.jpg)
ការធ្វើចរាចរណ៍របស់ប្រជាពលរដ្ឋតាមច្រកព្រំដែនអន្តរជាតិបាវិតជាមួយនឹងប្រទេសវៀតណាមកន្លងមក។ រូបថត ភ្នំពេញ ប៉ុស្តិ៍
ភ្នំពេញ: កម្ពុជា និងវៀតណាម បានចុះហត្ថលេខាលើអនុស្សរណៈយោគយល់គ្នាស្តីពីការអភិវឌ្ឍសេដ្ឋកិច្ច និងពាណិជ្ជកម្មចំនួន ៤ ដើម្បីជំរុញការវិនិយោគ និងពាណិជ្ជកម្មទ្វេភាគី ខណៈប្រទេសទាំង ២ រំពឹងថានឹងសម្រេចបានទំហំពាណិជ្ជកម្ម ៥ ពាន់លានដុល្លារនៅឆ្នាំនេះ។ នេះបើតាមសេចក្តីថ្លែងការណ៍រួម ដែលចេញផ្សាយដោយក្រសួងការបរទេស កម្ពុជា កាលពីថ្ងៃទី ៥ ខែតុលា។
នៅក្នុងដំណើរទស្សនកិច្ចផ្លូវការរបស់លោក ហ៊ុន សែន នាយករដ្ឋមន្ត្រីកម្ពុជាទៅប្រទេសវៀតណាមកាលពីថ្ងៃទី ៤ ដល់ ៥ ខែ តុលា ឆ្នាំនេះប្រទេសកម្ពុជាបានចុះ MoU ជាមួយវៀតណាមស្តីពីកិច្ចសហប្រតិបត្តិការជំរុញពាណិជ្ជកម្ម ការតភ្ជាប់ហេដ្ឋារចនាសម្ព័ន្ធពាណិជ្ជកម្មនៅតាមព្រំដែន កិច្ចសហប្រតិបត្តិការវិនិយោគ និងកិច្ចសហប្រតិបត្តិការលើវិស័យថាមពលអគ្គិសនី។
សេចក្តីថ្លែងការណ៍រួមបានបង្ហាញថា ក្នុងឆ្នាំ ២០១៨ ទំហំពាណិជ្ជកម្មទ្វេភាគីរវាងប្រទេសទាំង ២ បានកើនឡើង ២៤ ភាគរយដែលមានតម្លៃជាង ៤,៧ ពាន់លានដុល្លារដោយភាគីទាំង ២ បានសន្យាថានឹងសម្រេចបានទំហំពាណិជ្ជកម្មទ្វេភាគីជាង ៥ ពាន់លានដុល្លារនៅឆ្នាំ ២០១៩ នេះ។
សេចក្តីថ្លែងការណ៍៖ «ភាគីទាំង ២ បានឯកភាពរក្សាកំណើននៅឆ្នាំបន្តបន្ទាប់ទៀត តាមរយៈការលើកកម្ពស់វិធានការជំរុញពាណិជ្ជកម្ម និងការគាំទ្រសហគ្រាសរបស់ខ្លួនក្នុងការចូលរួមក្នុងព្រឹត្តិការណ៍ជំរុញវិនិយោគ និងពាណិជ្ជកម្មផ្សារណាត់ និងការតាំងពិព័រណ៍ក្នុងប្រទេសនីមួយៗ»។
វៀតណាមជាប្រភពវិនិយោគិនបរទេសធំមួយនៅប្រទេស កម្ពុជា ដែលគិតមកដល់ត្រឹមឆ្នាំ ២០១៨ បានវិនិយោគចំនួន ២១៤ គម្រោងមានតម្លៃសរុប ៣,៣ ពាន់លានដុល្លារ។ នេះបើតាមសេចក្តីថ្លែងការណ៍រួម។
ចិនជាប្រភពវិនិយោគិនបរទេសធំជាងគេនៅប្រទេស កម្ពុជា ដែលកាលពីឆ្នាំ ២០១៨ មានរហូតដល់ជាង ៣,៥៩ ពាន់លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា MoU ពាណិជ្ជកម្មរវាងភាគីទាំង ២ នឹងអាចជួយជំរុញកំណើនការវិនិយោគមកប្រទេស កម្ពុជា។
លោកថ្លែងថា៖ «ការចុះកិច្ចព្រមព្រៀងពាណិជ្ជកម្មនេះគឺជំរុញឲ្យមានការផ្លាស់ប្តូរទំនិញ និងការដឹកជញ្ជូនទំនិញឆ្លងកាត់គ្នាទៅវិញទៅមកវាជួយឲ្យមានកំណើនសេដ្ឋកិច្ចប្រទេសនីមួយៗ»។
លោកបន្តថា កម្ពុជាជាប្រភពនាំចេញវត្ថុធាតុដើមកសិកម្មមួយទៅប្រទេសវៀតណាម។ លោកថ្លែងថា៖ «ខ្ញុំមើលឃើញថាវៀតណាមជាប្រទេសដែលបានទទួលបានកិច្ចព្រមព្រៀងពាណិជ្ជកម្មសេរីជាមួយអាមេរិក និងអឺរ៉ុប ដូច្នេះទំហំផលិតនៃការនាំចេញវៀតណាមកាន់តែមានទំហំធំនាំឲ្យតម្រូវការវត្ថុ [នាំចូល] ធាតុដើមពីប្រទេសកម្ពុជាមានការកើនឡើងផងដែរ»។
ការនាំចេញរបស់កម្ពុជាទៅវៀតណាមក្នុងរយៈពេល ៤ ឆ្នាំចុងក្រោយ (២០១៥ ដល់ ២០១៨) សម្រេចបានជាង ១,១៨ ពាន់លានដុល្លារ ខណៈការនាំចូលពីវៀតណាមមានរហូតដល់ ៦,៩៦ ពាន់លានដុល្លារ។ នេះបើយោងតាមរបាយការណ៍ក្រសួងពាណិជ្ជកម្ម៕ LA
