ភ្នំពេញៈ សភាពាណិជ្ជកម្មកម្ពុជា និងតំណាងក្រុមហ៊ុនមកពីបណ្តាខេត្តនៅភាគខាងត្បូងប្រទេសវៀតណាមសរុបជាង ៦០ ក្រុមហ៊ុន កាលពីចុងសប្តាហ៍មុនបានរៀបចំវេទិកាធុរកិច្ចមួយ ដើម្បីពិភាក្សាគ្នាអំពីការជំរុញ ការអភិវឌ្ឍតំបន់សេដ្ឋកិច្ចពិសេសនៅជាប់ព្រំដែននៃប្រទេសទាំង ២។ នេះបើយោងតាមអនុប្រធានសភាពាណិជ្ជកម្មកម្ពុជា។
លោក លឹម ហេង អនុប្រធានសភាពាណិជ្ជកម្មកម្ពុជាដែលបានអញ្ជើញជាអធិបតីក្នុង «វេទិកាសហប្រតិបត្តិការធុរកិច្ចកម្ពុជា-វៀតណាម» បានប្រាប់ភ្នំពេញប៉ុស្តិ៍កាលពីថ្ងៃអាទិត្យម្សិលមិញថា វេទិកានេះធ្វើឡើងក្នុងគោលបំណងដើម្បីជំរុញការបង្កើតតំបន់សេដ្ឋកិច្ចពិសេសនៅតាមព្រំដែនកម្ពុជា-វៀតណាម និងកិច្ចសហប្រតិបត្តិការផ្នែកពាណិជ្ជកម្មរវាងក្រុមហ៊ុន/សហគ្រាសវៀតណាម ជាមួយក្រុមហ៊ុន/សហគ្រាសនៅកម្ពុជា។
លោកបន្តថា គម្រោងបង្កើតតំបន់សេដ្ឋកិច្ចពិសេសនៅតាមព្រំដែនរួមគ្នានេះទទួលបានការយល់ព្រមពីរដ្ឋាភិបាលប្រទេសទាំង ២ រួចហើយ។
លោកថ្លែងថា៖ «យើងកំពុងជំរុញកិច្ចការនេះជាមួយភាគីទាំងសងខាង ខណៈរដ្ឋាភិបាលនៃប្រទេសទាំង ២ បានផ្តល់ភ្លើងខៀវរួចហើយនៅឡើយតែវិស័យឯកជនដែលជាម្ចាស់នៅស្វែងរកធនធាន និងដៃគូជំរុញបន្ថែម»។
បើតាមលោក លឹម ហេង តំបន់សេដ្ឋកិច្ចពិសេសនេះអាចស្ថិតនៅលើទឹកដីកម្ពុជាខ្លះ (ខេត្តក្រចេះ) និងវៀតណាមខ្លះ ឬអាចនៅទល់មុខគ្នាក្នុងករណីច្បាប់វិនិយោគរបស់ប្រទេសទាំង ២ មានភាពខុសគ្នាខ្លាំងពេក។
ខណៈបច្ចុប្បន្នប្រទេស វៀតណាម ទទួលបានកិច្ចព្រមព្រៀងពាណិជ្ជកម្មសេរី (FTA) ជាមួយអាមេរិកនោះ កម្ពុជាក៏អាចនឹងទទួលបានផលចំណេញខ្លះផងដែរពីតំបន់សេដ្ឋកិច្ចនេះ ពិសេសនៅពេលដែលមានការបញ្ជាទិញច្រើនពីទីផ្សារអាមេរិក។
លោកអះអាងថា៖ «ខណៈនៅពេលឆាប់ៗនេះ យើងនឹងឈានទៅចុះកិច្ចព្រមព្រៀងពាណិជ្ជកម្មសេរីជាមួយប្រទេសចិន។ ដូច្នេះតំបន់សេដ្ឋកិច្ចពិសេសសងខាងនេះនឹងផ្តល់នូវផលប្រយោជន៍ច្រើន ដោយទំនិញនាំចេញរួចពន្ធទៅអាមេរិកអាចផលិតក្នុងទឹកដីវៀតណាម និងសម្រាប់នាំទៅចិនយកមកផលិតនៅកម្ពុជា»។
