.jpg)
លោក វេង សាខុន (ស្តាំ) និងលោក Park Heung-Kyeong។ រូបថត សហការី
ភ្នំពេញ: ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ បានស្នើឲ្យកូរ៉េខាងត្បូងជួយបង្កើតផ្សារបោះដុំកសិផលខ្មែរក្នុងគោលបំណងជំរុញការដាំដុះ និងរកទីផ្សារឲ្យកសិករ។
ក្នុងជំនួបពិភាក្សាស្តីពីវឌ្ឍនភាពនៃការអនុវត្តគម្រោងលើវិស័យកសិកម្ម ក្រោមការគាំទ្ររបស់ប្រទេសកូរ៉េ នៅទីស្តីការក្រសួងកសិកម្មកាលពីថ្ងៃពុធ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានស្នើសុំឲ្យឯកអគ្គរដ្ឋទូតសាធារណរដ្ឋកូរ៉េ លោក Park Heung-kyeong ជួយរៀបចំបង្កើតផ្សារបោះដុំកសិផលខ្មែរ ជាពិសេសបន្លែ។
លោក សាខុន បានលើកឡើងថា សព្វថ្ងៃហេដ្ឋារចនាសម្ព័ន្ធគាំទ្រវិស័យកសិកម្មបន្លែរបស់កម្ពុជាដូចជា ផ្ទះសំណាញ់ និងប្រព័ន្ធស្រោចស្រពដំណាំ កំពុងមាននិន្នាការរីកចម្រើនយ៉ាងឆាប់រហ័សគួរឲ្យកត់សម្គាល់នៅប៉ុន្មានឆ្នាំចុងក្រោយនេះ។
លោកថ្លែងថា៖ «សូមលោកឯកអគ្គរដ្ឋទូតពិនិត្យពិចារណាជួយបង្កើតផ្សារបោះដុំកសិផល ពិសេសបន្លែនៅរាជធានីភ្នំពេញ និងតាមបណ្តាខេត្តដែលមានសក្តានុពលមួយចំនួន។ ខ្ញុំសង្ឃឹមថារដ្ឋាភិបាលកូរ៉េនឹងបន្តជួយគាំទ្រដល់ការអភិវឌ្ឍវិស័យកសិកម្មកម្ពុជាឲ្យកាន់តែរីកច្រើននៅពេលអនាគត»។
លោក នេត អង្គារ អ្នកគ្រប់គ្រងទូទៅផ្សារទំនើប «ផ្សារអាហារសុវត្ថិភាព »របស់ក្រុមហ៊ុន K.C.C.V Plantation Co., Ltd បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា បច្ចុប្បន្ននេះផ្សារដើមគដែលជាផ្សារបោះដុំបន្លែធំជាងគេនៅទីក្រុងភ្នំពេញ មិនទាន់អាចបំពេញតម្រូវការទីផ្សារបន្លែដែលមានសុវត្ថិភាពនៅឡើយទេ។
លោកមានជំនឿថា បើផ្សារបោះដុំកសិផលនេះត្រូវបានបង្កើតឡើងវានឹងជួយពង្រីកទីផ្សារបន្ថែមទៀតដល់កសិករ និងវិស័យឯកជន។ លោកថ្លែងថា៖ «នៅពេលមានផ្សារនេះវានឹងជួយរកទីផ្សារឲ្យកសិករ ហើយពួកគាត់កាន់តែមានទំនុកចិត្តលើការដាំដុះសម្រាប់ផ្គត់ផ្គង់មកលើទីផ្សារដោយមិនបារម្ភអត់មានអ្នកទិញ»។
កញ្ញា ប៊ុន សៀង ប្រធានក្រុមហ៊ុន Natural Agriculture Village ដែលជាក្រុមហ៊ុនទទួលទិញបន្លែ និងចែកចាយក្នុងស្រុកបានស្វាគមន៍ និងគាំទ្រចំពោះគំនិតផ្តួចផ្តើមបង្កើតផ្សារបោះដុំបន្លែនេះ ដោយកញ្ញាបានអះអាងថា វានឹងជួយលើកកម្ពស់ និងបង្កើតឱកាសទីផ្សារដល់កសិផលខ្មែរកាន់តែល្អប្រសើរថែមទៀត ខណៈប្រជាពលរដ្ឋកាន់តែមានការយល់ដឹងចំពោះការដាំដុះបន្លែតាមគោលការណ៍អនុវត្តកសិកម្មល្អ (GAP)។
កញ្ញានិយាយថា៖ «ខ្ញុំគិតថា វានឹងផ្តល់ទីតាំងកាន់តែងាយស្រួលដល់អ្នកលក់ និងអ្នកទិញ។ ផ្សារដើមគសព្វថ្ងៃមានលក្ខណៈចង្អៀត ហើយម្យ៉ាងទៀត វាក៏នឹងផ្តល់ភាពងាយស្រួលដល់អ្នកទិញក្នុងការសម្គាល់មួយណាជាបន្លែរបស់ខ្មែរ និងបន្លែមួយណាជាបន្លែនាំចូលផងដែរ»។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទប្រាប់ភ្នំពេញប៉ុស្តិ៍កាលពីខែមេសាថា តាមការព្យាករកម្ពុជាមានលទ្ធភាពក្នុងការផ្គត់ផ្គង់បន្លែក្នុងស្រុកប្រចាំឆ្នាំ ២០២០ នេះចំនួន ៧១៦ ១១៣ តោន ស្មើនឹង ៦៨ ភាគរយនៃតម្រូវការបន្លែសរុបជាង ១ លានតោន។ លោកបន្តថា ដើម្បីបំពេញតម្រូវការក្នុងស្រុកកម្ពុជាចាំបាច់ត្រូវនាំបន្លែពីវៀតណាម និងថៃប្រមាណ ៣២ ភាគរយ៕LA
