.jpg)
កសិករកំពុងប្រមូលផលដំណាំរបស់ខ្លួនក្នុងភូមិមួយនៅជាយក្រុងភ្នំពេញ។ ហេង ជីវ័ន
ភ្នំពេញ: អនុប្រធានសភាពាណិជ្ជកម្មកម្ពុជាបានថ្លែងថាកម្ពុជាអាចចាប់យកទីផ្សាឥណ្ឌា ដើម្បីពង្រីកទំនាក់ទំនងពាណិជ្ជកម្ម និងវិនិយោគបន្ថែមទៀត ខណៈដែលទំហំដោះដូរទំនិញនៅទាបនៅឡើយ។
លោក លឹម ហេង ដែលបានទទួលការអញ្ជើញចូលរួមនៅក្នុងពិព័រណ៍ និងកិច្ចប្រជុំកំពូលថែរក្សាសុខភាពឥណ្ឌា និងអាស៊ាន» តាមអនឡាញដែលនឹងប្រព្រឹត្តទៅចាប់ពីថ្ងៃទី ២២ ដល់ថ្ងៃទី ២៤ ខែកុម្ភៈ ឆ្នាំ ២០២១ បានប្រាប់ភ្នំពេញប៉ុស្ដិ៍ថា លោកបានជូនដំណឹងរួចហើយដល់សមាជិករបស់លោកឱ្យចូលរួមក្នុងព្រឹត្តិការណ៍ពាណិជ្ជកម្មជាពិសេសនេះ។
លោកលើកឡើងថា៖ «ខ្ញុំមើលឃើញថា ទំនាក់ទំនងសេដ្ឋកិច្ចរបស់យើងជាមួយប្រទេសឥណ្ឌា មិនទាន់ធំនៅឡើយទេ ប៉ុន្តែនៅពេលនេះរដ្ឋាភិបាលកំពុងបន្តធ្វើការងារសម្រាប់ការបើកចំហការចរចា កិច្ចព្រមព្រៀងពាណិជ្ជកម្មសេរីជាមួយប្រទេសឥណ្ឌា។ ខ្ញុំជឿជាក់ថា សមាជិកជាច្រើននឹងធ្វើជាដៃគូជាមួយក្រុមហ៊ុនរបស់ប្រទេសឥណ្ឌាលើការនាំចូលការផ្គត់ផ្គង់វេជ្ជសាស្ដ្រ និងឱសថនៅទីនេះផងដែរ»។
ក្រសួងពាណិជ្ជកម្មអំពាវនាវឱ្យពាណិជ្ជករ អាជីវករ ក្រុមហ៊ុនផ្ដល់សេវាកម្ម និងសហគ្រិនក្នុងស្រុកចូលរួមនៅក្នុងពិព័រណ៍ និងកិច្ចប្រជុំកំពូលនេះដើម្បីស្វែងរកដៃគូអាជីវកម្ម និងឱកាសវិនិយោគជាមួយប្រទេសមានសេដ្ឋកិច្ចឈានមុខគេរបស់អាស៊ីមួយនេះ។
ស្ថានទូតឥណ្ឌាប្រចាំទីក្រុងភ្នំពេញបានឱ្យដឹងថា ពិព័រណ៍នេះត្រូវបានរៀបចំរួមគ្នាដោយសហព័ន្ធសភាពាណិជ្ជកម្ម និងឧស្សាហកម្មឥណ្ឌា (FICCI) និងក្រសួងពាណិជ្ជកម្មឥណ្ឌានឹងតភ្ជាប់ភាគីពាក់ព័ន្ធនៅក្នុងវិស័យថែរក្សាសុខភាពថ្នាក់ដឹកនាំអាជីវកម្មឈានមុខគេ និងក្រុមនាយកប្រតិបត្តិជាន់ខ្ពស់មកពីឧស្សាហកម្ម ទីភ្នាក់ងារបទប្បញ្ញត្តិ និងមន្ដ្រីជាន់ខ្ពស់របស់រដ្ឋាភិបាលមកពីបណ្ដាប្រទេសសមាជិកអាស៊ាន។
ទិន្នន័យបានពីស្ថានទូតឥណ្ឌាបានឱ្យដឹងថា ទំហំពាណិជ្ជកម្មរវាងប្រទេសទាំង ២ សម្រេចបាន ២៤៩,៩២ លានដុល្លារកាលពីឆ្នាំ ២០១៩ កើនឡើង ១០,២៤ ភាគរយបើធៀបនឹងចំនួន ២២៦,៦៩ លានដុល្លារកាលពីឆ្នាំ ២០១៨។ ប្រទេសកម្ពុជាបាននាំចេញទំនិញទៅប្រទេសឥណ្ឌាមានតម្លៃ ៨២,០៩ លានដុល្លារកាលពីឆ្នាំមុន កើនឡើង ៦៩,៤៣ ភាគរយធៀបនឹងឆ្នាំ ២០១៨ ខណៈដែលការនាំចូលមានចំនួន ១៦៧,៨៣ លានដុល្លារធ្លាក់ចុះ ៥,៨ ភាគរយ។
ការវិនិយោគរបស់ប្រទេសឥណ្ឌាមានតម្លៃ ១៩,៨ លានដុល្លារ។ ប្រទេសនេះស្ថិតក្នុងចំណោមក្រុមវិនិយោគិនឈានមុខគេទាំង ១០ នៅក្នុងប្រទេសកម្ពុជា៕LA
