eldeen Husaini បានឲ្យដឹងថាក្នុងរយៈពេល ៣ ខែ ឆ្នាំ ២០១៩ នេះស្ថានទូតទទួលបានពាក្យស្នើសុំចំនួន ២០ ពីក្រុមហ៊ុនម៉ាឡេស៊ីដែលចង់មកស្វែងយល់ពីឱកាសធុរកិច្ចនិងវិនិយោគនៅកម្ពុជារួមមាន ទាំងគម្រោងសណ្ឋាគារ ២០០០ បន្ទប់ដែលមានតម្លៃ ៤ ពាន់លានដុល្លារ។
អ្នកនាំពាក្យក្រសួងទេសចរណ៍លោក ជុក ជំនោរ បានឲ្យដឹងកាលពីម្សិលមិញ ថា MoU ស្តីពីកិច្ចសហប្រតិបត្តិការទេសចរណ៍រវាងប្រទេសទាំង ២ នឹងផ្លាស់ប្តូរការអភិវឌ្ឍធនធានមនុស្សជំរុញផលិតផល និងផ្សព្វផ្សាយកាន់តែទូលំទូលាយពីវិស័យទេសចរណ៍។ លោកបានថ្លែងថា៖ «គោលបំណងចុះអនុស្សរណៈនេះធ្វើយ៉ាងណាជំរុញការចរាចរភ្ញៀវទេសចរទាំងម៉ាឡេស៊ី និងកម្ពុជា កាន់តែច្រើនថែមទៀត»។
លោកបន្តថាបច្ចុប្បន្ននេះការហោះហើរត្រង់ពីម៉ាឡេស៊ី មកកម្ពុជាមានប្រមាណ ៥៨ ជើងក្នុងមួយសប្តាហ៍ដែលចុះចតនៅអាកាសយានអន្តរជាតិទាំង ៣ គឺភ្នំពេញ សៀមរាប និងខេត្តព្រះសីហនុ។
លោកបន្ថែមថានៅក្នុងរយៈពេល ៦ ខែ ឆ្នាំ ២០១៩ នេះ កម្ពុជាទទួលបានភ្ញៀវទេសចរ ម៉ាឡេស៊ីជាង ៩០ ០០០ នាក់ ក្នុងចំណោមទេសចរបរទេសសរុប ៣,៣ លាននាក់។
ទំហំពាណិជ្ជកម្មរបស់កម្ពុជាជាមួយម៉ាឡេស៊ីនៅតែមានគម្លាតធំដោយក្នុងនោះការនាំចេញរបស់កម្ពុជា ទៅម៉ាឡេស៊ីក្នុងរយៈពេល ៤ ឆ្នាំចុងក្រោយសម្រេចបាន ៥៧១ លានដុល្លារ ខណៈការនាំចេញរបស់ម៉ាឡេស៊ីមកកម្ពុជាមានរហូត ១,៣៦ ពាន់លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្ម។
របាយការណ៍ដដែលបង្ហាញថានៅឆ្នាំ ២០១៨ ពាណិជ្ជកម្មរវាងកម្ពុជា និងម៉ាឡេស៊ីមានតម្លៃជាង ៥១៤ លានដុល្លារ ក្នុងនោះកម្ពុជានាំចេញជាង ១២៩ លានដុល្លារ ចំណែកការនាំចូលមានតម្លៃជាង ៣៨៥ លានដុល្លារ។ រយៈពេល ៦ ខែ ឆ្នាំ ២០១៩ ការនាំចេញពីកម្ពុជាមានតម្លៃ ៦០,៦៤ លានដុល្លារ ខណៈការនាំចូលមានរហូត ២៥៥ លានដុល្លារ៕