បើតាមលោក លឹម ហេង ក្នុងវេទិកាដែលធ្វើឡើងកាលពីថ្ងៃសុក្រចុងសប្តាហ៍មុននេះក៏មានអនុស្សរណៈយោគយល់មួយចំនួនត្រូវបានចុះហត្ថលេខារវាងក្រុមហ៊ុនមកពីប្រទេស វៀតណាម និងក្រុមហ៊ុនវៀតណាមដែលកំពុងវិនិយោគនៅក្នុងប្រទេសកម្ពុជាផងដែរ។ ទោះយ៉ាងណាលោកមិនបានបង្ហើបពីខ្លឹមសារនៃអនុស្សរណៈយោគយល់គ្នាទាំងនោះទេ។
ដើម្បីជំរុញកិច្ចការនេះឲ្យមានដំណើរការទៅមុខកាន់តែលឿន ភាគីសមាគមពាណិជ្ជកម្មវៀតណាមក៏គ្រោងនឹងអញ្ជើញភាគីកម្ពុជាទៅប្រជុំគ្នានៅក្នុងប្រទេស វៀតណាម ក្នុងពេលខាងមុខឆាប់ៗផងដែរ ដែលអាចនឹងមានការចូលរួមពីតំណាងសភាពាណិជ្ជកម្មកម្ពុជា ក្រសួងពាណិជ្ជកម្ម និងក្រុមប្រឹក្សាអភិវឌ្ឍន៍កម្ពុជា។
លោក Vu Quang Minh ឯកអគ្គរដ្ឋទូតវៀតណាមប្រចាំកម្ពុជាបានអះអាងថា សកម្មភាពនៃការខិតខំជំរុញពាណិជ្ជកម្ម និងការវិនិយោគដ៏មមាញឹកក៏ដូចជាវិស័យទេសចរណ៍រវាងប្រទេសទាំង ២ ក្នុងរយៈពេលជាង ២ សប្តាហ៍កន្លងមកនេះបង្ហាញយ៉ាងច្បាស់ពីការយកចិត្តទុកដាក់យ៉ាងខ្លាំងរបស់ក្រុមហ៊ុនចំពោះឱកាសនៃការធ្វើពាណិជ្ជកម្ម និងការវិនិយោគឆ្លងកាត់ព្រំដែន។
កាលពីឆ្នាំ ២០១៨ ទំហំពាណិជ្ជកម្មរវាងកម្ពុជា និងវៀតណាមមានតម្លៃជាង ៤,៧ ពាន់លានដុល្លារកើនឡើង ២៣,៨ ភាគរយ បើធៀបនឹងឆ្នាំ ២០១៧ ខណៈឆ្នាំ ២០១៩ នេះត្រូវបានព្យាករថានឹងកើនដល់ ៥,២ ពាន់លានដុល្លារ។
រហូតមកទល់ពេលនេះការវិនិយោគរបស់វៀតណាមនៅកម្ពុជាមានចំនួន ២១៤ គម្រោងដែលស្មើនឹងទុនវិនិយោគជាង ៣ ពាន់លានដុល្លារក្នុងនោះ ១៧៦ គម្រោង កំពុងមានសុពលភាពជាមួយនឹងទុនវិនិយោគសរុប ២,៧៧ ពាន់លានដុល្លារ ដែលធ្វើឲ្យវៀតណាមក្លាយជាប្រទេសមួយក្នុងចំណោមប្រទេសដែលបណ្តាក់ទុនច្រើនជាងគេនានានៅកម្ពុជា។
ចំណែកការវិនិយោគរបស់កម្ពុជានៅវៀតណាមមាន ២១ គម្រោងដែលមានទុនវិនិយោគសរុបជិត ៦៤ លានដុល្លារ ជាប់លេខ ៥៤ ក្នុងចំណោមប្រទេស និងដែនដីចំនួន ១៣២ ដែលបណ្តាក់ទុននៅវៀតណាម។ នេះបើតាម Vietnamplus៕ LA